Acther 8 - Wëël Jwøk

Kanya Caani Jï Jø Juuth Nee Jwïëcge Koorge

¹ 'Ba yi cäŋ manøgø, nyeya ma Ayacewëëröc jammi bëët moa en jï Amaan, ŋata män ki jø Juuth, aput wëëk gwanynyø ma Acther. Ni ö Mördekay ni put ci nyïm nyeya, kiper acaan Actherri jï nyeya man näk Mördekay tuuŋge.

² Kanyøgø nyeya ogut lweedø mare man wø näk ree da ŋïï man wø gøø dëër wëëlö, na lwøre baŋ Amaan, akäl wøk ni wëëk gø Mördekay. Køøre Acther jammi moa näk mo Amaan bëët aput cïp cer Mördekay.

³ Køøre Acther acäŋ cäänö ki nyeya, ni päth tiet gø ni jwöŋö ni kwaya gø, nee dee gïn mo tïïe ki man wec gïna raac na tuut Amaanni na käl ri tuuŋ Agaak, na näk ee cïp piny kiper jø Juuth.

⁴ Kanyøgø nyeya athøny warkey mare aput tïŋ maal baŋ Acther; ni Acther puta päny maal ni put cuŋŋö nyïm nyeya.

⁵ Ni kööe, «Ni näk beeye gïn mo beer ki jïrï, ni aano jïtö ki met ec baŋï, ni beeye gïn ma adïëri ki baŋï, ni yiï omïnnö ki aani møn, beerra man göötï ki wëëlö mo raanynya weeli moa cïp Amaanni piny wär Amëdatha, na käl ri tuuŋ Agaak, na gööre kiper raany jø Juuth moa en tiet mïëri moï bëët.

⁶ ?Kiper cwïnya omaa gø nidïï ki gïnögø ni raac enø noo päth bäät jø powa, wala cwïnya omaa gø nidïï ki man neena jø tuuŋwa ni di raanynyø?»

⁷ Køøre nyeya ma Ayacewëëröc aköö jï gwanynyø ma Acther ki Mördekay ŋat Juuth, ni «Raŋŋu, aani jammi bëët moa en jï Amaan anø cïba jï Acther, ni ö Amaanni ni lïëri bäät jaath kiper mana caar gïn mo raac ki man 'näk jø Juuth.

⁸ Ennø, løny ki man göötu baŋ jø Juuth ki nyeŋŋa ki jöö mano raŋŋu ni beerra eni, ni gøøc weeli moøgø ko ogut lweedø mara man wø näk ree da ŋïï man wø gøø dëër wëëlö. Kiper weeli mo awaaci mana gøø piny na göör ki nyeŋŋa, no ogøø ko ogut lweedø mara man wø näk ree da ŋïï, ba løny ki man raanynyi këët.»

⁹ 'Ba kar kaagø, jø wø gööt piny mo nyeya aput cwøl ni nïr dwää adäk pïërariiø kurdäk, ni beeye dwääno cwøl ni Ciban, ni göörge weeli kaawat mana caan Mördekay, ni gööra baŋ jø Juuth, ki bwöthe, ki jø kööre, ki kwääri mo mïëri moa näk dïpa ki pïërariiø ka abïriiø, ki mana täge India këël Ithiöpia. Weeli moøgø göör ka yi jöör göör mar wï jur man nø, ni gööri baŋ jiy bëët ki køør dhøk marge. Ni gööri baŋ jø Juuth thuwø ki køør yi jöör göör marge ki dhøk marge.

¹⁰ Mördekay weeli moøgøøni gööre ka nyeŋ nyeya ma Ayacewëëröc, ni gøøc ge ko ogut lweedø mar nyeya man wø näk ree da ŋïï. Ni jääŋ weeli moøgø tiet mïëri ki jiy mo cäädhi ki bäät okwëënyi mo lääy mo wø rïïŋi døc moa näk opiidhø po nyeya.

¹¹ 'Ba weeli moøgø, nyeya cäänna jø Juuth moa en yïth päänye bëët ki man dwalge dëëtge nee jwïëcge koorge, kiper ni näk da jø tøŋ wala wï jur mør mo tuga geni, nee öge maal bäät jøøka nee raanyge, ni 'näkge ge, ni dïïrge wïth jøøka, ni kuurge ko obwöre ka apoole moge, ni twierge jap jøøka;

¹² ni gïnögø put ka tïïc yi cäŋ manø na aciel enø yïth mïëri bëët mo nyeya ma Ayacewëëröc, kanyo tïm nïr dwää apaar kurriiø na apaar kurdäk, dwääno cwøl na Adar.

¹³ 'Ba weeli mo awaaci agøø piny ni tïme na ciik ni ŋäc yïth mïëri moøgø bëët, kiper nee jø Juuth bëëtge ni dëëtge ege jiiŋŋø kiper nee kwöcge coolge dëët nyïïmän moge yi cäŋ manøgø.

¹⁴ Kar kanyøgø jøøa jääŋŋi gena put aay ni ge rwäänhnhö ki køør dwør nyeya, ni aacge wøk ni ge cäädhi ka bäät okwëënyi mo lääy mo wø rïïŋi døc, moa näk opiidhø po nyeya. 'Ba awaaci manøgø ogøø piny thuwø yi pääny Cuca paan dwøŋ.

¹⁵ Køøre Mördekay aput ö wøk ki baŋ nyeya no oruyö ka abïïn nyec mo kïte caala kït dïmuuy ni kwör møøk tar, ka abïï mo ee leeŋø mo cwääc ka waac lïïna mo mïërö ni kwör møøk näga dïmuur, ni wïïe okïthö ka adun warkey mo dwøŋ; ni bëët jø pääny Cuca ni ge kwöŋŋö ki met ec.

¹⁶ 'Ba gïnögø atïmö ni beeye tar kiper jø Juuth, ni känne ki kanynyø ki met ec jïge, ni tïmge ni ge di wøørø.

¹⁷ Kanyøgø yïth mïëri bëët, ki yïth päänye bëët kwöra näk dwør nyeya ka awaaci mare opïï yïthge, kanynyø ki met ec aput tägö yïthakic jø Juuth, ni tïïge ka ajwöma mo dwøŋ yi cäŋ manøgø. Køøre jø møøk mo thööth moa en dï mïëri dëëtge aløkge na jø Juuth, kiper gena lwäyö ki jø Juuth.