Amøc 5 - Wëël Jwøk

¹ U na dhi øt Icriel, wïnynyu jwøk thøø man jwøa bäätu en,

² «Dhi øt Icriel na caal nyakøø aränynyö, ni ba ö maal këët. Ena put dööŋö yïth ŋøøm moe kaace, ni bäŋ ŋat mo tïŋ gø maal.»

³ Kiper Wuuö Jwøk aköö na ennø, ni «Ni näk paac jääga wøk ki jø leny ma kuma, beeye dïpa keere noo bøth dëëtge; ni ö paac maya ni jääk wøk ki jiy ma dïpa, ni bøth apaarri keerge dëëtge.»

⁴ Kiper Wuuö Jwøk aköö na ennø jï dhi øt Icriel, ni «Manynyu aani kiper nou bëëdu nou kwøw;

⁵ 'ba kär näk mou manynya Bëthël, ni ba cou Gëlgela, ni ba pööthu Bëërcïïba; kiper Gëlgela omak ki tøŋ, ni ö Bëthëlli ni tïme ni bäŋ kare.»

⁶ Manynyu Wuuö Jwøk kiper nou bëëdu nou kwøw. 'Ba ni näk mo ba tïïyu, eni nakwïïth kaamar maac dhi øt Jocep, ni waaŋ Bëthël ni bäŋ ŋat mo bïp gø.

⁷ Gïnögø otägi dëëtu, uuni ni wø wiil ŋøl ma adïëri ni tïïyu gø ni raac, ni leeŋu gïna näk kare piny.

⁸ Eni na cwääc wäät-odäki ki joonni, ni wø wiil muutha cøl ki tar mar amöölla, ni wø tïïc dïcäŋ na wäär; eni ni wø cwöl pïï wøk ki yi naama dwøŋ, ni wëëk gø pädhö bäät ŋøøm, beeye Wuuö Jwøk ki dëëre;

⁹ ni bee eni ni wø gøø jøøa teek piny, ni raany uudi moge na teek.

¹⁰ U män ki ŋat mo jooga luubö mo raac kar løøk, ni yïthu reyø ki ŋat mo caana adïëri.

¹¹ Jøøa can wø thielu piny, ni jwägu geni ki beel. kiper manøgø nø, këël na gëënnu dëëtu ki uut kïte mo mïërö, u ba bëëdö yïthge; këël na pïïdhu ki jer omøki mo mïërö, u ba mädhö ki kwøk nyïïomøki moøgø.

¹² Kiper päl bääyö maru, ki raay mou na thööth, ŋääa, uuni ni wø caan jøøa beyø, ni kädu ki gïï wø cïp ki piny, ni mänu jøøa can ki man jïtge ki ŋøl ma kare.

¹³ Kiper manøgø nø, eni na näk wïïe da acaara obëëdö ni lïŋö kar kaace, kiper piny bëëdö ni raac.

¹⁴ Manynyu tïïe moa beyø ni patha tïïe moa reyø, kiper nou bëëdu nou kwøw. Køøre nø, Wuuö Jwøk, eni na wïth jammi bëët, otïmö ni ena buutu møn, ni put thur kare, keda mana køpu gø.

¹⁵ Männu ki gïna raac, ni mëërru ki gïna beer, ni cïpu ŋøl ma kare kar løøk; kanymør Wuuö Jwøk, eni na wïth jammi bëët, yie bänhnhö ki jø paac moa dööŋ.

¹⁶ Ki køør gïïa tïïyu bëët, kwäärö Wuuö Jwøk, eni na wïth jammi bëët, aköö na ennø, «Dï paac otïmö ni da oduuru ni jiy jwöŋö ni ‹Wui wui›. Ni ö jø puurri ni cwøli kuna jwöŋge, ni ö jø wø ŋäc jwøk thøø ni cwøli baŋ gøøy oduuru;

¹⁷ ni tïm oduuru ni dagø dï pwöth omøki bëët. Gïïögø tägö kiper a pöönhnhö ki dïïu ni mara ajäla.» Gïnögø caana Wuuö Jwøki.

¹⁸ Otïmö ni raac jïïu, u ni many dïcäŋa näk mar Wuuö Jwøk. ?Agïnaŋø noo duu dïcäŋa näk mar Wuuö Jwøki jïïu? Dïcäŋa näk mar Wuuö Jwøk otïmö na muudhö ni patha tar.

¹⁹ Otïmö keda dhaanhø mo ŋwieya ŋuu, ni røømme ki cwieny; køøre noo døny yi øde ni këël cere ri øtø, eni put thwölli ka cam.

²⁰ ?Aŋø, dïcäŋa näk mar Wuuö Jwøk paa beeye muudhö ni patha tar? Kare møn, beeye dïcäŋ mo cøl ni bäŋ tar yie.

²¹ Wuuö Jwøk aköö, na «A män ka ajwöm mo wø tïïyu kipera, ni kwiera geni; acooŋi mo lam mou ba känni ki met ec jïra.

²² Këël u doo cïpö jïra ko olämme mo wø waaŋ, ki muuce mo beel, a ba jïëy ki geni; këël lääy mou moa näk olør mo wø cïpu no olämme kiper mëër, jïge ba neena.

²³ Käru lweelli ki dudi mou buuta; ïtha ba ciia ki dööt thøme mou.

²⁴ 'Ba beerra man tïm ŋølli ma kare ni paac ee maa kaamar jwïïö, ni ö bëëtö ma kare ni pälle kaamar naam mo kwödö ni ba tal.

²⁵ «?Aŋø, uuni na jø Icriel, olämme ki muuce moa cïïmmu ki cwiiri ma pïëraŋween dï paap, cïpu jïra?

²⁶ 'Ba uuni juu moa tïïyu ki ceŋŋu moa cwøl na Caakut ki Kaywan akääru ni wøørru geni.

²⁷ Kiper manøgø nø, u wëëga mak ki tøŋ ni kïth uuni ŋää Damacka.» Luummögø caana Wuuö Jwøki, eni na wïth jammi bëët.