2 Piter 3 - Wëël Jwøk

Ööny Cäŋ Kwäärö

¹ 'Ba omëëya, kawaane man en beeye riet weeli man gööra baŋu. 'Ba weetøgø karge riet, a tuga cwïnynyu na leer ki ge, kiper mana para wïthu,

² kiper nou bëëdu nou lääŋŋa luup moa køp nyïïkuk Jwøki na en kur keerge ni tägö, ki ciik Kwäärö ma Jecu na näk Pïëmi na wïnynyu baŋ nyïïatwietu.

³ 'Ba beerra man kwøŋu gïn ŋäc, ni kanyo tïme na aŋuun nïne, jø abuua oööi ni ge buuö, ni ge caatha køør gïïa reyø ni wø many cwïnyge,

⁴ ni köge, na «?Age öönynye na buuk, ni öö? Kiper ki mana thøw kwäcwa ca, jammi bëët poot cäätha nyïm keda mana bëëtge ki kanya cak piny.»

⁵ Ni ge tïïya wïthge no owïl ki gïn en, ni maal nutö cøøn ki køør dwør Jwøk, ni piny käl wøk ka yïth pïï, ni bëëdö dï pïï.

⁶ Ni beege pïïögø na ö pinynyi na mayi ya jwïïö ni ränynye.

⁷ Ni poot na dwørøgø, ni piny ki maal ni nut ii, ge bëëdö ni ge bëënna maac, ni geno wiiø këël dïcäŋo ŋøl luup yie, cäŋ mano raany jø wø ba wøør Jwøk.

⁸ 'Ba u no omëëya, kär wïthu wïl ki gïn na aciel en, ki jï Wuuö dïcäŋ aciel keda cwiiri ma kuma, ni cwiiri ma kuma keda dïcäŋ aciel.

⁹ Kiper Wuuö ba dwiil ki mana buue, keda man wø caan jø møøki ni dwiil, 'ba eni poot koora uuni ni cwïnye ee cïp piny, ni bäŋ ŋat manynye nee ränynye, 'ba eni manynya jiy bëët nee thumge ri løk cwïny.

¹⁰ 'Ba Cäŋ Kwäärö oööi ni caala kuu, 'ba kanyøca maal oränynyi ni lwöre ki lwör mo päl døc, ni ö jap maalli ni raanynyi ya maaci, ni ö pinynyi ki japa en yie bëët ni waaŋ ge.

¹¹ ?'Ba kiper mana tïme ni japøgø bëët di raanynyø na enønø, uuno tïmö na teeŋ jiy mo nyïëdi nø? U doo bëëdö ki bëëtö mana en kur keere ki ŋäc bëët jöör Jwøk,

¹² kany poodu nou koora cäŋo ö Jwøki yie, nou tïïya gø nee lääde, ni beeye kanyo ö maalli noo nyebi ni ränynye, no ö jammi noo leenyi ya maaci.

¹³ 'Ba ø koora maal mana nyään ki piny mana nyään keda mana buuk gø, kanya näk kar bëët bëënynyö.

¹⁴ Kiper manøgønø, omëëya, na tïme nou koora gïïögø, putu manynyø ki cwïnynyu bäre nou nwäne ki bëët-mëër ni bäŋ kïdö mo raac wala gïn mo jøøŋŋi dëëtu.

¹⁵ Ni ŋäyu gøøni ni koor mar Kwääyø ni bëëdö ni cwïnye ee cïp piny beeye kiper nee ø piem. Ni beeye mana göör cöögø ma Pøøl na näk omëëyø jïïu, ki køør leec wïc mana wëëk eni,

¹⁶ kanya cääne kiper luummögø, keda man wø caane yïth weeli moe bëët. 'Ba da luup møøk dïge mo teek ki man kwanyi, gïï wø wiir jø wø bäŋ gïn ŋäcge ki moa cwïnyge cwøk, ni ge raanynya dëëtge, keda man wø bëëtge ni ge wiira luup weet Jwøk møga.

¹⁷ Kiper manøgønø, omëëya, na tïme ni gïn ŋäyu kany poode en, gwøgu røgu, kiper nee wïthu ba maaŋ cwøk jø wø bääö, ni tïmu nou dääŋö.

¹⁸ 'Ba cääthu nyïm nou ŋäya met ec ki ŋäc man ŋäyu Kwääyø na näk Pïëmi ma Jecu Krictø. 'Ba ajiem en jïre en nø, këël na bäre bäre. Enøgønø.