2 Nyeye 6 - Wëël Jwøk

Kanya Ö Ilaaca Na Tïïc Ley Nee Neethar

¹ 'Ba lwaa nyïïkuk Jwøk moa therø aköö jï Ilaaca, ni «Neenï, ennø, kany ni bëëtwa yie buutï en atïmö ni thiinh kiperwa.

² Beerra man ciwa bäät Naam Jördan nee ŋati man nø dëëtwa ŋute ki jaath, nee wa gëëtwa ki kany bëëtwa yie kaace.» Køøre ena köö, ni «Cou.»

³ 'Ba dhaanhø aciel aköö, ni «Beerra man aayï ki waani na jiyï ii.» Ni løk gø, ni «Aani, a cøø.»

⁴ Kanyøgønø, ena aay ki geni; 'ba kanya pïïcge bäät Naam Jördan, gena ŋudö ki jenni.

⁵ 'Ba kanya ŋut dhaanhe acielli ki jaath, ley aker ni päth yi naam. 'Ba ena köök ni kööe, «Wui kwäärö mara, ley man di kwaø!»

⁶ 'Ba nyikuŋ Jwøk aköö, no «?Opätha kaa?» 'Ba kanya ö ŋatøgø na nyooth kanya päth leyi yie jïre, ena ŋutö ki bat jaath, ni leeŋ gø yi naam, ni tïïya ley nee neethar.

⁷ Køøre ena köö, ni «Lwørï.» Køøre ŋatøgø cere aput rwaak baŋ gø ni lwør gø.

Kanya Ö Ilaaca Na Kääŋ Gïïa Many Jø Arammi Nee Tïïcge

⁸ 'Ba nyeny Aram ena bäät leny ki jø Icriel; ni ö eni ni cääne ki jø kööre moe ni kööe, ni «Kaace doo kïthö ki twïër leny mara.»

⁹ 'Ba nyikuŋ Jwøk ma Ilaaca ajäägö ki dwøl baŋ nyeny Icriel ni kööe, ni «Gwøk riï, kärï cør kaace, kiper jø leny mo jø Aram ge ööa piny kaace.»

¹⁰ 'Ba nyeny Icriel ajääk kanya caan nyikuŋ Jwøki jïre ki jiy; ni ö eni ni kööm jiy nee rege gwøkge kaagø. 'Ba gïnögø atägö kwöre mo thööth.

¹¹ 'Ba nyeny jø Aram yie atïmö ni raac døc ki luubö manøgø; ni ö eni ni cwøl jø kööre moe ni kööe jïge, na «?Aŋa dëëtø ni en løø nyeny Icriel? Caannu jïra.»

¹² 'Ba dhaanhø aciel dëëtge aköö, ni «Wui nyeya, bäŋgø; 'ba beeye Ilaaca, nyikuŋ Jwøk man wø bëëdö Icriel, ni wø caan dwørï jï nyeny Icriel man wø caanï niï ena øt niine marï.»

¹³ Køøre ena köö, ni «Ciï ni neenï gø kany wø bëëde yie, naa jääga baŋe nee eni mak.» 'Ba acaan jïre ni købi, ni «Neenï, eni ena Döthan.»

¹⁴ Køøre ena jääk kaace ko okwëënyi ki jïëth leny mo wø tut okwëënyi ki jø leny mo thööth døc, ni ö jøøgø ni cige ki wäär ni cielge pääny manøgø dïër.

¹⁵ 'Ba kanya ö ŋat tïïci mar nyikuŋ Jwøk manøgø na o maal ka amöölla na ci wøk, ka adïëri møn, jø leny, ko okwëënyi, ki jïëth leny mo wø tut okwëënyi aput joot ni pääny ege ciel dïër. Kanyøgø, ena put köö jï nyikuŋ Jwøk manøgø, ni «?Wui, kwäärö mara, agïnaŋø noo tïïø?»

¹⁶ 'Ba aløk nyikuŋ Jwøki, ni «Kärï lwäyö, kiper jiy mo en løø en thööth døc ni kaala jiy mo en løøge enø.»

¹⁷ Køøre Ilaaca alämö ni kööe, «Wui, Wuuö Jwøk, a kwaya ïïni, jap nyeŋ dhaanhnha nee neene.» Ni ö Wuuö Jwøki ni jap nyeŋ gø; 'ba ka adïëri møn, bäät kïdi aput joot ni päŋ ko okwëënyi ki jïëth leny mo wø tut okwëënyi mo liel ki mäc mo ena deŋ Ilaaca bäre.

