2 Thecalönika 2 - Wëël Jwøk

Ŋata Raac

¹ 'Ba kawaane, nyïïmera, kiper luum ööny Kwääyø ma Jecu Krictø, ki røømmø marø mano røømmø ki eni, wa kwaya uuni

² kiper nee wïthu ba wïïrge, wala cwïnynyu pärö, ni bëët keda gïn mo wïnynyu ka ri Jwïëc Jwøk, wala luubö mør mo you wïnynyö, wala wëëlö mo caan ni ööi ki baŋwa, ni caana gø, ni Cäŋ Kwäärö anø öö.

³ Kär dee ŋat maaŋ wïthu ki jöö mør. Kiper cäŋögø ba ööi jaak, ni näk ageem kär kwøŋ tägö, ki ööny ŋata raac noo nyooth ree, ni beeye ŋato raanynyi,

⁴ noo cuum ree, ni män ki gïï wø cøøri bëët ni juu, wala gïï wø wøør, këël mano ööe no opï bäät køøme yi Øt Jwøk Mana Dwøŋ, ni kööe, ni eni ki dëëre beeye na Jwøk.

⁵ ?Aŋø, wïthu awïl ki gïïögø na kwøŋa caan jïïu kanya pooda dïïu?

⁶ 'Ba gïn bëëde kawaane en ni eno mänö ki mana dee tïïö ŋäyu, beeye kiper nee tïme ni eni neenna yi cäŋo näk cäŋ mare.

⁷ Kiper gïna raac na näk tiere okan piny, aløny ni tïïö. 'Ba kawaane poot da ŋat mo mäna gøøni ki mana dee tïïö, këël mano ö ŋatøgø noo daai jööre.

⁸ 'Ba kanyøca nø, Ŋata raac oneen. 'Ba eno 'näk Kwäärö ma Jecu ki jam dhee, ni raany gø, kanyo ööe noo nëëne.

⁹ 'Ba ööny Ŋata raac, oööi ki køør teek Ceethan, ni ööi ka teek mo dwøŋ døc, ki ŋïïce mo cwøk ki gïï mo rëëma ec,

¹⁰ ni ööi ka atade mo reyø døc baŋ jøw oraanynyi, kiper na kweerge ki man mëërge ki gïna näk adïëri, na di ge piemø ki køøre.

¹¹ Ni beeye tiere no ö Jwøki noo mooc ge ki bøølø, ki man jïëcge ki gïn mo patha adïëri,

¹² kiper nee jiy bëët moa näk yïthge met ka gïï mo reyø, na näk kär jïëy ki gïna näk adïëri, nee ge jääl.

U Jiera Jwøki Nou Pieme

¹³ 'Ba nyïïmera, u na mëër Wuue ki uuni, met ec marwa ba maarwa wec ki man dwøkwa gø jï Jwøk cooth kiperu. Kiper u jiera Jwøki cøøn wïlöölö nou pieme, kaawat mana tïïc uuni nou ena kur keeru ki køør Jwïëc Jwøk, ni ŋääthu gïna näk adïëri.

¹⁴ Ni beeye na ö eni na cwøl uuni ki køør luumwa na nyään na met na køpwa, kiper nee moa beyø na näk mo Kwääyø ma Jecu Krictø na näk rege da ajiem, nee cige jïïu.

¹⁵ Kiper manøgø, nyïïmera, cuŋŋu nou teek, nou ŋäya luup moa pwönywa uuni ki ge, kaawat mana wïnynyu dhøkwa, wala moa jootu yi wëëlö.

¹⁶ 'Ba kawaane, Kwääyø ma Jecu Krictø ki dëëre, ki Jwøk na näk Wääø, ŋata mëër ki øøni, na mooc øøni ki cøm cwïny mo bäŋ cuŋŋe, ki ŋäädhe ma wøp mar nyïm ki køør met yie,

¹⁷ cwïnynyu ocøme, ni wëëk u tëënnö ki man tïïyu tïïe bëët moa beyø, këël luupu.