2 Nyeye 2 - Wëël Jwøk

Kanya Ö Ilaaja Na Kïthi Maal

¹ 'Ba kanya tïm Wuuö Jwøki ni manynya man kïth Ilaaja maal ki ya apwøyaweerø, Ilaaja ki Ilaaca gena tïŋŋö ki Gëlgela.

² 'Ba Ilaaja aköö jï Ilaaca, ni «Beerra man dööŋï kany, kiper Wuuö Jwøk a ee jääŋŋö Bëthël.» 'Ba Ilaaca aköö, ni «Ŋëët Wuuö Jwøk Jwøa kwøw, ki ŋëëtï thuwø, ï ba wiia.» Køøre gena put ci Bëthël.

³ 'Ba lwaa nyïïkuk Jwøk moa therø moa en Bëthël gena ö wøk baŋ Ilaaca ni köge jïgø, ni «?Ŋäyï ni Wuuö Jwøk kwäärö marï käle kälö buutï dïcäŋi?» Køøre ena köö, ni «Yaa, ŋääa; bëëdu mëëth jaak.»

⁴ Køøre Ilaaja aköö jï Ilaaca, ni «Beerra man dööŋï kany, kiper Wuuö Jwøk a ee jääŋŋö Jerikö.» 'Ba Ilaaca aköö, ni «Ŋëët Wuuö Jwøk Jwøa kwøw, ki ŋëëtï thuwø, ï ba wiia.» Køøre gena put aa Jerikö.

⁵ 'Ba lwaa nyïïkuk Jwøk moa therø moa en Jerikö gena nyänh buut Ilaaca ni köge jïgø, ni «?Ŋäyï ni Wuuö Jwøk kwäärö marï käle kälö buutï dïcäŋi?» Køøre ena köö, ni «Yaa, ŋääa; bëëdu mëëth jaak.»

⁶ 'Ba køøre Ilaaja aköö jï Ilaaca, ni «Beerra man dööŋï kany, kiper Wuuö Jwøk a ee jääŋŋö bäät Naam Jördan.» 'Ba Ilaaca aköö, ni «Ŋëët Wuuö Jwøk Jwøa kwøw, ki ŋëëtï thuwø, ï ba wiia.» Køøre ge na ariiø yøø gena pöödhö.

⁷ 'Ba jiy ma pïërabïïc dëët lwaa nyïïkuk Jwøk moa therø gena läp køørge ni cuŋge ni ge dïët ki Ilaaja ki Ilaaca kany mo bäär mëëth, ni geni karge riet ge cuŋŋa bäät Naam Jördan.

⁸ Kanyøgø Ilaaja aleeŋŋa mare akäl wøk, ni ban gø ni gøøc pïï ki gø, ni ö pïïyi ni pääŋge dëëtge ni cige løøi ki løøi. Køøre ge na ariiø yøø gena put ŋut løøga ki kany mo otal.

⁹ 'Ba kanya nø ŋutge løøga, Ilaaja aköö jï Ilaaca, ni «Pëëny gïn manynyï en nee tïïa jïrï kany poode naa kär kälö buutï en.» Ni kö Ilaaca, ni «Beerra man ö teek Jwøki manø ni bäätï enø ni ö bääta, naa läwa karï.»

¹⁰ 'Ba Ilaaja aköö, ni «Ïïna pëëö ki gïn mo teek. 'Ba ni näk maa jootï joodø kanyo käl aani buutï, gïnögø thura kare jïrï; 'ba ni näk maa ba jootï kanyo käl aani, gïnögø ba thur kare jïrï.»

¹¹ 'Ba kanya aacge ni ge cäädhi na aciel ni ge wääö, jääy mo liel, mo tuta okwëënyi mo liel aput öö yïthakicge ni pää geni karge riet. Ni ö Ilaaja ni put aa maal ki ya apwøyaweerø.

¹² 'Ba ajoot Ilaaca, ni ö eni ni gööe ko oduuru, na «Awuuö, Awuuö, bee ï ni wø piem jø Icriel kaamar jïëth leny mo wø tut okwëënyi ki jø leny mo wø këëdi ki bäät okwëënyi!» Kanyøgønø, Ilaaja käre joodø këët. Ni ö eni ni jeey abïï mare na thäŋi ariiø ki køør pänh cwïny.

