Acther 5 - Wëël Jwøk

Kanya Ö Actherri Na Cwøl Nyeya Ka Amaan Baŋ Atïya

¹ 'Ba kanya tïme na ri dää nïne, Acther abïïe mo gwac arøø dëëre ni døny yi kal mar øt nyeya ni cuŋŋe ni dïët ki dhi øtø man wø bëët wälu yie. 'Ba nyeya opï piny bäät wälu mare ni dïët ki dhi øtø.

² 'Ba nyeya na joot Acther ni cuŋŋö yi kal, yie amïnnö ki gø, ni put athøny warkey mana en cere tïŋ maal baŋ gø. Ni ö Actherri ni nyiik buut gø ni gut wï athøny warkey.

³ Ni kö nyeya jïre, na «?Agïnaŋøøni, gwanynyø ma Acther? ?Agïnaŋø ni manynyï nee tïïc jïrï? Këël miï pëënynya thääŋ ŋøøm 'moa, owëëk ïïni.»

⁴ Kanyøgø Acther aköö, «Wui nyeya, ni näk beeye gïn mo beer ki jïrï, beerra man ööu ka Amaan dïcäŋi baŋ atïya mana jiiŋŋa kiperï.»

⁵ Køøre nyeya aköö, ni «Laaru Amaan cwøl kiper nee mana many Actherri tïïcwa.» Ni ö nyeya ka Amaan ni cige baŋ atïya mana jiiŋ Actherri.

⁶ 'Ba kanya enge bäät maath ki kwøk nyïïomøki, nyeya aköö jï Acther, ni «?Gïn manynyï agïnaŋøøni? Di cïbö jïrï. ?Ni pïëc marï agïnaŋø? Këël miï pëënynya thääŋ ŋøøm 'moa, owëëk ïïni.»

⁷ Ni dwøgi na Actherri jïre, ni «Pïëc mara ki gïn manynya beeye en.

⁸ Wui nyeya, ni näk aano jïtö ki met ec baŋï, ni beeye gïn mo beer ki jïrï ki man tïïyï gïno pëënynya ki gïno manynya, beerra man ööu ka Amaan baŋ atïya mano jiiŋŋa kiperu diøø. Køøre nø, gïna manynya caana caanø kaawat mana caanï.»

Kanya Ö Amaanni Na Ŋøl Luubö Mar Mördekay Nee Nääe

⁹ Køøre Amaan aput døny wøk dïcäŋöca ni cwïnye omïnnö ni kanynyø døc. 'Ba kanya joot Mördekay no opï piny dhi kal mar nyeya ni Mördekay kär ö maal ki man wøør gø, ni eni ba lwäär, Amaan aput gootø ki Mördekay ki gootø mo dwøŋ døc.

¹⁰ 'Ba Amaan dëëre akoore ni cïp cwïnye piny, ni aa paare. Ni ööte ki dwøl baŋ nyïïawääte ki cïïe ma Jëërëc kiper nee öge baŋe.

¹¹ Ni caan luum ajiem kwär mare jïge, ki kwään wääte, ki wödö mana tïïc nyeya kipere, ki mana cuum eni ni ena maal bäät jø kööre bëët ki kwääc mïëri moa bëën nyeya.

¹² Ni cäŋ köö, ni «Këël gwanynyø ma Acther bäŋ ŋat mør mo ee cwølø ki man cøøe ki nyeya baŋ atïya mana jiiŋŋe, 'ba beeye aani keera. Këël aana cäŋ cwøllø ki man cøøa ki nyeya kiper mar diøø thuwø.

¹³ 'Ba kany wø ööa noo jooda Mördekay ŋat Juuth manøgø no opï piny dhi kal mar nyeya, met ec mana jooda ki køør gïïögø bëët puta ränynyö.»

¹⁴ Køøre cïïe ma Jëërëc ki nyïïawääte bëët, gena köö jïre, ni «Beerra man tïïö ki jaath man wø lïër dhaanhø bääte mo bär mare jïtö ki gööye ma pïërabïïc, ni ciï ka amöölla ni caanï gø jï nyeya nee Mördekay lïër bääte. Køøre ïïno ci baŋ atïya ki nyeya ki met ec.» Ni ö Amaanni ni jïëc luummögø ni beeye gïn mo beer, ni ö jaathi manøgø ni jiiŋŋi.