2 Timöthi 3 - Wëël Jwøk

Aŋuun Nïne

¹ 'Ba ŋäc gïn en: kanyo tïme na aŋuun nïne, bëët piny otïmö ni raac døc.

² Kiper otïmö ni ŋati man nø mëër ka ree, ni jiy mëër ka jammi, ni ge töödö, ni ge koorrø, ni dhøkge ŋaam, ni wïthge teek ki jøøa nywøl geni, ni bäŋ met ec mo maarge dwøgø, ni luum Jwøk kucge.

³ Ni cwïnyge bäŋ mëër, ni cwïnyge ba maarge dwøk piny, ni gena dïwääc nyeŋŋi, ni bäŋ gïn mo lwäärge, ni ge caala cwëënyi, ni ge män ki gïï mo beyø,

⁴ na jø abuua, ni gena köönynye, ni cwïnyge päŋ ka atöör, ni ge mëër ka jap dëëtge ni ge ba mëër ki Jwøk.

⁵ Ni ge nëënö keda gena jø lam, 'ba teek Jwøk ba maar ci cwïnyge. Teeŋ jøøgø nø, wär kwierï.

⁶ 'Ba dïge da jiy mo wø duunyö yïth mïëri, ni maaŋge wïth mään mo cwïnyge cwøk, na näk cwïnyge opäŋ ki raay, ni wïthge onoot gïïa reyø ni wø many cwïnyge,

⁷ määr wø laar dööt jiy jïëc jaak, na adïëri ba maarge kwany.

⁸ 'Ba jøøgø ge wø kweer ka adïëri thuwø, kaamar Jeene ki Jambare na kwier luum Modhe, ni beeye jiy mo wïthge reyø, ni geno kweer ki jöör ŋäädhe.

⁹ 'Ba bäŋ gïn mo jootge, kiper bøøl marge otïmö ni ŋäc jøw bëëti, keda mana joot bøølø mar jøøgø na ariiø yøø.

Pøøl Köömma Tïmöthi

¹⁰ 'Ba kawaane pwöc mara araŋï, ki bëëtö mara, ki gïna këëlla wïïa ree, ki ŋäädhe mara, ki mëër mara, ni cwïnya yaa cïp piny naa ba dääŋi;

¹¹ ni caannø mara ŋäyï, ki gïïa leth na jwøra, ki gïïa pïï dëëra yi Antïëk, ki yi Ayköniem, ki yi Litara, a teeŋ caarø mo nyïëdi na maa cwïnya ki gø. 'Ba Wuuö aana pieme yïth gïïögø bëët.

¹² 'Ba ka adïëri møn, jiy bëët mo wø many man bëëtge ki bëëtö mar jöör Jwøk ki ri Krictø Jecu, geno caanni.

¹³ 'Ba jøøa reyø, ki jø wø cwöö, rääö marge otïmö no okadhø døc, ni gena jø cwøk ni ge cøøga rege.

¹⁴ 'Ba ïïni ki dëërï put bëëtö ki køør gïna kwanyï na jïëyï døøc ki cwïnyï bäre, niï lääŋŋa jøøa kwanyï gø baŋge,

¹⁵ kaawat mana kwanyï weet Jwøk na en kur keerge na ööï ki gø ki thïnhö, ni wø løny ki man pwönyge ïïni ki jöör pïëm man piem jiy ki gø ki køør ŋäädhe na en ri Krictø Jecu.

¹⁶ 'Ba wëël Jwøk bäre göör ka dwør Jwøk, ni beer kiper pwöc, ki jook dhaanhø, ki twieny bëëtö, ki pwöny røk ki moa beyø.

¹⁷ Kiper nee ŋata näk dhaanh Jwøk nee tïme ni eno thur kare, ni ree ee jiiø kiper tïïe mo wø beyø bëët.