Amøc 7 - Wëël Jwøk

¹ Man beeye gïna nyooth Wuuö Jwøki jïra ki yi wïïa; ena jooda ni cwääö ki lwaa bäänyö. 'Ba kar kaace beeye kanya täk luummi ki lødhø, køør mana nyaari jï nyeya.

² Kanya ö bäänyö na thöör gïïa no otuy bëët bäät piny, Wuuö Jwøk akwaaa ni kööa, ni «Wuuö Jwøk, wëën jic Jeekap. ?Geno kwøwge nidïï? Kiper ge jägö døc.»

³ Køøre Wuuö Jwøk cwïnye aware ni kööe, ni «Gïnögø ba tägi këët.»

⁴ Man thuwø beeye gïna cäŋ Wuuö Jwøki nyoothø jïra ki yi wïïa; ena jooda ni jiiŋŋa ree ki man jääl jiye ki maac. Ni ö maaci ni taal pïï moa en tiet ŋøøm ni täge ki man raany pwöth.

⁵ Køøre Wuuö Jwøk akwaaa ni kööa, ni «Wuuö Jwøk, wec gïnögø. ?Jic Jeekap okwøwge nidïï? Kiper ge jägö døc.»

⁶ Køøre Wuuö Jwøk cwïnye aware ni kööe, ni «Gïnögø thuwø ba tägi këët.»

⁷ Køøre gïn acäŋ nyoothø jïra ki yi wïïa; Wuuö Jwøk ajooda ni cuŋŋö buut dëër øtø mo ogeerø ni thïïŋ, ni cere da thøøl mo nyootha thïïŋ gïrpiny.

⁸ Ni kö Wuuö Jwøki jïra, ni «?Amøc, agïnaŋø ni nëëni jïrï enø?» Ni kööa, ni «Beeye thøøl man wø nyooth thïïŋ gïrpiny.» Køøre Wuuö Jwøk aköö, ni «Bëët jiya ma jø Icriel orøma keda man wø røm dëër øtø ki thøøl man wø nyooth thïïŋ gïrpiny. Køøre nø, ge ba wiia këët.

⁹ Kwör lam mo nyïïkwaac Aydhak na en bäät thuuri oränynyi, ni ö uut lammi mo jø Icriel ni nyaai piny, ni öa maal ni raanynya dhi øt nyeya ma Jeröbäm ki leny.»

¹⁰ Køøre Amaciya, eni na kwääc lam mar Bëthël, ajääk baŋ nyeny Icriel ma Jeröbäm, ni kööe, ni «Amøc manynya man tïïe ka ageem dëërï dï pou ma Icriel, ni luupa care bëët caala baa mo peek bäät paac.

¹¹ Kiper Amøc aköö, «ni ‹Jeröbäm di nääö ri leny, ni ö jø Icrielli ni maai ki tøŋ, ni käl geni yi ŋöömö marge ni kïth ge paac mør.› »

¹² Ni kö Amaciya jï Amøc, ni «Ïïni ni wø neen gïï mo ena nyïm, beerra man aayï ni ciï yi ŋööm Juuda, ni jootï cam marï kunöce, ni køpï luum Jwøk kaace.

¹³ 'Ba kär luum Jwøk køpï këët Bëthël kany, kiper beeye kar lam mar nyeya, ni näk øt lam thuwø mar paac bäre.»

¹⁴ Køøre aløk Amøci jï Amaciya, ni kööe, na «A patha nyikuŋ Jwøk na bëëda cøøn, naa ba en dëët jøw wø kwaan dëëtge ni gena nyïïkuk Jwøk. 'Ba aana dïpïïth dïëk ni näga ŋat wø cooŋ nyïïjer wø nyïïge cam,

¹⁵ ni ö Wuuö Jwøki ni cwöl aani wøk ki kar pïïth dïëk, ni poot na Wuuö Jwøk na köö jïra, ni ‹Ciï ni køpï luummi en jï jiya ma jø Icriel.›

¹⁶ 'Ba ennø, ï na Amaciya, wïny luum Wuuö Jwøk. Ïïna köö, «ni ‹Kär luum ajäl Jwøk køpï dëët jø Icriel, ni ba dwøgï luubö bäätge, ge na nyïïkwaac Aydhak.›

¹⁷ «Kiper manøgø nø, gïna caan Wuuö Jwøki beeye en, ena köö, «ni ‹Cïïï otïmö na kääbi dï pääny, ni ö wäätï ki nyïïï ni nääi ri leny, ni ö ŋøømmi moï ni rømi ni pääŋŋi jï jø møøk, ni ö ïïni ki dëërï ni thøøï yi ŋöömö mo path. Ni ö jø Icrielli ni maai ki tøŋ, ni käl geni yi ŋöömö marge ni kïth ge paac mør.› »