2 Nyeye 4 - Wëël Jwøk

Kanya Ö Ilaaca Na Tïïc Gïn Mo Rëëma Ec Jï Cï Thøø

¹ 'Ba da dhaagø røk mään mo lwaa nyïïkuk Jwøk moa therø ma ajwöŋö dëër Ilaaca ni kööe, ni «Dhaanhnhï ma cwøra athøw, ni ŋäyï ni eni bëëdö ni lwäär ki Wuuö Jwøk. 'Ba ennø, ŋat pïïdö aöö nee obwöre'moa moa na ariiø käle nee tïmge na laaŋe moe.»

² 'Ba Ilaaca aköö jï nyijøøgø, na «?Agïnaŋø noo tïïa jïrï nø? ?Agïnaŋø ni dagø jïrï yi øtø? Caanï jïra.» 'Ba aløk nyijøøgø ni kööe, ni «A na dhaanhnhï en, bäŋ gïrpiny jïra yi øtø, 'ba beeye dak mo yie da maaw keere.»

³ Køøre Ilaaca aköö, ni «Ciï, ni kwäyï ki dääe mo yïthge ŋaam dï paac bäre baŋ jø atut moï bëët; kärï kännö ki mo nøk.

⁴ Køøre wär døny yi øtø marï ni cïëgï dhi øtø bäätï, ï ki wäätï, ni thiiï maaw yïth dääe moøgø bëët, ni cïbï dääe mo opäŋ kur keerge.»

⁵ Kanyøgø nyijøøgø aput aay buut Ilaaca. Køøre dhi øtø acïëk bääte ki wääte; ni ö wääte ni kälge dääe jïre, ni bëëde ni pääŋa yïthge ki maaw.

⁶ 'Ba kanya päŋ dääe, ena köö jï wääde, ni «Kännï jïra ki dak mør.» Ni kö wääde jïre, ni «Bäŋ dak mør këët.» Ni put maawi cuŋŋö.

⁷ Køøre nyijøøgø aöö ni caan gø jï nyikuŋ Jwøk ma Ilaaca. Ni kö nyikuŋ Jwøki, ni «Ciï ni dwøgï maaw pwödhö ni coolï pïïdö marï, ni ö ïïni ki wäätï ni bëëdu nou cama mano dööŋ.»

Kanya Ö Ilaaca Na Tïŋ O Nyijø Cunem Maal Ki Yi Thøø

⁸ 'Ba dïcäŋ aciel, Ilaaca aci Cunem. 'Ba kanya cøøe, da nyijø mo okwär maa joode kaace. Køøre ena kwac nyijøøgø nee cäme; ni cäme. Ni put tïmö ni kany wø cør Cunem jaak, eni puta gaa kaace wø cäme yie.

⁹ 'Ba nyijøøgø aköö jï cwøre, ni «Ennø neenï, ajooda ni ŋati en ni wø cur buutø kany cooth en, ena nyikuŋ Jwøk mo ena kur keere.

¹⁰ Beerra man tïïø ki øtø mo thiinh bäät øtø man maal, ni kïthø yi gø ki pëëm jïre kaace, ki tharabëëta, ki køøm, ki gïn wø bëët lamba bääte, nee kany wäro ö baŋø, nee eni wø ci yie kaace.»

¹¹ 'Ba dïcäŋ aciel Ilaaca aöö ni ci yi thääŋ øtø manøgø ni en maal enø, ni jwöm dëëre yi gø.

¹² Køøre ena köö jï Gaadhi ŋat tïïc mare, ni «Cwøl nyijø Cunem.» 'Ba kanya nø cwøl gø, nyijøøgø aöö ni cuŋŋe nyïme.

¹³ Køøre Ilaaca aköö jï Gaadhi, ni «Ennø, caanï jï nyijøøgø, ni ‹Neenï, ïïna bëëdö niï gwøga waani ki göök man en bäre. ?Agïnaŋø noo tïïa jïrï nø? ?Ï manynya gø naa cääna ki nyeya wala ki kwääy jø leny kiperï?› » 'Ba aløk nyijøøgø, ni «Bäŋ gïn maa can ki gø; aani a bëëdö ka jø powa.»

¹⁴ Kanyøgønø, Ilaaca aköö, na «?Agïnaŋø nø noo tïïc jïre?» 'Ba aløk Gaadhi, ni «Ka adïëri møn, nyijøøgø bäŋ nyilaal jïre; cwøre oløny na jaal.»

