Amøc 2 - Wëël Jwøk

¹ Wuuö Jwøk aköö na ennø, ni «Kiper mana ö jø Möapi na kaathge bääyö marge, a ba døø ŋääa ki man jääla geni, kiper cuu mo nyeny Ëdöm awaaŋge na bäre, këël mana tïmge na bur.

² Kiper manøgø nø, maac ojääŋŋa Möap, ni waaŋ uudi moa teek na en dï pääny Kiriöt. Ni ö jø Möapi ni thøwge ri leny, ni da dïlweel mo päl, ni jø leny kwöŋŋö ni ge kudhö ki tuŋi.

³ Nyeny Möap nääa nääö ki nyïïkuk moe bëët.» Gïnögø caana Wuuö Jwøki.

⁴ Wuuö Jwøk aköö na ennø, ni «Kiper mana ö jø Juuda na kaathge bääyö marge, a ba døø ŋääa ki man jääla geni, kiper mana kwierge ciik Wuuö Jwøk, ni kärge luumme gwøø; ni gaage wøk thuwø køør juu mo patha adïëri moa cääth kwäcge køørge.

⁵ Kiper manøgø nø, maac ojääŋŋa Juuda, ni waaŋ uudi moa teek na en dï Jerucalem.»

⁶ Wuuö Jwøk aköö na ennø, ni «Kiper mana ö jø Icrielli na kaathge bääyö marge, a ba døø ŋääa ki man jääla geni, kiper ŋata beer wø gathge gadhø kiper pïïn gwel, ni gathge ŋata can kiper pïïn war.

⁷ Wï ŋata näk oööl wø nyøønge piny yi tør, ni kierge wïth jøøa mwöl. Ni ö dhaanhe ki wänni ni cige baŋ dhaagø aciel, kiper nee nyeŋŋa na en kur keere nee raanyge.

⁸ Ni buutge buut gïï wø waaŋ olämme bäätge, ni ge buta yïth abïïe moa lwør na dïgïti; ni mäthge øt jwøge ki kwøk nyïïomøki mo jøøa näk bäätge ocämmö ki jammi.

⁹ «'Ba beeye aani na raany jø Amör nyïmge; këël na bëët bäc jø Amörri ni caala bäc jaath mo bäär, ni teekge caala teek dhegu, wïthge adïïra na bäre bäre.

¹⁰ Ni beeye aani na käl uuni wøk cøøn ki yïth ŋøøp Ijep, ni käära uuni dï paap ki cwiiri ma pïëraŋween, kiper nee ŋøøp jø Amör cige jïïu.

¹¹ Køøre aana tïŋ maal ki nyïïkuk Jwøk røk wäätu, ni jëëta ki jiy møøk røk wøpe mou ni cïba geni kur keerge na jø Nadhir. ?Aŋø, u na jø Icriel, gïnögø paa adïëri? Beeye aani na Wuuö Jwøk ni cäänö enø.

¹² 'Ba uuni jø Nadhir amaathu ki kwøk nyïïomøki, ni köömmu nyïïkuk Jwøk nee dwør Jwøk ba køpge.

¹³ Kiper manøgø nø, u nyadha nyadhø kaawat man wø ö tier jääy mo peek ki beel wø nyath gïn mo cøra bäät gø.

¹⁴ Këël dhaanhø mo ŋwïëy ŋääe ba bøth, ni ö ŋata dëëre teek ni bänh dëëre, ni ö ŋat lenynyi ni ba piem jwïëye.

¹⁵ ŋat mo cere da tøŋ ba cuŋŋi, ni ö ŋat mo rïïŋö døc ni ba køny dëëre, ni ŋato këëdi ni ena bäät okweeny, jwïëye ba kønye.

¹⁶ Këël ŋat mo oteeø røk jø leny reeŋø ni bäŋ abïï dëëre dïcäŋöce.» Beeye Wuuö Jwøk ni cäänö enø.