Acther 1 - Wëël Jwøk

Luum Ajwöm-Caammi Moa Tïïc Nyeya

¹ Luubö man täga ïth nïr Ayacewëëröc mana bëëdö na nyeya bäät mïëri ma dïpa ki pïërariiø ka abïriiø ki mana täge India këël Ithiöpia,

² ni eni ena bäät wälu mare paan dwøŋ yi pääny Cuca, na näk pääny mana dwøŋ mar ŋööm Parca.

³ 'Ba kanya tïme na ri dää cwiiri moe bäät nyec, ena tïïö ka ajwöm-cam jï jø kööre ki jø tïïc moe; ni kwääri mo tøŋ mo Parca ki mo Mëdön ee cwølø, ki kwääri mo mïëri moa en tiere, ki jiy moa kwörge døøŋŋø bëët.

⁴ Ni bëëde ni nyøtha jap kwär mar øt nyec mare, ka ajieme ki dööŋö mare ki nïne mo thööth mo dïpa ki pïërabära.

⁵ 'Ba kanya thum nïne moøgø, nyeya acäŋ tïïö ka ajwöm-cam jï jiy bëët moa en yi pääny Cuca paan dwøŋ, moa kwörge døøŋŋø këël moa kwörge therø. Ajwöma manøgø tïïca ya ajïniina mana en yi kal mar nyeya ki nïne abïriiø.

⁶ Ni yi kal mar nyeya oŋwaŋŋø ka abïïk gëëŋŋe mo tar ki mo kïtge caala kït dïmuuy, ni ge bëëdö no olïërö dëët thøøli mo tïïc ka waac lïïna mo mïërö ni kwör møøk näga dïmuur, no otwöö røk oguudi mo tïïc ka gwel-bïrö dëët were mo tïïc ka kïte mo mïërö. Ni köömmi mo tïïc ka warkey ki gwel-bïrö ocïp piny bäät kanya näk ocaamø no oŋwaŋŋø ki wïth kïte ma teeŋi mo piilli ni mïrri.

⁷ Ni kwøŋ gap ka gïï mo tïïc ka warkey, ni beege gïï mo caala athööthe, mo otïïö na teeŋi. Ni kwøk nyïïomøki ocïp nyeya ni thööth jaak ni cwïnye tar ki ge.

⁸ Ni maath maath ki køør luubö mana caan nyeya, ni bäŋ ŋat mo mak ki teek. Kiper nyeya jø tïïc moe ee köömmö nee jiy wëëkge maath keda mano many ŋati man nø.

⁹ 'Ba gwanynyø ma Bacti thuwø atïïö ka ajwöm-cam kiper mään yi paan dwøŋ mar nyeya ma Ayacewëëröc.

Kanya Ö Nyeya Na Riem Gwanynyø Ma Bacti

¹⁰ 'Ba na tïme ni ri bïriet nïne, kanya bëëde ni nyeya omäthö ki køøŋ nyïïomøki ni cwïnye omïnnö, jøøa näk abïriiø na näk odïnö ni wø tïny eni, ni beege Meyuman, ki Bictha, ki Arböna, ki Biktha, ka Abaktha, ki Jëthar, ki Karkac, ajääŋŋe

¹¹ nee gwanynyø ma Bacti øømmi ni cïbi nyïme na aduda ena wïïe. Manøgø tïïc nyeya kaper nee wøp mar gø nyoodhe jï jiy moa en kar ajwöma, ki kwääri moa öö ki tiet mïëri moe, kiper ena dhaagø mo kïte mïërö døc.

¹² 'Ba gwanynyø ma Bacti dwøl mana jääŋ nyeya ki dhøk jøøa näk odïnö akwiere. Køøre nyeya agootø døc ni tïm wëërri mare ni liel cwïnye kaamar maac.

¹³ Køøre nyeya jiy moa wïthge leer mo wø ŋäc gïno tïïc kiper teeŋ luummögø acooŋe; kiper beeye kööŋŋö ki baŋ nyeya ki man cääne nyïm jiy mo wø ŋäc tiet ciik ki ŋøl luup.

¹⁴ Jaae moa pï piny bäät acooŋa ki nyeya beege Karcëna, ki Cëthar, ka Admatha, ki Tarcëc, ki Mërëc, ki Marcëna, ki Memukan. Jøøgø na abïriiø yøø beege jø kööre mo Parca ki Mëdön moa karge cään ki nyeya ni løny ki man dønyge baŋ gø kany wø manyge, ni beege jø wø pï piny nyïm dïkwøŋ cwöt.

¹⁵ Ni kö nyeya jïge, na «?Agïnaŋø noo tïïø ki gwanynyø ma Bacti ki køør ciik? Kiper ena kweer ki man wïny dwøl mara na jääŋŋa baŋe ki dhøk jiya moa näk odïnö.»

¹⁶ Køøre adwøk Memukanni jï nyeya ki jø kööre bëët, ni kööe, ni «Gwanynyø ma Bacti patha nyeya keere na bääye dëër gø. Këël jø kööre bëët ki jiy bëët mo wø bëëdö yïth mïëri moa bëën nyeya ma Ayacewëëröc, eno bääyö dëëtge.

¹⁷ Gïna tïïc gwanynyø man en løny man wïnynyi ya määnni bëët, ni tïïc mään nee cwøw moge neenge ni ege taaø, ni köge, ni ‹Këëlla nyeya ma Ayacewëëröc kiree gwanynyø ma Bacti ka aköömme ki man ö baŋe, ni kweere ki ciin baŋ gø.›

¹⁸ Këël määr jø kööre bëët mo Parca ki mo Mëdön, moa wïny gïna tïïc gwanynyø manøgø dïcäŋi, ge puta tägö ki man ŋwaalge gø dëët cwøwge ni put kännö ka ataa ki gootø mo okadhø.

¹⁹ «'Ba ennø, ni näk beeye gïn mo beer ki jï nyeya, beerra man gööc piny ka awaaci mo caana gø ni gwanynyø ma Bacti ba ci nyïm nyeya këët. Luummögø doo puta göör piny yïth ciik mo Parca ki Mëdön ni put bëëtö na bäre bäre ni ba wiil. Ni ö nyeya ni kïth kar Bacti ki dhaagø mo beer mo tïmö na gwanynyø ni kaala gø.

²⁰ 'Ba kanyo wïny awaaci mar nyeya tiet mïëri moa thööth bëët moa näk moe, mään bëët ge gööga dëët cwøwge ni wøørge ge ki wödö ma kare, këël cwøre kare thiinh wala kare dwøŋ.»

²¹ 'Ba luubö manøgø ajïëc nyeya ki jø kööre moe ni beer. Ni ö nyeya ni put gø tïïc kaawat mana caan Memukanni.

²² Ni put weeli jääŋŋö tiet mïëri moe bëët, ni weeli gööre ka køør dhøk mar paac man nø ki yi jöör göör marge, ni caan luummögø ki dhøk mar paac man nø; ni caana gø ni dïcwøø man nø bëëde ni ena kwäärö ni jïre da teek bäät paac mare.