2 Nyeye 23 - Wëël Jwøk

Kanya Ö Jöcaya Na Tiir Lam

¹ 'Ba nyeya ajääk baŋ jø døøŋŋø bëët moa en yi Jerucalem ki moa en yi ŋööm Juuda bäre, ni öge ni cooŋge rege buute.

² Ni ö nyeya ni ci yi Øt Wuuö Jwøk ki jø Juuda bëët ki jiy bëët mo wø bëëdö Jerucalem, ki dïlämme, ki nyïïkuk Jwøk, ni beege jiy bëët moa kwörge therø ki moa kwörge døøŋŋø; ni ö nyeya ni kwaan luup bëët ni wïnyö jïge moa en yi wëël luumma tuut Wuuö Jwøki ki jiye na joot yi Øt Wuuö Jwøk.

³ Kanyøgø, nyeya acuŋŋö buut wera mana en dhi øt Jwøk, ni tude ki luubö nyïm Wuuö Jwøk, nee eni bëëde ni caatha køør Wuuö Jwøk, nee gïïa cem Wuuö Jwøki, ki pwöc moe, ki ciik moe gwøe ki cwïnye bäre ka acaaye bäre, nee bëëde ni cäädhi ka køør luup moa no otuudö na no ogöör piny yi wëëlö manøgø. Ni ö jiyi bëët ni putge jïëy ki tut manøgø.

⁴ Køøre nyeya ma Jöcaya acïpö ki dwøl jï Kilkiya na näk Kwääy Lam Mana Dwøŋ, ki dïlämme mo wø en køøre, ki jø wø koor dhi øt Wuuö Jwøk, nee jammi moa no otïïö jï juuga cøøri na Baal ka Acara, ki moa no otïïö jï jap maal, nee kälge wøk Øt Wuuö Jwøk. Ni kälge ge wøk, ni ö eni ni waaŋ geni töök Jerucalem yi pwöl Kidaran, ni kïth bur marge Bëthël.

⁵ Ni riem dïlämme wøk mo wø wøør juu møøk moa no orøøny nyec Juuda nee wø wääŋge ki gïï wø jïcge ŋwääi ni met kwör lam moa en bäät thuuri yïth päänye mo Juuda ki deŋ Jerucalem. Këël dïlämme mo wø wääŋö ki gïï wø jïcge ŋwääi ni met jï Baal, ki jï cäŋ, ki dwääy, ki ceer, këël jap maal bëët, arieme thuwø.

⁶ Ni ö eni ni käl gïna no otieŋø na no ocaa ri jwøa cwøl na Acara wøk ki Øt Wuuö Jwøk, ni kïth gø wøk töök Jerucalem bäät waŋ Naam Kidaran, ni waaŋ gø kaace, ni guur gø na tør, ni ö tørøgø ni jøør gø bäät bwör.

⁷ Ni ö eni thuwø ni raany kwör bëëte mo cwøw mo wø tïïc tïï käp na en yi Øt Wuuö Jwøk, kany wø cwää määnni yie ka abïïe jï jwøa cwøl na Acara.

⁸ Køøre, dïlämme bëët mo Wuuö Jwøk akäl Jerucalem ki yïth päänye mo Juuda, ni raany kwör lam moa en bäät thuuri ni wø wääŋ dïlämme yïthge ki gïï wø jïcge ŋwääi ni met, ki mana täge ki Gëba këël mana këët Bëërcïïba, ni beeye yi ŋööm Juuda bäre. Ni raany kwör lam moa en dhøk kiiri mo Jerucalem, ni beeye mana en dhi kiir Jøcua, ŋata bëën pääny manøgø, ki mana en bäät caam ki dhi kiir mana dwøŋ.

⁹ 'Ba dïlämme moa wara tïïö kwör lam moa en bäät thuuri gena mäni ki man cïpge ko olämme bäät gïn wø cïp olämme bääte mar Wuuö Jwøk mana en Jerucalem; 'ba gena tïïc nee cämge ki muunni mo kär coodø ki thømmø baŋ nyïïmëëkge.

¹⁰ Jöcaya thuwø, Töpeth, kanya raac ni wø waaŋ olämme yie na en yi goor Ben-Inöm atïïe ni ba waany, nee bäŋe dhaanhø mo waaŋ wääde wala nyaare no olämi jï Mölek këët.

¹¹ Ni ö eni ni 'näk okwëënyi moa en dhi kiir mar Øt Wuuö Jwøk, buut øt Nathan-Mëlëk, moa no ocïp nyec Juuda jï jwøge ma cäŋ; ni ö eni ni waaŋ jïëthe mo wø tut okwëënyi moa no ocïbö jï jwøge ma cäŋ.

