2 Nyeye 17 - Wëël Jwøk

Luum Awcë Nyeny Icriel

¹ 'Ba kanya tïme na ri cwiiri apaar kurriiø moa beet Eeyethi ni ena nyeny Juuda, Awcë wär Ëla atïmö na nyeny Icriel Cameria, ni bëëde na nyeya ki cwiiri abïŋween.

² 'Ba ena bëëdö ni tïïya gïï mo nëëni ni reyø ki jï Wuuö Jwøk; 'ba moa tïïe ba caal moa tïïc nyeye mo Icriel moa kwøŋ bwödhö nyïme.

³ 'Ba Calmanëcër nyeny Aciria aöö ni këëde ka Awcë, ni ö Awcë ni put tïmö ni ena tiere ni cïpö ka ajwäk jïgø.

⁴ 'Ba ajoot nyeny Aciria na Awcë gëëmö, kiper Awcë ajääk baŋ Cööe nyeny Ijep ki jiy nee eni køny, ni kweere ki man cïpe ka ajwäk jï nyeny Aciria, kaawat man wø cïbe ki yi cwiir cooth. Kanyøgønø, ena mak nyeny Aciria ni kïth gø yi øt twöc.

⁵ Køøre nyeny Aciria, Icriel bäre amaae, ni ci Cameria ni ciel gø dïër ki cwiiri adäk.

⁶ 'Ba kanya tïme na ri bïŋweer cwiiri moa beet Awcë ni ena nyeya, nyeny Aciria Cameria amaae, ni mak jø Icriel ki tøŋ ni kïth ge ya Aciria, ni cïp ge piny nee bëëtge ya Alay ka Abör bäät Naam Gödhan, ki yïth päänye mo jø Mëdön.

Luum Pädhö Mar Jø Icriel Ki Køør Raay Moge

⁷ 'Ba gïnögø tägi kaper mana ö jø Icrielli na tïïge ki raay dëër Wuuö Jwøk, Jwøk marge, na käl geni wøk ki yi ŋööm Ijep cer Peerø nyeny Ijep, kanya bëëtge ni ge wøøra juu møøk,

⁸ ni ge caatha køør kööŋŋe mo wïth juurre moa riem Wuuö Jwøki wøk nyïmge, ni ge caatha køør kööŋŋe moa tïïc nyec Icrielli na pwönyge jiy ki ge.

⁹ 'Ba gena tïïö ki gïï mo patha karge ki piny dëër Wuuö Jwøk, Jwøk marge. Ni gëëtge ki kwör lam mo ena bäät thuuri yïth päänye moge bëët kiper dëëtge, ki mana täge ki mïëri moa therø këël päänye moa døøŋŋø.

¹⁰ Ni ö geni ni cööthge piny ki kïte ki jenni moa no otieŋø na no ocaa ri jwøa cwøl na Acara kiper dëëtge na gïï lamge bäät thuuri ki tiet jen bëët moa no onigïït piny.

¹¹ Ni ö geni ni wääŋge ki gïï wø jïcge ŋwääi ni met kwör lam moa en bäät thuuri bëët kaawat mana wara tïïc wïth juurre moa riem Wuuö Jwøki wøk nyïmge; ni tïïge ki gïï mo reyø ni ge tïïya Wuuö Jwøk nee goote.

¹² Ni tïnyge juu møøk, ni Wuuö Jwøk oköö jïge, ni «Gïnögø kär tïïyu.»

¹³ 'Ba jø Icriel ki jø Juuda ge wø kööm Wuuö Jwøki köömmö ki dhøk nyïïkuk Jwøk bëët ki dhøk jø wø joot jammi ki køør man wø nyooth Jwøki jïge, ni kööe, ni «Weyu uutjïëth raay mou ni gwøgu gïïa cema ki ciik 'moa na en ri pwöc 'moa bëët moa köömma kwäyu ki gø, ni beege na jääŋŋa baŋu ki dhøk jiya ma nyïïkuk Jwøk.»