¹⁵ Køøre Ilaaca aköö, ni «Cwøl nyijøøgø.» 'Ba kanya ö Gaadhi na cwøl gø, ena öö ni cuŋŋe dhi øtø.

¹⁶ Ni kö Ilaaca, ni «Yi kar kany nø cwiino ööi, ï jïtö ki nyilaal mo iï cïp köörï.» Ni kö nyijøøgø, «Wui nyikuŋ Jwøk, ba løny; kär a cøøgï, a na dhaanhnhï en.»

¹⁷ Køøre nyijøøgø yie aput jïtö ki dhaanhø, ni lwaare ki gø na dïcwøø yi kar kanya caan Ilaaca jïre.

¹⁸ 'Ba kanya ö nyilaalli na døøŋŋe, dïcäŋ aciel ena ci baŋ wänni dï jø wø kac pwödhö.

¹⁹ 'Ba nyilaarøgø aköö jï wänni, ni «Wui wïïa öy, wui wïïa öy.» Køøre wänni aköö jï ŋat tïïc mare, ni «Kïth eni baŋ menni.»

²⁰ 'Ba kanya ö ŋatøgø na käl nyilaal na kïth gø baŋ menni, ena pï köör menni këël mana këët cäŋŋi dhöör; køøre ena thøw.

²¹ Køøre nyijøøgø aeth maal ni pïël nyilaal bäät pëëm mar nyikuŋ Jwøk, ni cïëk dhi øtø bäät gø, ni ci wøk.

²² Køøre cwøre acwøle ni kööe, ni «Beerra man jääŋŋï baŋa ki ŋat tïïc aciel ka arëën, naa reŋŋa baŋ nyikuŋ Jwøk naa duua.»

²³ 'Ba cwøre aköö, na «?Aŋø ni ciï baŋe dïcäŋi en? Kee paa kany wø päär dwääyi yie dïcäŋi wala cäŋ jwömö.» 'Ba ena köö, ni «Bäŋ gïre.»

²⁴ Køøre arëën ajiiŋ nyijøøgø, ni kööe jï ŋat tïïc mare, ni «Kwørï døc nee rïïŋe; kär kwørï mëëth kipera këël kanyo caana gø jïrï.»

²⁵ Kanyøgønø, ena aay ni pïïe baŋ nyikuŋ Jwøk bäät Kïn Karmël. 'Ba kanya ö nyikuŋ Jwøki na joot nyijøøgø ni kare poot bäär, ena köö jï Gaadhi ŋat tïïc mare, ni «Neenï, nyijø Cunem ni ööi ice.

²⁶ Ennø, beerra man reŋŋï baŋe nou røømmu ki gø ni kööï jïre, ni ‹?Ï ööï ka jööt dëël? ?Cwørï dëëre jööt? ?Nyilaal dëëre jööt?› » 'Ba nyijøøgø aköö, ni «Dëëtge jööt.»

²⁷ 'Ba kanya ö nyijøøgø na pïïe baŋ nyikuŋ Jwøk bäät thuur, eni tiet nyikuŋ Jwøk agääme. Køøre Gaadhi aö buute nee nyijøøgø cöör wøk; 'ba nyikuŋ Jwøk aköö, ni «Wec eni, kiper eni da gïn mo cwïnye oränynyö ki gø døc, mo tiere okan Wuuö Jwøki ki aani, ni käre caanø jïra.»

²⁸ Køøre nyijøøgø aköö, na «?Aŋø, ï na kwäärö mara, aana pëëö baŋï ki nyilaal na bëëde? ?A kär köö, ni ‹Kär aani cøøgï›?»

²⁹ 'Ba Ilaaca aköö jï Gaadhi, ni «Twöö abïïnï pierï ni lwørï athøra mara, ni aayï. 'Ba ni näk miï røømmø ki dhaanhø mør, kär eni määthï; ni näk mo da ŋat mo määtha ïïni, kär niï dwøga gø jïre. 'Ba athøra mara wär cïp täärnyïm nyilaal.»

³⁰ 'Ba mii nyilaarøgø aköö, ni «Ŋëët Wuuö Jwøk Jwøa kwøw ki ŋëëtï thuwø, aani ï ba wiia piny.» Køøre Ilaaca aö maal ni ci køør nyijøøgø.

