2 Nyeye 20 - Wëël Jwøk

Kanya Ö Nyeya Ma Edhekaya Na Tuue Na Jöön Dëëre

¹ 'Ba ki yïth nïrögøøni, Edhekaya atïmö ni tuu ni ena um thøø. Køøre nyikuŋ Jwøk ma Aydheea wär Amöth aö baŋe ni kööe jïgø, ni «Man bee dwør Wuuö Jwøk, ena köö, ni ‹Caan dwørï, kiper ï thøw; ï ba kwøw.› »

² Kanyøgø, Edhekaya nyïme aput løø ri øtø, ni läme jï Wuuö Jwøk, ni kööe,

³ ni «Wui, Wuuö Jwøk, a kwaya ïïni, par wïïï ki mana bëëda naa caatha køørï na adïëri ki cwïnya bäre, ni tïïa ki gïï mo nëëni ni beyø ki jïrï.» Ni ö Edhekaya ni put jwöŋö døc ni yie ee keeyø.

⁴ 'Ba kanya poode ni Aydheea poot kär døny wøk ki yi kal mana en dïër, dwør Wuuö Jwøk aput ö bääte, ni kööe,

⁵ ni «Døøgï ni caanï gø jï Edhekaya nyeny jiya, ni man beeye dwør Wuuö Jwøk, Jwø kwaru ma Deebit, ena köö, ni ‹Lam marï awïnynya, ni jooda pï nyeŋŋï. 'Ba ennø, dëërï døøya mo jööt. 'Ba noo tïme na ri dää nïne, ï cøøa Øt Wuuö Jwøk.

⁶ 'Ba aani, bäät cwiiri moï mëënna mëënnö ki cwiiri apaar kurbïïc. 'Ba ïïni ki pääny man, u piema piemø cer nyeny Aciria; ni gwøa pääny man kiper nyeŋŋa ki nyeŋ dhaanhnha ma Deebit.› »

⁷ Køøre Aydheea aköö, ni «Lwötu ki nyïï olämmi mo omiiø na dhøk, ni twöu gø bäät boor, nee dëëre jöönne.»

⁸ Køøre Edhekaya aköö jï Aydheea, na «?Agïnaŋø noo tïmö na nyuudhi ki man näk mo Wuuö Jwøk dëëra dwøge kare, naa cøøa Øt Wuuö Jwøk ri dää nïne?»

⁹ 'Ba Aydheea aköö, ni «Man beeye nyuudhi mano nyooth Wuuö Jwøki kiperï, mo nyootha gø ni Wuuö Jwøk gïna caane tïïe tïïö. ?A mane ni beer ki jïrï? ?Beerra man ö tïpö man wø nyooth caa ni cääth nyïm ki rumme apaar, wala døø ŋääe ki rumme apaar?»

¹⁰ 'Ba aløk Edhekaya, ni «Jööt jï tïpö ki man cääth nyïme ki rumme apaar; 'ba beerra man døø ŋääe ki rumme apaar.»

¹¹ Køøre nyikuŋ Jwøk ma Aydheea Wuuö Jwøk akwaae, ni ö Wuuö Jwøki ni dwøk tïpö ŋääe ki rumme apaar ki bäät gïn wø nyooth caa mana no otïïc nyeya ma Eeyeth.

Kanya Ö Edhekaya Na Nyooth Jape Jï Jø Babiløn

¹² 'Ba kar kaaca, nyeny Babiløn ma Merödak-Baladan o Baladan ajääk baŋ nyeya ma Edhekaya ki weeli ki muuy, kiper ee wïnynyö ni nyeya ma Edhekaya otuu.

¹³ 'Ba Edhekaya jiy moa jääŋŋi apänhnhe ki met ec, ni nyooth jammi bëët jïge moa en yi øt kän mare, ni beege gwel-bïrö, ki warkey, ki gïï wø ŋwääi wø tïïc kadø ni met, ki maaw mo pere leth, ki jap leny moe bëët, ki jammi moe bëët moa perge leth; ni bäŋ gïrpiny mo ena yi øde wala mo ena tier nyec mare mo odööŋ mo käre nyoodhø jïge.

¹⁴ Køøre nyikuŋ Jwøk ma Aydheea aö baŋ nyeya ma Edhekaya ni kööe jïgø, na «?Aŋø, jøøgø ge carge ŋø? ?Ge kälge kaa?» Ni løgi ya Edhekaya, ni «Ge käla paac mo bäär døc; ge käla Babiløn.»

¹⁵ Køøre Aydheea aköö, na «?Agïïaŋø na neenge yi øtø marï?» 'Ba aløk Edhekaya, ni «Jammi bëët moa en yi øda ajootge; ni bäŋ gïn mo odööŋ røk jammi 'moa moa perge leth mo kära nyoodhø jïge.»

¹⁶ 'Ba Aydheea aköö jï Edhekaya, ni «Wïny dwør Wuuö Jwøk.

¹⁷ Wuuö Jwøk aköö, ni ‹Ka adïëri møn, da nïne mo öö mo jammi bëët moa en yi øtø marï, ki moa no okan kwäre moï yïth uut kän ki mana täge ya acääŋŋe këël dïcäŋi en, ge jwïëa Babiløn, ni bäŋgø mo wec.

¹⁸ 'Ba nyïïkwaayï møøk moo käl dëërï kiree ge di maaø ki tøŋ ni dïn geni, ni tïmge na jø tïïc yi paan dwøŋ mar nyeny Babiløn.› »

¹⁹ 'Ba Edhekaya aköö jï Aydheea, ni «Dwør Wuuö Jwøk mana caanï beer,» kiper acaare, ni kööe, na «?Agïnaŋø ni raac ree, ni näk mo da bëët-mëër ki bëëtö mo beer yïth nïne 'moa?»

Luum Thøw Edhekaya

²⁰ 'Ba luum tïïe møga moa tïïc Edhekaya, ki luum teek mare bäre, ki jöö mana tïïc puul ki øøl mana käl pïï yi pääny ki gø, ogöör piny yi Wëël Luup Nyec Juuda.

²¹ 'Ba Edhekaya athøw ni läp køør kwäcge, ni ö wääde ma Maneeca ni läw kar gø na nyeya.