¹⁸ 'Ba kanya ö jø Arammi piny baŋ Ilaaca, Ilaaca alämö jï Wuuö Jwøk ni kööe, na «A kwaya ïïni, tïïc ge na cööye.» Køøre gena put tïïc na cööye ki køør dwør Ilaaca.

¹⁹ Køøre Ilaaca aköö jïge, ni «Jöö man ki pääny man paa mana manynyu; caathu køøra nou kïtha baŋ ŋata manynyu.» Ni kïth ge Cameria.

²⁰ 'Ba kanya nø pïïcge Cameria, Ilaaca aköö, «Wui, Wuuö Jwøk, jap nyeŋ jøøi ii nee ge nëënge.» Kanyøgønø, Wuuö Jwøk nyeŋge aput jap, ni nëënge; 'ba ka adïëri møn, aputge joot ni ge ena dï Cameria.

²¹ 'Ba kanya ö nyeny Icrielli na joot geni, ena köö jï Ilaaca, «?Awuuö, nääa geni? ?Nääa geni?»

²² 'Ba aløøe, ni «Jïre bäär, kär ge 'nägï. ?Aŋø, jiy mo iï maaø ki tøŋ 'nägï nääö? Cïp cam nyïmge, ki pïï, nee ge cämge nee døøge baŋ nyeya marge.»

²³ Kanyøgønø, ena tïïö ki cam mo dwøŋ døc jïge; 'ba kanya nø cämge gena wëëk wääth, ni døøge baŋ nyeya marge. 'Ba geni na jø leny mo jø Aram moa ö wøk baŋ twëër, ge kär laar duu yi ŋööm Icriel këët.

Luum Käc Mana Tägö Kanya Ciel Cameria Dïër

²⁴ 'Ba na tïme na køøre cään, Ben-Adat nyeny Aram jø leny moe bëët acooŋe ni cøøe ni ciel Cameria dïër.

²⁵ 'Ba kanya cielge Cameria dïër, käc mo dwøŋ aput tägö Cameria, ni wï arëën ŋeew ka gwet-bïrö ma pïërabära, ni cam mo raac mo røm ka gïn mo thiinh ŋeew ka gwet-bïrö ma abïïc.

²⁶ 'Ba kanya ö nyeny Icrielli na cør bäät kiir päänyögø, da dhaagø maa rwääyö ni kööe, «Wui, nyeya, køny aani!»

²⁷ Ni løgi ya nyeya, «?Ni näk mo Wuuö Jwøk ï käre kønyø, ïïno kønya gø ki ŋø? ?Aŋø, jïra da beel wala jïra da køøŋ nyïïomøki?»

²⁸ Køøre, nyeya aköö jï dhaagø manøgø, na «?Agïnaŋø cøøn?» Ni løgi ya nyijøøgø, ni «Dhaagø man aköö jïra, ni ‹Cïp wäädï nee camø dïcäŋi; køøre nee wääda camø diøø.›

²⁹ Køøre nø, waani wääda athaalwa ni camwa gø; 'ba na tïme na amöölla maya aana köö jïre, ni ‹Cïp wäädï nee camø.› 'Ba eni wääde akane.»

³⁰ 'Ba kanya ö nyeya na wïny luup mo nyijøøgø, eni abïïe moe ajeeye ki pänh cwïny. 'Ba kanya cäädhe ki bäät kiir kaagø ajoot jiyi ni keeca ee røø tier abïïne.

³¹ Ni kö nyeya, ni «Ni näk mo wï Ilaaca o Capath kära ŋul wøk dïcäŋi, aani, a raany Jwøki raanynyø.»

³² Køøre eni na nyeya ajääk baŋ Ilaaca ki dhaanhø. 'Ba Ilaaca bëëdö no opï piny yi øtø mare, ni jø døøŋŋø opï piny buute. 'Ba kanya poode ni ŋata jääŋ nyeya poot kär pïï, Ilaaca aköö jï jø døøŋŋø, ni «?Ŋäyu ni o dïnääy manøgø ojääŋ baŋa ki dhaanhø nee wïïa ŋul wøk? 'Ba ennø, kanyo ö ŋata jääŋŋi noo pïïe, dhi øtø wär cïëgu, ni jøllu gø. Kiper nyeya mare cäädhö køøre.»

³³ 'Ba kanya poode ni eni poot cäänö ki geni, ka adïëri møn, nyeya ki ŋata jääŋŋi aput pïï baŋe; ni kö nyeya, ni «Ka adïëri møn, käc man ni raac en käla baŋ Wuuö Jwøk. ?Poode naa køya Wuuö Jwøk aperŋø?»