³¹ Kanyøgønø, Gaadhi aput bwøth maal nyïmge ni cïp athøra täärnyïm nyilaal; 'ba bäŋ dwøl, ni bäŋ gïr cärö mo ee joodø. Køøre ena duuö ni røømge ki Ilaaca, ni caan gø jïre, ni «Nyilaal kär päy.»

³² 'Ba kanya ö Ilaaca na døny yi øtø, ka adïëri møn, nyilaal othøw no opïël piny bäät pëëm.

³³ Kanyøgø Ilaaca adøny øtø ni cïëk dhi øtø bäätge karge riet, ni läme jï Wuuö Jwøk.

³⁴ Køøre ena eth bäät pëëm ni but bäät nyilaal, ni cøm dhee dhi nyilaal ni nyeŋŋe dïët ki nyeŋ nyilaal, ni cïp ceŋŋe bäät ceŋ nyilaal, ni rïëp yie bäät nyilaal; ni ö dëër nyilaalli ni put murrö.

³⁵ Kanyøgø, Ilaaca aö maal ni ci deŋ øtø ni duue, ni cäŋ eth bäät pëëm ni rïëp yie bäät nyilaal; ni ö nyilaalli ni put kweer ki tham kwöre abïriiø, ni ö nyilaalli ni put nyeŋŋe jap.

³⁶ Køøre Ilaaca, Gaadhi acwøle ni kööe, ni «Cwøl nyijø Cunem manøgø.» Køøre Gaadhi nyijøøgø acwøle. 'Ba kanya ö nyijøøgø baŋ Ilaaca, Ilaaca aköö, ni «Lwør wäädï.»

³⁷ Kanyøgø nyijøøgø adøny øtø ni päth tiet Ilaaca ni kuul wïïe piny; ni lwør wääde ni døny wøk.

Kanya Ö Ilaaca Na Tïïc Kadø Ni Ba Nääö

³⁸ 'Ba kanya ö Ilaaca na duu Gëlgela, käc dagø kaace. 'Ba kanya bëëde ni lwaa nyïïkuk Jwøk moa therø opï piny nyïme, ena köö jï ŋat tïïc mare, ni «Cïp dak mana dwøŋ maac ni tëëdï ki kadø jï nyïïkuk Jwøk.»

³⁹ 'Ba dhaanhø aciel aci wøk yi pwöla kuna ŋwëëte ko omarø; 'ba ena tïmö ni joota arwønnø ni pune ri gø ni pääŋ ya abïïne ki nyïï gø, ni ööe ni ŋør ge ni kïth geni yi daa kadø. 'Ba bäŋ gïn mo ŋäcge man näk mo gïïögø aŋøøni.

⁴⁰ Køøre kadø atøøkge kiper nee cam jiyi. 'Ba kanya täkge ki cam ennø, gena put jwöŋö ni köge, «Wui nyikuŋ Jwøk, da gïn mo nääö yi kadø!» Ni putge tïmö ni ge ba løny ki cam këët.

⁴¹ 'Ba Ilaaca aköö, ni «Ennø, kännu ki møø.» Ni ö eni ni kïth møø yi daa kadø, ni kööe, ni «Tøøgu jï jiy nee ge cämge.» Kanyøgø aput tïmö ni bäŋ gïn mo nääö yi kadø këët.

Kanya Ö Ilaaca Na Caam Jiy Ma Dïpa Ki Cam Mo Thiinh

⁴² 'Ba nyen mør aöö ki Baal-Calica, ni kännö jï nyikuŋ Jwøk ma Ilaaca ki dääpe mo møk beel moa kwøŋ ciek, ni beege dääpe ma pïërariiø mo tïïc ka møk beel mo wø cwøl ni gäbci, ka abäy ma twiinye mo ena yi keeca. Køøre Ilaaca aköö, ni «Cïpï jï jiy nee camge.»

⁴³ 'Ba ŋat tïïc mare aköö, na «?Aŋø, cïba cam man nyïm jøøi na dïpa ii?» 'Ba Ilaaca aköö, ni «Cïpï jïge nee camge, kiper man beeye dwør Wuuö Jwøk, ena köö, ni ‹Geno cämö, ni ö møøki ni dhäthge.› »

⁴⁴ Køøre ŋat tïïc, cam acïp nyïmge, ni cämge ni dhäth møøki, ki køør dwør Wuuö Jwøk.