¹⁴ 'Ba jø Icriel ki jø Juuda luummögø kärge wïnynyö, ni bëëtge ni wïthge teek kaamar kwäcge, na kär Wuuö Jwøk, Jwøk marge, ŋäädhö.

¹⁵ Ni kwierge ciik moe, ki luubö mana tuude ki kwäcge, ki luup moa cem geni ki ge. Ni tïmge ni ge caatha køør juu mo oballe jaak, ni tïmge ni bäŋ karge, ni caathge køør kööŋŋe mo wïth juurre møøk moa en deŋge, ni beege jøøa ö Wuuö Jwøki na kööm geni kiperge ni gïrge kär ŋwalge.

¹⁶ Ni wecge gïïa cem Wuuö Jwøki, Jwøk marge, ni leenyge warkey ni tïïcge ge na nyïïrøøe ariiø na gïï lamge kiper dëëtge, ni cööthge piny ki jaath mana no otieŋø na no ocaa ri jwøa cwøl na Acara, na gïï lamge; ni wøørge jap maal bëët, ni tïnyge jwøa cwøl ni Baal.

¹⁷ Ni waaŋge wäätge ki nyïïge no olämme jï juu møøk, ni tïïge ki jap adïëda, ni thööthge ki war, ni gathge dëëtge ki man tïïge ki gïï mo nëëni ni reyø ki jï Wuuö Jwøk, ni ge tïïya Wuuö Jwøk nee goote.

¹⁸ Køøre, Wuuö Jwøk awëër døc ki jø Icriel, ni riem ge wøk buute, ni bäŋgø mo odööŋ; 'ba beege jø tuuŋ Juuda keerge.

¹⁹ 'Ba jø tuuŋ Juuda thuwø, gïïa cem Wuuö Jwøki, Jwøk marge, kärge gwøø; 'ba ge bëëdö ni ge caatha køør kööŋŋe moa tïïc jø Icrielli na pwönyge jiy ki ge.

²⁰ Køøre, Wuuö Jwøk akweer ki nyïïkwaac Icriel bëët ni caan geni, ni cïp ge ceŋ dïtwïëte, këël mana riem ge wøk buute.

²¹ 'Ba kanya ö eni na nø cööt jø Icriel wøk ki tier nyec mar jø dhi øt Deebit, geni Jeröbäm o Nebat arøønyge na nyeya. Ni ö Jeröbämmi ni män jø Icriel ki man cääthge køør Wuuö Jwøk, ni tïïc ge nee ge tïïge ki raay mo døøŋŋø døc.

²² Ni ö jø Icrielli ni bëëtge ni ge caatha køør raay bëët moa tïïc Jeröbämmi, ni bëëtge ni ba wecge,

²³ këël mana ö Wuuö Jwøki na riem ge wøk buute, kaawat mana caan gø ki dhøk jiye bëët ma nyïïkuk Jwøk. Kanyøgønø, jø Icriel aput käl ki yi ŋöömö marge ni kïth ge ya Aciria, ni putge bëëtö kaace këël dïcäŋi en.

Kanya Kïth Cameria Ki Jiy Mo Path

²⁴ 'Ba nyeny Aciria akännö ki jiy ki Babiløn ki Kuta, ka Awi, ka Amath, ki Cepar-Waym, ni kïth ge yïth päänye mo Cameria nee bëëtge kwöra wara bëët jø Icrielli yïthge; ni put Cameria tïmö na marge, ni putge bëëtö yïth päänye moe.

²⁵ 'Ba kanya täkge ki bëëtö kaace, gena bëëdö ni Wuuö Jwøk ba wøørge. Ni ö Wuuö Jwøki ni put ŋuuwe jääŋŋö dïge, ni ö ŋuuwe ni putge møøk dïge cam ni putge thøø.

²⁶ 'Ba acaan jï nyeny Aciria, ni købi, ni «Juurre moa kïthï yïth päänye mo Cameria nee bëëtge yïthge, jöö man bëëtge ki gø ki Jwøk mar ŋöömmece kucge; køøre nø, Jwøk manøgø ŋuuwe ajääŋŋe dïge, ni ö ŋuuwe ni putge geni 'näk, kiper jöö man bëëtge ki gø ki Jwøk mar ŋöömmece kucge.»

