Amøc 4 - Wëël Jwøk

¹ Wïnynyu gïn, uuni na määr Cameria, uuni no olør kaamar dhää Baacan, uuni ni wø thiel jøøa can piny, ni wø caan jøøa näk oööl, uuni ni wø kööm cwøwu, ni kööu, ni «Kännu ki kwøŋ nee wa mäthwa.»

² Wuuö Jwøk akööŋ ri bëëtö mare na en kur keere, ni kööe, ni «Kare møn, da dïcäŋ mo ööa bäätu, mo u di kälö nou pieyi ka dïgäni, ni piec uuni ko obïïdhi, ni bäŋ dhaanhø mo dööŋ.

³ Ni pee uuni wøk ki yïth kwöra näk otunynyö ri kiir, ni ŋati man cøra kanya dïëde ki yie, ni leeŋ uuni wøk kanya cwøl ni Armön.» Beeye Wuuö Jwøk ni cäänö enø.

⁴ «U na jø Icriel, cou kar lam maru Bëthël ni putu luumma dhal, ni pööthu Gëlgela thuwø nou meeta adhala maru. Wäro tïme na amöölla cooth, olämme mou wär kïthu kar lam jaak, ni cïpu paac wïth jammi mou ki køør nïne adäk cooth thuwø.

⁵ Waaŋŋu møø mo ree da thømmø na muuy mar dwøk met ec, ni ŋwöu kiper olämme mo wø cïpu ki met ec, ni töödu kiperge, kiper beeye mana manynyu.» Beeye Wuuö Jwøk ni cäänö enø.

⁶ «'Ba aani thuwø käc akäla dï mïëri mou bëët, ni tïme ni bäŋ cam kwöra bëëdu yïthge bëët; 'ba këël na tïïa gïnögø, u kär duu baŋa.» Beeye Wuuö Jwøk ni cäänö enø.

⁷ «Aani køth amäna ki pädhö thuwø, kanya poode ni dööŋŋa dwäde adäk kiper kac beel. Køth awëëga pädhö paac mør, ni kära gø wëëk pädhö paac maya. Køth apädhö yi pwödhö mør, ni ö pwödhö mana käre pädhö yie ni tale.

⁸ Køøre jø tiet mïëri mo jïtö ka ariiø wala adäk atïmö ni cäädhö paac mørø ni dëëtge bäth, nee ge jïtge ki pïï mo maathge, 'ba ge kär røm; 'ba këël na tïïa gïïögø bëët, u kär duu baŋa.» Beeye Wuuö Jwøk ni cäänö enø.

⁹ «Cäŋ ki twöŋö ajääŋŋa ni raanyge beel mou, ni ö bäänyö ni thöör ajïniine mou, ki pwöth omøki, ko olämmi ki jer mädhi mou; 'ba këël na tïïa gïïögø bëët, u kär duu baŋa.» Beeye Wuuö Jwøk ni cäänö enø.

¹⁰ «Teeŋ täw mana jääŋŋa bäät jø Ijep ajääŋŋa bäätu thuwø. Wøpe mou awëëga näk ri leny, ni ö okwëënyi mou ni maai. ŋwääny dëët jiy moa thøw twïër maru adwøga wïthu; 'ba këël na tïïa gïïögø bëët, u kär duu baŋa.» Beeye Wuuö Jwøk ni cäänö enø.

¹¹ «Jiy møøk araanynya rou, kaawat mana raanynya mïëya näk Cødam ki Gømöra, ni ö uuni na bøth ni tïmu nou caala jaath mo liel mo okäl wøk yi maac; 'ba këël na tïïa gïïögø bëët, u kär duu baŋa.» Beeye Wuuö Jwøk ni cäänö enø.

¹² «Kiper manøgø nø, u na jø Icriel, da gïn mo tïïa tïïö dëëtu. 'Ba kiper gïno tïïa dëëtu, jiiŋŋu rou ki man røømmu ki aani, a na Jwøk maru.»

¹³ Adïëri møn, eni na cwääc kïte, ni wø wëëk jamø kwödö, ni wø nyooth acaaye jï dhaanhø; eni ni wø løk tar mar aruunnø ni tïme ni cøl, ni wø cäädhi dï piny ni bäŋ gïn mo gëëŋ gø; bee eni na Wuuö Jwøk, eni na wïth jammi bëët.