Aydheea 1 - Wëël Jwøk

¹ Moi beege luup mo wø nyooth ki yi wïc na nyooth Jwøki jï Aydheea wär Amöth kiper jø Juuda ki jø Jerucalem yïth nïr Udhaya, ki Jötham, ki Eeyeth, ki Edhekaya, kanya bëëtge ni gena nyeye mo Juuda.

Luum Bääyö Mar Jø Juuda

² Wuuö Jwøk aköö, ni «Wui, Maal, cek ïthï! Wui, Piny, wïnynyï! Obwöre moa piidha na døøŋŋø cera, gena ö maal bääta ni gëëmge ki aani.

³ Dhieŋ wänni ŋääe, ni ö arëënni ni ŋäc kar cam mana jiiŋ wänni jïre; 'ba jiya ma jø Icriel, a na wääge a kucge, ni tier luumma ba kwanyge.»

⁴ Wui, u na wï jur ma jø raay en, u na jiy mo raay löör ŋäthu kaamar tëër en, ni bee u nyïïkwaac jiy mo wø tïïö ki gïï mo reyø, ni uuno obwöre mo temma raay møn! Wuuö Jwøk, eni na Jwø Icriel na en kur keere, aweyu, ni taagu gø, ni løøu ŋäthu wøk ki eni.

⁵ ?Aperŋø ni poot bëëdu ni uuno nieŋ yïth raay en? ?U poot manynya man pwöt uuni? Wïthu moø bëët bëëdö no opääŋ täwi, ni ö cwïnynyu ni kwääli ya raayi;

⁶ ki mana täge ki thäc tietu këël wïthu, bäŋ kany mo jööt; 'ba beege ŋwiili keerge; ni beege kwör mo okwöt, ka atwøt mo onilwäk piny, mo bëëdö no odheeth, ni kär bääö, ni kär julö ki maaw.

⁷ Ŋöömö maru araanynyi, ni waaŋ päänye mou ki maac; ni ö pwöthi mou ni lwøri ya jøøa pathi ni nëënö jïïu, ni wëëkge jammi mou bëët ränynyö.

⁸ 'Ba Dhayan awec ni dööŋe ni caala abïl koor man wø dööŋ yi pwödhö, ni caala pääny mo ociel dëëci dïër.

⁹ 'Ba onää Wuuö Jwøk, eni na wïth jammi bëët, bäŋ jiy mo ee wiiø ni kwøw dëëtø, doo na øøno tïmö kaamar Cødam ki Gømöra en.

¹⁰ Wui, u na bwöthe mo Jerucalem, ki jø Juuda, u ni bëëtö maru caala bëët jø Cødam ki jø Gømöra, Wïnynyu luum Wuuö Jwøk, ni cegu ïthu ki pwöc mar Jwøk marø,

¹¹ Wuuö Jwøk aköö, no «?Olämme mou na thööth kønyge ŋø kipera? Aana jøøm ko olämme mo wø waaŋ bäre mou moø ni thööth yøø, ni beege olämme mo nyöök rööm ki dwäle mo dhäk. Yia ba mïnni ki rem mo rwädhe ki mo nyïïdïëk, wala rem atëëe.

¹² ?Kany wø ööu nyïma baŋ lam, aŋa na kööm uuni nou wïdu yi kal mara jaak?

¹³ Muuce mou moø ni bäŋ tietge yøø kär cïpu këët! Gïï wø jïcge ŋwääi ni met mou, yia raac ki ge døc. Wödö man wø wøørru cäŋ man wø päär dwääyi yie, ki wøør cäŋ jwömö, ka acooŋe mo wø cwøllu, a ba jïëy ki ge; kiper acook lam mo wø tïïyu, tïïyu ni bëëtö maru patha kare.

¹⁴ A män ka ajwöm mo wø wøørru kany wø päär dwääyi, ka ajwöm mou møga mo wø wøørru. Gena tïmö na tëër bääta, ni ööla ki käär ge.