Kanya Ö Ilaaca Na Läw Kar Ilaaja

¹³ 'Ba Ilaaca aleeŋŋa mar Ilaaja mana no opänh piny ki bääte akwanye, ni døøe ni cuŋŋe bäät ageel Naam Jördan.

¹⁴ 'Ba aleeŋ Ilaaja mana pänh piny ki bääte alwør Ilaaca, ni gøøc pïï ki gø ni kööe, ni «?Wuuö Jwøk, Jwø Ilaaja, age ïïni?» 'Ba kanya gøøc pïï, pïï rege aputge pääŋŋö ki dïëre ni cige løøi ki løøi; ni ö Ilaaca ni put ŋut løøga.

¹⁵ 'Ba kanya ö lwaa nyïïkuk Jwøk moa therø moa käl Jerikö na jootge gïïa tïïc Ilaaca, gena köö, ni «Teek Jwøk mana en bäät Ilaaja anø ö bäät Ilaaca.» Køøre gena öö ni røømge ki eni ni kuulge wïthge piny nyïme.

¹⁶ Ni köge jïgø, ni «Ennø neenï, wa na jiyï ii, jïwa da jiy ma pïërabïïc mo teek. Beerra man cige kuna manyge kwäärö marï ma Ilaaja; kanymør eno kïth Jwïëc Wuuö Jwøki maal ni leeŋ gø bäät kïdi mør wala ee leeŋ ya agäm-kïdi mør.» 'Ba Ilaaca aköö, ni «Käru jäägö.»

¹⁷ 'Ba jøøgø areeth ree këël mana tïm wïïe ni laay ki man kweere; ni kööe, ni «Jäägu.» Køøre geni jiy ma pïërabïïc aputge jääŋŋö, ni määnyge ki nïne adäk; 'ba Ilaaja kärge joodø.

¹⁸ Køøre gena duu baŋ Ilaaca, kanya bëëde yie Jerikö, ni kö Ilaaca jïge, na «?Aŋø, kära caanø jïïu ni käru cøø?»

Kanya Ö Ilaaca Na Tïïe Ki Gïï Mo Rëëma Ec

¹⁹ Køøre, jø päänyögø aköö jï Ilaaca, ni «Ennø neenï, kany ni en päänynyi man yie en beer, kaawat man nëëne jïrï enø, ï na kwäärö marwa; 'ba pïï keerge reyø, ni tïïcge caammi ni ba ciek.»

²⁰ 'Ba Ilaaca aköö, ni «Kännu jïra ki dak mo nyään, ni kïthu yie ka acäbö.» Kanyøgø dak manøgø akälge baŋe.

²¹ Køøre Ilaaca aci bäät jøøro ni køny acäbö yi gø ni kööe, ni «Man beeye dwør Wuuö Jwøk, ena köö, ni ‹Pïï moi anø tïïa ni beyø; bäŋ thøø mo kälge këët, këël caammi bäŋgø mo tïïcge ni ba ciek këët.› »

²² Kanyøgønø, pïï aput bëëtö ni beyø këël dïcäŋi en, ki køør luubö mana caan Ilaaca.

²³ 'Ba Ilaaca aay kaace ni cøøa Bëthël. 'Ba kanya cäädhe waŋjöö, obwöc cwøw gena ö wøk ki yi pääny ni buuge eni ni köge jïgø, ni «Aayï nyie obøønni! Aayï nyie obøønni!»

²⁴ 'Ba kanya ö Ilaaca na lwïthe ŋääe na joot obwöyögø, eni obwöyögø aciene ki nyeŋ Wuuö Jwøk. Køøre, teeŋ cwëënyi møøk ma mädhi ma ariiø gena put ö wøk ki yi lul ni baaŋge jiy ma pïëraŋween kurriiø røkge.

²⁵ Køøre Ilaaca atïŋŋö kaace ni ci bäät Kïn Karmël, ni aae kaace ni døø Cameria.