2 Thecalönika 1 - Wëël Jwøk

Määdhe

¹ Aana Pøøl ki Cilbana, ki Timöthi, a göönna baŋ acooŋ Jwøk mar jø Thecalönika, na en ri Jwøk na näk Wuuö, ki Kwäärö ma Jecu Krictø.

² Met ec bëëde bäätu ki bëët-mëër mano ööi ki baŋ Jwøk na näk Wääø, ki Kwäärö ma Jecu Krictø.

Luum Ŋøl Luup Mana Näk Aŋuudi

³ 'Ba nyïïmera, met ec marwa ba maarwa wec ki man dwøkwa gø jï Jwøk cooth kiperu, ni beeye mana beer ki man tïïcwa gø, kiper mana tïm ŋäädhe maru ni päl, ni ö mëërri maru mana mëërru ki røgu ni meet ree.

⁴ Beeye ni töötwa kiperu yïth acook Jwøk en, kiper mana bëëdu nou teek nou ŋäädhö yïth gïïa caan uuni ki ge, ki moø ni leth ni poot jwørru yøø.

⁵ 'Ba manøgø nyootha gø ni ŋøl mar Jwøk beeye adïëri, nou tïmu ni uuno rømø ki buc Jwøk, ni beeye ni jwørru gïïögø kipere.

⁶ Kiper ocaan Jwøki møn, ni beer jïre ki man cool kwöri dëët jø wø tïïc gïï mo leth dëëtu,

⁷ ni cïp jwömö jïïu ki waani bëët, u ni en yïth gïï mo leth enø, kanyo nyooth Kwäärö ma Jecu ki maal, ki nyïïatwiet maal moe na teek, ki yi maac mo liel,

⁸ ni cool kwöri dëët jøøa kuc Jwøk, ki moa taak luumma nyään na met mar Kwääyø ma Jecu.

⁹ 'Ba geno ränynyi ki ränynyö mo bäŋ cuŋŋe, ni riem ge wøk nyïm Kwäärö, ni ö teege na näk ree da ajiem ni ba jootge gø këët,

¹⁰ dïcäŋo ööe noo jiemi dï jiye, noo tïm yïth jøøa ŋäädhö bëët no orëëm ki mare, kiper mana jïëyu marwa na køpwa jïïu kiper cäŋöce.

¹¹ Ni beeye ni wø lämwa cooth kiperu, nee Jwøk marø, nou tïïe ni uuno rømø ki cwönne, nee moa beyø bëët, ki tïïe mo ŋäädhe, nee thurge karge jïïu ki køør teege,

¹² kiper nee nyeŋ Kwääyø ma Jecu nee tïme ni jiem ka køøru, ni ö uuni ni jiemi ki køøre, ki køør met ec mar Jwøk marø ki Kwääyø ma Jecu Krictø.