Acther 3 - Wëël Jwøk

Kanya Ö Amaanni Na Määnye Ki Jöö Man 'Näk Jø Juuth Ki Gø

¹ Køør gïïögø, nyeya ma Ayacewëëröc, Amaan wär Amëdatha na käl ri tuuŋ Agaak, acuume na wïth jø kööre moe bëët.

² Ni ö nyeya ni kööm jaae moe bëët mo wø en dhi kal mare nee cøŋge këëlge piny nyïm Amaan ni ge nyootha wödö marge. Ni tïïcge gø bëët kaawat mana caan nyeya; 'ba beeye Mördekay keere na kweer ki këël cøŋ piny ki man wøør gø.

³ 'Ba jaae mo nyeya mo wø en dhi kal mare gena köö jï Mördekay, na «?Aperŋø ni kwierï dwør nyeya en?»

⁴ Ni bëëtge ni ge cäänna Mördekay ki yïth cääŋŋe bëët, 'ba ena kweer ki man cek ïthe jïge. Kiper ena köö, ni «Aana ŋat Juuth; a ba løny ki man këëlla cøŋŋa piny ni wøøra Amaan.» Ni caange luummögø jï Amaan nee joot man näk mo eni jïëy ki luum gø.

⁵ 'Ba na jooti ya Amaanni ni Mördekay okweer ki këël cøŋ piny man wøør eni, cwïnye apäŋ ki wëër;

⁶ ni määny Mördekay ki jöö man 'näk gø ki gø. 'Ba na wïny gø ni Mördekay bee ŋat Juuth, yie kär mïnnö ki man 'näk Mördekay keere. Køøre ena put määnyö ki jöö man 'näk jø Juuth bëët ki gø, ni beege tuuŋ Mördekay, moa en tiet mïëri bëët moa bëën nyeya ma Ayacewëëröc.

⁷ 'Ba kanya tïm cwiic nyeya ma Ayacewëëröc na apaar kurriiø bäät nyec, ri dwääy mana dïkwøŋ man wø cwøl ni Nican, gïn mo cwøl ni pur, mo caala thöör war, aleeŋge nyïm Amaan, nee cäŋ mano raany jø Juuth yie ki dwääy manøca nyoodhe. Ni päth bäät dwää apaar kurriiø man wø cwøl na Adar.

⁸ Kanyøgø Amaan aput cäänö ki nyeya ma Ayacewëëröc ni kööe, ni «Da jiy mo okeethø yi paac marï, ni ge bëëdö kur keerge yïth mïëri moï bëët, ni ciik moge opää ki mo jiy møga bëët, ni ge bëëdö thuwø ni ciik nyeya ba wøørge. Kiper manøgønø, teeŋ jiy mo caala moøgøøni ba many gø niï bëëdï ni cwïnyï bäth ki geni.

⁹ Ni näk beeye gïn mo beer ki jïrï, beerra man kännï wøk ka awaaci nee wïthge dïïr. Køøre a cïpö ki gwet-bïrö ma rumme ma kikarri mo kume apaar nee kïth kwör kän jammi moï, kiper nee tïïc mar paac marï kääri ki gø.»

¹⁰ Ni ö nyeya ni käl gwel lweedø mare wøk man wø näk ree da ŋïï man wø gøø dëër wëëlö, ni wëëk gø Amaan wär Amëdatha, na käl ri tuuŋ Agaak, ŋata män ki jø Juuth.

¹¹ Ni kö nyeya jïre, ni «Gwet-bïrö moøgø bëëtge na moï, ni jøøgø ena cerï ki man tïïyï mana manynyï dëëtge jaak.»

¹² 'Ba na tïm nïr dwää aciel na apaar kurdäk, Amaan jø wø gööt piny mo nyeya acwøle, ni göörge weeli ki køør mana caan Amaanni, ni løøge gø baŋ wïth dhøgi bëët, ki yi jöör göör mar wï jur man nø yïth mïëri moøgø bëët, ni jääŋ weeli moøgø baŋ kwääri mo mïëri, ki jø kööre, ki bwöthe mo wïth juurre mo nyeya bëët. Weeli moøgø göör ka nyeŋ nyeya ma Ayacewëëröc ni ŋïï mar ogut lweedø mare ogøø dëëtge.

¹³ Weeli moøgø ajääŋŋi tiet mïëri bëët moa näk mo nyeya ki ceŋ jiy mo rwäänhnhö, ni caana gø ni kanyo tïm nïr dwää apaar kurriiø man wø cwøl na Adar na apaar kurdäk, yi cäŋ manø na aciel enø, jø Juuth bëët moa näk wøpe, ki jäle, ka apoole ko obwöre, wär raanynyi, ni 'näk geni, ni dïïr wïthge bëët, ni japge put ka twier.

¹⁴ Luubö manøgø doo gøø piny na awaaci yïth mïëri bëët ni caana gø jï jiy bëët nee dëëtge jiiŋge kiper cäŋ manøgø.

¹⁵ 'Ba ki køør mana caan nyeya, jø wø rwäänhnhi weeli moøgø akälge ni keethge ge tiet mïëri bëët. Ni ö awaaci manøgø ni tïï ni ŋäc bäre yi pääny Cuca paan dwøŋ. Ni nyeya ka Amaan gena pï piny jaak ni ge mädhö; 'ba jø pääny Cuca bëëdö ni wïthge rege noodø ni ŋëëtge ogäŋ.