2 Thecalönika 3 - Wëël JwøkLämu Kiperwa 1 'Ba mana dööŋ keere nø, nyïïmera, lämu kiperwa, nee luum Wuuö nyaae døc ni di jiemø, keda mana täge dïïu, 2 nee wa ba päthwa ceŋ jøøa reyø na näk jø raay. Kiper jiy bëët paa oŋäädhö. 3 'Ba Wuuö dwøre ba dak, ni uuno wëëk tëënnö ni koor uuni ki ŋata raac. 4 Kiper Wuuö ewa ŋäädhö døc kiperu, nou tïïya mo wø caanwa jïïu, ni uuno put bëëtö nou tïïya ge. 5 'Ba Wuuö cwïnynyu oløø baŋ mëër mar Jwøk, ni bëëdu nou teek kaamar Krictø. Kär Dee Dhaanhø Mo Bëëdö Jaak Ni Ba Tïïö 6 'Ba kawaane, nyïïmera, wa köömma uuni ki nyeŋ Kwääyø ma Jecu Krictø, nou bëëdu ni kwöru bäyö ki nyïïmëëe moø ni bëëdö jaak yøø ni ge ba tïïö ni wø ba cäädhi ki køør pwöc mana kwanynyu baŋwa. 7 Kiper uuni ki dëëtu ŋäyu nou doo ŋwaala bëëtö marwa. Kiper wa kär bëëdö jaak ni wa ba tïïö kanya bëëtwa dïïu. 8 Ni bäŋ ŋat mo cam mare ewa camø jaak ni kärwa cunnö. 'Ba waana tïïö ki wärre ki cääŋŋe, ni waano ööl døc, kiper nee bäŋe ŋat öölwa dïïu. 9 Ni manøgø kärwa tïïö ni ba beer ki mana dewa pëëö, 'ba wa nyootha jöö mar bëëtö marwa nee ŋwaallu. 10 Kiper këël kanya pootwa dïïu, luummögø acaanwa jïïu, ni «Ni näk da ŋat mo bëëdö jaak ni ba tïïö, kär eni mooc ki cam.» 11 Kiper awïnywa ni da jø møøk dïïu mo ge bëëdö jaak ni ge ba tïïö, ni marge wïïrö jaak, ni bäŋ tïïc mo maarge tïïc. 12 Teeŋ jøøgø nø, wa köömma geni ni wa jooga geni ki nyeŋ Kwäärö ma Jecu Krictø, ki man tïïcge tïïe moge ni cwïnyge ege cïp piny, nee cam marge jootge keerge. 13 'Ba nyïïmera, käru jøøm ki gïïa beyø ni wø tïïyu. 14 'Ba ni näk da ŋat mo kwier gïï ni caanwa yi wëëlö man en, ŋatøca wäru bëëdu ni ŋäyu nø, ni ba dwätu ki gø, nee wïïe lääe. 15 'Ba kär nou tïïya gø keda nyimän, 'ba joogu eni kaamar cöögu. Gwïëth Mar Kwäärö Ma Jecu 16 'Ba kawaane Kwäärö ki dëëre ni wø cïp bëët-mëër, uuno wëëk bëët-mëër cooth ki yïth jammi bëët. 'Ba Kwäärö bëëde ki uuni bëët. 17 'Ba määdhe man en, gööra aani ki cera kiree, a na Pøøl. Ni man en beeye ŋïï mara yïth weeli 'moa bëët. Naa wø göödö na enønø. 18 Met ec mar Kwääyø ma Jecu Krictø bëëde bäätu bëët. |
© The Bible Society of Ethiopia
Bible Society of Ethiopia