Abakuk 3 - Wëël Jwøk

Lam Mar Abakuk

¹ Man beeye lam mar nyikuŋ Jwøk ma Abakuk kanya lame ki yi duut.

² Wui Wuuö Jwøk, lïëŋ mar nyeŋŋï awïnynya, ni thäŋ yia ki gïr tïïe moï. Wui Wuuö Jwøk, tïïe moa tïïyï, cäŋ tïïyö kar kany ennø, niï tïïya geni nee ŋäc yïth cwiiri moi. Nyooth met ec këël na bëëdï ni ïïno wëër.

³ Jwøk öö ki yi Tëman, ni eni na en kur keere öö ki bäät Kïn Paran. Ajiem mare maal ee rïëbö bäre, ni piny päŋ ki pwøc mare.

⁴ Tar mare caala tac cäŋ, ni tar käla cere, kanya näk teek mare okanø yie.

⁵ Eni täw mo leth bwödhö nyïme, ni ö thøøe ni caath køøre.

⁶ Ena cuŋŋö ni ree ee jiiø ni nëëk piny, ni räŋŋe ni jäŋ wïth juurre, ni ö kïte na käl piny cøøn ni øcge piny, ni ö thuuri na nut cøøn ni nigemwøny piny. Eni uutjïëth tïïe moe nut ki mana cääŋŋe.

⁷ Aani ajooda no oduŋkaare mo jø Kucan ge jäärö, no oduŋkaare mo jø Midien ge leeŋŋa rege.

⁸ ?Wui Wuuö Jwøk, aŋø, ï wëër ka näm? ?Aŋø, cwïnyï liel ka nyeŋ näm? ?Aŋø, cwïnyï daaŋ ka näpa døøŋŋø, ni tïme niï cäädhï ka jïëth leny mo wø böödö mo wø tut okwëënyi en?

⁹ Atum marï akälï wøk, ni jegï atheerø ki man thööthï. Piny akaaŋŋï ki näm.

¹⁰ Kïte ïïna jootge ni putge tïmö ni jäŋŋi, ni ö jwïëö ni pänhnhe, ni ö kanya päŋ ni lwöre ko odhäny, no odhäny mare puta ö maal døc.

¹¹ Kanya tïm tar mar athëëre moï ni nimal, ni tar mar tøŋ marï nigaaŋ, cäŋ ki dwääy aput cuŋŋö karge maal.

¹² Ki køør räny cwïny marï di piny bäre anyørï; ki køør wëër marï, wïth juurre anyøønï piny.

¹³ Ïïna ci nyïm kiper jiyï nee piemï, kiper man piemï dhaanhnhï na näk wïïe othïïmmö ki maaw. Ïïni wï dïbwödhi mar dhi øtø mana raac anyathï, ni lweerï eni na bäre bäre.

¹⁴ Ïïni, tøŋ mar kwääc lwaa leny adwøgï dëëre, kanya öge kaamar apwøyaweerø nee wa keethge, ni met ec marge caala mar jø wø caar jøøa can ki piny.

¹⁵ Naama dwøŋ anyørï ko okwëënyi moï, ni ö pïïa teeki ni nigekum na bööyö.

¹⁶ Gïïögø bëët awïnynya, ni tïm dëëra ni miel, ni tïm dhaa ni kwanynyi ki lwär, ni ö dëëra ni øc piny, ni tïm tieta ni nhønhnhi. 'Ba a puta bëëtö ni cwïnya yaa cïp piny naa koora cäŋ gïï mo leth mano tägi dëët jiy moo tuk waani.

¹⁷ Këël ni bëëde no olämmi ba nywøl, ni bäŋ nyïëdi ro omøki; ni këël ni bëëde ni bäŋ nyïëdi ro ølipi; ni bäŋ beel yïth pwöth; ni këël noo bëëde ni dïëk bëët othum ki thøø, ni lwääge mo dhäk odööŋ keerge,

¹⁸ a poot bëëdö ni yia met ki ri Wuuö Jwøk, ni bëëda naa kanynyø ki ri Jwøk, eni ni wø piem aani.

¹⁹ Kwäärö Wuuö Jwøk beeye teek mara, kiper tieta kwadhe kwadhø ni tïmge ni jööt ni caala tiet aŋer, ni tïïc aani naa cäädha bäät thuuri kwöra en maal.