¹² 'Ba gïï wø cïp olämme bäätge moa tïïc nyeye mo Juuda wï thääŋ øtø mana geer Eeyethi wï øtø maal, ki moa tïïc Maneeca yïth käälle moa na ariiø mo Øt Wuuö Jwøk, akäl nyeya ma Jöcaya wøk ni tøc ge na thäŋi, ni leeŋ thäŋi moge yi waŋ Naam Kidaran.

¹³ Ni ö eni ni raany kwör lam moa en bäät Kïn Aranya na en jï løø kur tuul-cäŋ ki Jerucalem, na näk ogeer Cølömanni nyeny Icriel jï jwøa cwøl na Actaröth, na näk yi Wuuö Jwøk raac ki gø mar jø Caydan, ki jwøa cwøl ni Kemöc, na näk yi Wuuö Jwøk raac ki gø mar jø Möap, ki jwøa cwøl ni Milköm, na näk yi Wuuö Jwøk raac ki gø mar nyïïkwaac jø Amön.

¹⁴ Køøre eni kïte moa no ocwöth piny na gïï lam atøye ni thenh thenh, ni ŋøt jenni piny moa no otieŋø na no ocaa ri jwøa cwøl na Acara, ni kïth kwörge ki cuu mo jiy.

¹⁵ Këël gïn wø cïp olämme bääte mana en Bëthël, ki kar lam mana en bäät thuur na no otïïc Jeröbämmi o Nebat, na wëëk jø Icriel tïïc ki raay, atoor piny. Ni waaŋ kar lam ni guur gø na tør, ni waaŋ Acara thuwø.

¹⁶ 'Ba kanya ö Jöcaya na lwïthe, bwör moa en bäät kïdi aput joot, ni jääge ki dhaanhø ni käl cuu wøk ki yïth bwör ni waaŋ ge bäät gïn wø cïp olämme bääte, ni tïïya gø ni ba waany, ki køør dwør Wuuö Jwøk na caan nyikuŋ Jwøki cøøn, kanya bëëde ni nyeya ma Jeröbäm cuŋŋö buut gïn wø cïp olämme bääte manøgø dïcäŋ man wø wøør na jwøk. Køøre ena cäŋ lwïthö ni joot kïdi mana no ocwöth bäät bwörö mar nyikuŋ Jwøk mana car gïïögø dïkwøŋ.

¹⁷ Ni kööe, ni «?Manece a bwöc ŋa ni nëëni jïra ice?» 'Ba acaan jø päänynyi jïre, ni «Beeye bwöc nyikuŋ Jwøk mana ö ki Juuda na caan gïï ii ni tïïyï dëër gïn wø cïp olämme bääte man ni en Bëthël en.»

¹⁸ Køøre ena köö, ni «Wiiu eni kare; kär dee ŋat dak cuu moe.» Køøre geni cuu moe ki mo nyikuŋ Jwøk ma nyï Cameria aputge wii karge ni bäŋ ŋat mo odak ge.

¹⁹ Køøre, Jöcaya thuwø uut lam bëët moa en bäät thuuri na en yïth päänye mo Cameria, na tïïc nyeye mo Icriel ni ge tïïya Wuuö Jwøk nee goote, araanynye kaamar mana raanynye Bëthël.

²⁰ Ni ŋar dïlämme bëët mo wø lämö kwör lam moa en bäät thuuri na en kaace bäät gïï wø cïp olämme bäätge, ni waaŋ cuu jiy bäätge. Køøre ena døø Jerucalem.

Kanya Ö Jöcaya Na Wøør Cäŋ Cäŋa Pööth Thøøe Yie

²¹ Køøre nyeya jøw bëët aköömme, ni kööe, ni «Beerra man wøørru cäŋ Cäŋa Pööth Thøøe Yie jï Wuuö Jwøk, Jwøk maru, kaawat mana gööri yi wëëlö man na mar luumma tuut en.»

²² 'Ba kanya wøøri, ka adïëri møn, teeŋ cäŋ Cäŋa Pööth Thøøe Yie manøgø poot bäŋgø mo owøørø cøøn ki mana täge ki ri nïr pïëmme moa piem jø Icriel këël mana këët ri nïr nyeye bëët mo Icriel ki mo Juuda.

²³ 'Ba na tïm cwiic Jöcaya na apaar ka abära bäät nyec, beeye kanya ö cäŋ Cäŋa Pööth Thøøe Yie manøgø na wøøri jï Wuuö Jwøk Jerucalem.