¹⁵ Kiper manøgønø, kany wø thaaŋu ceŋŋu maal nou lämö, waŋa kana kanø ki uuni. U këël doo lämö ki lam mo dwøŋ døc, aani, ïtha ba ciia; Kiper uuna jiy mo uuno kuny piny ki rem jiy.

¹⁶ «Lwøgu dëëtu, ni tïïyu dëëtu ni waany, ni ö tïïe mou moa reyø ni daagu ge nyïma. Weyu tïï jammi moa reyø,

¹⁷ ni kwänynyu ki man tïïyu jammi moa beyø. Bëëdu nou tïïya ŋøl ma kare, ni joogu jøøa no ogäy. Cuŋŋu løø kïïe ki määr thuunhnhi.»

¹⁸ Wuuö Jwøk aköö, ni «Ennø, ööu nøø dwätø na aciel ri luubö. Këël na bëëde ni raay mou kwayø kaamar remø, di tïïö ni tar ni caala piiø, këël ge doo kwayø døc, di tïïö ni tar ni caala jïëc røømmø.

¹⁹ Ni näk mo u jïëy ni kïthu luumma bäät tïïc, gïïa beyø moo ciek yïth ŋøøm cammu camø;

²⁰ 'ba ni näk mo u kweer ni gëëmu, u thöör opëëlle thöörö.» Luummögø caana Wuuö Jwøki ki dhee kiree.

²¹ Raŋŋu, päänya beer atïmö kaamar kääbi, ni beeye päänya wara bëëdö ni tïïya ŋøl ma kare, na bëët jøøa beyø yie; 'ba ennø atïmö ni nuta dïnäge yie.

²² Wui, Jerucalem, gwet-bïrö moï aränynyö ni dööŋge na nyal, ni ö kwøk nyïïomøki mo wø maathï ni jääpge rege ki pïï.

²³ Kwääri moï gena jø ageem, ni rege ege dwalø ki kuuwe; ge bëët, ge mëër ki man cun geni ki gwel ki piny, ni ge rïïŋö køør muuce nee camge. Ge bëëdö ni kïïe ba gwøkge, ni ïthge ba cekge ki luup määr thuunhnhi kany wø pëëge kiper køny.

²⁴ Kiper manøgønø, Kwäärö Wuuö Jwøk, eni na wïth jammi bëët, eni na teek na näk Jwø Icriel, ena köö, ni «Aani kwör japa tïïc nyïïmän 'moa dëëra, coola coolø dëëtge, naa jïta ki jwöm.

²⁵ 'Ba aani da gïn mo tïïa tïïö dëërï thuwø, ï na Jerucalem, gïïa reyø dëërï na caal apøk nyal, twöna wøk, kaawat man wø ö apøk nyalli mo wø en dëër nywïënyö wø twöni wøk kany wø leeny nywïënyö ki maac. Gïïa reyø bëët moa en dëërï käla wøk.

²⁶ Køøre a tïŋŋa maal jïrï ki pïëmme kaawat mana dïkwøŋ, ni tïŋŋa maal jïrï ki jø wø cïpi ka acaare kaawat mana tïïa ya acääŋŋe. Kanyøgø nø, ï na Jerucalem, ï di cwølø ni Pääny Bëënynyö, ni Pääny mo Bëënna Adïëri.»

²⁷ Dhayan di piemø, ki jiye moo køp raacge, ki køør adïëri mar Jwøk ki bëënynyö mare.

²⁸ 'Ba jø ageem ki jø raay ge di raanynyø na aciel bëët, ni ö jø wø wec Wuuö Jwøk ni ränyge.

²⁹ Uuni wïthu lääö kiper mana bëëdu nou lama jenni mo wø en cwïnynyu køørge, ni bëëdu ni wïthu lääö ki lam mana tïïyu kwöra näk you jierø yïth ajïniine.

³⁰ Kiper u tïmö kaamar jaath mo bøøge otal ni tïmu kaamar ajïniina mo ba jøøyi ki pïï.

³¹ Jiy moa teek dëëtu otïmö kaamar akaraac mo otal, ni ö tïïe moge ni tïmge kaamar maac mo pätha yie, ni putge waaŋ bëët ni bäŋ ŋat mo lønye jïre ki man bïp gø.