Abakuk 2 - Wëël Jwøk

¹ Aani a bëëdö naa kurö kaamar ŋat mo cuŋŋa kar koor mare, ni bëëda naa kurö kaamar dhaanhø mo ena bäät gïr koor maal, naa rääŋö ki man neena gïno caan Wuuö Jwøki jïra, ki gïno løøa kanyo jook aani.

Dwør Wuuö Jwøk Mana Løøe

² 'Ba aløk Wuuö Jwøki jïra ni kööe, ni «Gïno nyoodha jïrï en göör piny bäät opäm, ni iï tïïö no onieŋ, ni løny ki man kwaani ŋat mo rïïŋö.

³ Kiper gïno nyooth poot koora kanya wäŋŋi kipere. 'Ba eni laara cwöp øde ni ba kääŋi. Këël doo nëënö no oruu, koor eni, kiper ka adïëri møn, eni öö, ni eni ba ruu.

⁴ «Ka adïëri møn, ŋat atöör bäŋ bëëtö mo tiir yi cwïnye, 'ba ŋata mare beer kwøw ki køør ŋäädhe mare.

⁵ Maya thuwø, køøŋø jø atöör wø di cøøgø, ni bëëtge ni ge ba jwöm. Geni cwïnyge ege daadø ni päl kaamar bwör, ni caala thøø ni wø ba köö ni ena rømø. Geni wïth juurre bëët wø lemge lemø na moge, ni ge cooŋa jiy bëët kanya ciel na moge.

⁶ «?Aŋø, jøøi bëët ii, jøøgø ba cäŋge ki duut aŋaada, ni marge abuua ni ge jøøŋŋa geni, ni köge, ‹Otïmö ni raac jï jø wø löör jammi piny jïge mo paa moge. Kiper akëël kany mo nyïëdi noo bëëtge ni dëëtge thørge thørø ki jap dïgïti?›

⁷ ?Aŋø, ki baŋu ni jiy moa cammu ge ba ö maal ni cwöba rou? ?Ki baŋu ni ge ba päy bäätu ni wëëkge uuni lwär? Ka adïëri møn, u tïmö ni uuna jø otwierge.

⁸ Uuni kiper mana twierru wïth juurre mo thööth, wïth jiy bëët moo dööŋ ni kwøw u twierge twierø, kiper uuni rem jiy akønynyu piny, ni tïïu ki gïï mo leth yi ŋöömö, ki yïth päänye, ki dëët jiy moa bëëdö yïthge.

⁹ «Otïmö ni raac jï ŋat wø gwän øde ki jammi ki jöö mo raac, ŋat wø bëëdö ni øde ee geer maal kaamar øt wenyø, nee bäŋe gïn mo raany gø.

¹⁰ Gïna caarï ki piny atïmö ni duua lään wïc bäät dhi øtø marï. Ki køør mana dïïrï wïth jiy mo thööth, ïïni ï bääya dëërï keerï.

¹¹ Ka adïëri møn, kïte moa en dëër øtø orëëdi bäätï, ni ö rïwe moa no opeedhø ni jølge döötge.

¹² «Otïmö ni raac jï jø wø geer pääny ki jap rem jiy mo wø kønyge piny, ni wø këël tier pääny piny ni teek ki køør tïïc gïï mo reyø.

¹³ ?Neennu, aŋø, Wuuö Jwøk, eni na wïth jammi bëët, paa eni na caan gø ki man näk mo beeye maac noo pwøc öölö mar jiy, ni ö öölö mar wïth juurre ni cami paapi?

¹⁴ Kiper piny opäŋ ki ŋäc ajiem mar Wuuö Jwøk, kaawat man wø ö pïïyi ni wø pääŋ naama dwøŋ.

¹⁵ «Otïmö ni raac jï ŋat wø lwør athöönh køøŋ ajäla ni maath jø tiet mïëri moa en deŋŋe ni meerge, ki man raŋ lään wïc marge mar bëët wääth dëël.

¹⁶ Ïïno bëëdö no otaaø na kar mana di ïïni jiemø. Ennø, ï ki dëërï, ï luunynya mäthö niï dööŋï ki dëërï. Wuuö Jwøk athöönh køøŋ ajäla mar cer cwïïe ï maadhe maadhø ki gø, ni ö ajiemmi marï ni wiil ree ki lään wïc.

¹⁷ Kiper gïna raac na tïïyï dëër lur Libaanø di coolø dëërï, ki mana raanynyï lääy ni wëëgï ge lwär, kiper mana kønynyï rem jiy piny, ni tïïï ki gïï mo leth yi ŋöömö, ki yïth päänye, ki dëët jiy moa bëëdö yïthge.

¹⁸ «?Aŋø, gïn wø lam ni wø tieŋ dhaanhe na gïn ma kït gïrpiny, na dïpööy ma twöt, agïnaŋø ni kønye? Kiper ŋat wø tïïc gø, wø ŋäätha gïn wø tïïe ki cere, kany wø tïïe ki kït gïrpiny mo ba cäänö.

¹⁹ Otïmö ni raac jï ŋat wø köö jï jaath, ni ‹Päyï,› ni kööe jï kïdi ni wø bäŋ jwïëy dëëre, ni ‹Ö maal.› ?Aŋø, teeŋ gïnögø, løny jïre ki man cïpe ki pwöc? Neenï, eni dëëre olëënynyö ki warkey ki gwel-bïrö, 'ba eni bäŋ jwïëy dëëre.

²⁰ 'Ba Wuuö Jwøk bëëdö yi øt lam mare na en kur keere; beerra man ö pinynyi bäre ni neebäc nyïme.»