²⁴ Køøre Jöcaya, ajuuk, ki jiy mo rege da juu mo cøøra jwïëc jøøa no othøw, ki gïïa no otieŋø na gïï lam ki juu møøk, ki gïïa näk yi Wuuö Jwøk raac ki ge bëët na en yi Jerucalem ki ŋööm Juuda bäre araanynye, ni dwøga luup ciik wïïe moa no ogöör yi wëëlö mana joot Kilkiya na näk Kwääy Lam Mana Dwøŋ yi Øt Wuuö Jwøk.

²⁵ 'Ba bäŋ nyeya mo caala Jöcaya dïkwøŋ, wala mo ö køøre, mo ree ee løø baŋ Wuuö Jwøk ki cwïnye bäre ki jwïëye bäre ki teek mare bäre, ki køør ciik Modhe.

²⁶ 'Ba Wuuö Jwøk cwïnye kär duuö ki wëër mare na dwøŋ na liel kaamar maac bäät jø Juuda, kiper gïïa tïïc nyeya ma Maneeca bëët na wëëk Wuuö Jwøk gootø.

²⁷ Køøre Wuuö Jwøk aköö, ni «Aani jø Juuda daaa daaø buuta thuwø, kaawat mana daaa jø Icriel. Ni kwiera Jerucalem, pääny man ni yaa nø jier en, ki øt Jwøk man ni aano köö ni nyeŋŋa bëëde ni ŋäc yie.»

Luum Thøw Jöcaya

²⁸ 'Ba luum tïïe møga bëët moa tïïc Jöcaya ogöör piny yi Wëël Luup Nyec Juuda.

²⁹ 'Ba ki yïth nïne moa beet Jöcaya, Peerø ma Nekø nyeny Ijep aci baŋ nyeny Aciria nee këëde ki gø bäät Naam Upareeti. 'Ba nyeya ma Jöcaya aci baŋ nyeny Ijep nee këëde ki gø; 'ba kanya ö eni na jooti ya Peerø ma Nekø, ena put Peerø ma Nekø 'näk Megidø.

³⁰ Ni ö jø kööre moe ni kälge rïŋ dëëre ki Megidø ki yi jääy man wø tut okwëënyi, ni kïthge gø Jerucalem ni koonyge gø yi bwörö mare. Køøre jø paac bëët Jeyöakac o Jöcaya alwørge, ni thïïmge wïïe ki maaw ni røønyge gø na nyeya kar wänni.

Luum Jeyöakac Nyeny Juuda

³¹ 'Ba Jeyöakac kanya tïme na nyeya, cwiic dööŋö moe pïërariiø kurdäk, ni bëëde ni ena nyeya ki dwäde adäk yi Jerucalem. 'Ba nyeŋ menni beeye Amutal nyi Jeremaya nyï Libana.

³² 'Ba Jeyöakac abëëdö ni tïïya gïï mo nëëni ni reyø ki jï Wuuö Jwøk, kaawat moa tïïc kwäye bëët.

³³ Ni ö Peerø Nekø ni kïth Jeyöakac øt twöc Ribala na en yi ŋööm Amath, kiper nee ba bëëde na nyeya Jerucalem; ni put cwötö ka ajwäk bäät paac, ni beege gwet-bïrö ma rumme ma kikarri ma dïpa, ki warkey ma rumi ma kikar aciel.

Kanya Ö Jeyöakëm Na Røønyi Ya Peerø Na Nyeya

³⁴ 'Ba Peerø Nekø, Eliekim o Jöcaya arøønye na nyeya kar wänni ma Jöcaya, ni wiil nyeŋ gø ni Jeyöakëm. 'Ba Jeyöakac akäle ni kïth gø Ijep, ni thøø kaace.

³⁵ 'Ba Jeyöakëm gwel-bïrö ki warkey mana cwøl Peerø ma Nekø bääte acïbe jïgø, ni gwel-bïrö ki warkey manøgø jwääe baŋ jiy, ni ŋati man nø jwääe ka køør jammi moa en jïre.

³⁶ 'Ba Jeyöakëm kanya tïme na nyeya, cwiic dööŋö moe pïërariiø kurbïïc, ni bëëde ki cwiiri apaar kurciel ni ena nyeya yi Jerucalem. 'Ba nyeŋ menni beeye Dhebida nyi Pedaya nyï Ruma.

³⁷ 'Ba ena bëëdö ni tïïya gïï mo nëëni ni reyø ki jï Wuuö Jwøk, kaawat moa tïïc kwäye.