Amøc 1 - Wëël Jwøk

¹ Moi beege luupa køp Amøci, na en røk dïpïïth dïëk paana cwøl ni Tëköa. Luupögø beege moa nyooth jïre ki yi wïïe kiper jø Icriel yïth nïra beet Udhaya ni ena nyeny Juuda ki yïth nïra beet Jeröbäm o Jeyöac ni ena nyeny Icriel. Gïïögø akwøŋ nyooth jïre kanya poode ni poot dööŋŋa cwiiri ariiø ki man täk dïjäŋ pinynyi.

² Ena köö, ni «Wuuö Jwøk märö yi Dhayan, ni køp dwøre yi Jerucalem; ni ö kwör wø kwaac dïëk yïthge ni talge, ni ö luummi mana en bäät Kïn Karmël ni bäbe.»

³ Wuuö Jwøk aköö na ennø, ni «Kiper mana ö jø Damacka na kaathge bääyö marge, a ba døø ŋääa ki man jääla geni, kiper jø Gelät anyathge ka abaya ma nywïënyö.

⁴ Kiper manøgø nø, maac ojääŋŋa, ni waaŋ paana geer nyeya ma Adhaël, na näk paan dwøŋ mana bëët nyeya ma Ben-Adat yie.

⁵ Dïdëët mana en dhi kiir Damacka otoora, ni raanynya jøøa bëëdö yi goor Awën, ki ŋata en teek paaci cere na en Bëëth-Ëden. Ni ö jø Aram ni maai ni kïth geni paana cwøl ni Kir.» Gïnögø caana Wuuö Jwøki.

⁶ Wuuö Jwøk aköö na ennø, ni «Kiper mana ö jø Geedha na kaathge bääyö marge, a ba døø ŋääa ki man jääla geni, kiper jø paac bëët amakge ki tøŋ, ni ŋeewge geni ki jø Ëdöm.

⁷ Kiper manøgø nø, maac ojääŋŋa, ni waaŋ kiir mar Geedha ki uudi moa teek na en yie.

⁸ Ni raanynya jøøa bëëdö yi Acdöt, ki ŋata en teek paaci cere na en Ackelön. Ni løøa cera røk jø Akarön, ni ö moa näk odööŋ røk jø Pilitin ni thumge.» Gïnögø caana Wuuö Jwøki.

⁹ Wuuö Jwøk aköö na ennø, ni «Kiper mana ö jø Tayar na kaathge bääyö marge, a ba døø ŋääa ki man jääla geni, kiper jø paac bëët aŋeewge ki jø Ëdöm, ni kärge wïthge caarø ki dwøl mana tuut na näk mar nyïïmëëe na en yïthakicge.

¹⁰ Kiper manøgø nø, maac ojääŋŋa, ni waaŋ kiir mar Tayar ki uudi moa teek na en yie.»

¹¹ Wuuö Jwøk aköö na ennø, ni «Kiper mana ö jø Ëdömmi na kaathge bääyö marge, a ba døø ŋääa ki man jääla geni, kiper na ŋwiecge køør nyïïmëëkge ma jø Icriel ki tøøŋi, ni wecge bäth cwïny mana dege tïïö. Ni ö wëërri marge ni pälle, ni bëëde ni nut cooth.

¹² Kiper manøgø nø, maac ojääŋŋa, ni waaŋ paana cwøl ni Tëman, ki uudi moa teek na en dï Bödhra.»

¹³ Wuuö Jwøk aköö na ennø, ni «Kiper mana ö jø Amönni na kaathge bääyö marge, a ba døø ŋääa ki man jääla geni, kiper määr jø Gelät moa näk yïthge da jiy arietge ri leny mana këëlge ki jø Gelät, ni ge nyaaya nyeŋ kee moge.

¹⁴ Kiper manøgø nø, maac ojääŋŋa, ni waaŋ kiir mar paana cwøl ni Raaba, ki uudi moa teek na en yie. Ni tïme ni da dïlweel dïcäŋo këël leny yie, ni tïm lenynyi ni teek kaamar atuunna.

¹⁵ Ni ö nyeya marge ni käli no omaa, ge ki nyïïkuk moe bëët.» Gïnögø caana Wuuö Jwøki.