²⁷ Køøre nyeny Aciria acïpö ki dwøl ni kööe, ni «Lwötu ki dïlämi aciel røk dïlämme moa magu ki tøŋ Cameria, nee cøøe nee bëëde kaace, nee jiy pwönynye ki jöö man bëëtge ki gø ki Jwøk mar ŋöömmece.»

²⁸ Kanyøgønø, dïlämi aciel røk dïlämme moa mak ki tøŋ kaace, aöö ni bëëde Bëthël kaace, ni pwöny geni ki jöö man wøørge Wuuö Jwøk ki gø.

²⁹ 'Ba wïth juurre moøgø bëët ge poot tëëŋö ki juu moge yïth päänye moa bëëtge yïthge, ni cïpge geni yïth uudi kwör lam moa en bäät thuuri moa no otïïc jø Cameria.

³⁰ Ni ö jiy moa käl Babiløn ni tëëŋge ki jwøk marge ni caage gø ri jwøge ma Cuköt-Benöt, ni ö jø Kuta ni caage mana tieŋge ri Nergal, ni ö jø Amath ni caage marge ra Acima,

³¹ ni ö jø Awi ni caage moge ri Nibaath ki Tartak. Ni ö jø Cepar-Waym ni waaŋge obwöre moge no olämme jï juu moge mo wø cøøri na Adramëlëk ka Anamëlëk.

³² 'Ba jøøgø, gena tïmö ni Wuuö Jwøk wøørge wøørø thuwø, ni röönyge ki dïlämme yïthakicge mo tïïö jïge yïth uudi kwör lam moa en bäät thuuri.

³³ 'Ba geni, gena tïmö ni Wuuö Jwøk wøørge wøørø, ni wø cäŋge juu moge tïnynyö ki køør kööŋŋe mo wïth juurre moa kälge rege.

³⁴ 'Ba këël dïcäŋi en, jø mo bëëdö Cameria ge poot bëëdö ni ge caatha køør kööŋŋe moa dïkwøŋ, ni Wuuö Jwøk ba wøørge na adïëri, ni ge ba cäädhi køør ciik moe, ki luup ŋøl moe, ki pwöc moe, ki gïïa ceme, eni na Wuuö Jwøk, na kööm nyïïkwaac Jeekap ki ge, ŋata caae ni Icriel,

³⁵ ni beege jøøa ö Wuuö Jwøki na tude ki ge ki luubö ni kööm geni ni kööe, ni «Juu møøk kär wøørru, ni ba këëllu cøŋŋu piny jïge, ni ba tïnynyu geni, ni ba cïpu ko olämme jïge.

³⁶ 'Ba a na Wuuö Jwøk, na käl u wøk ki yi ŋööm Ijep ki teek mo dwøŋ ki køør teek bada, beeye aani noo wøørru, ni beeye aani noo këëllu cøŋŋu piny jïre, ni beeye aani noo cïpu jïre ko olämme.

³⁷ 'Ba ciik, ki luup ŋøl, ki pwöc, ki gïïa cema, na göör piny jïïu, beerra man magu rou ki geni, ni kïthu ge bäät tïïc cooth; ni ba wøørru juu møøk.

³⁸ Ni ö luubö mana tuuda ki uuni, ni ba wïl wïthu ki gø, ni ba wøørru juu møøk.

³⁹ 'Ba a na Wuuö Jwøk na näk Jwøu, beeye aani noo wøørru; ni beeye aani noo piem uuni ceŋ nyïïmän mou bëët.»

⁴⁰ 'Ba jøøa bëëdö Cameria luummögø kärge wïnynyö; 'ba gena bëëdö ni ge tïïö ki raay ki køør kööŋŋe moge moa dïkwøŋ.

⁴¹ 'Ba këël na bëët wïth juurre moøgø ni Wuuö Jwøk wøørge wøørø, ge poot bëëdö ni ge tïnynya juu moge, këël mana këët ri wäätge ki nyïïkwaacge, këël dïcäŋi en.