Biblia Todo Logo
Bìoball air-loidhne

- Sanasan -

2 Nyeye 15 - Wëël Jwøk


Luum Adhariya Nyeny Juuda
( 2 Luup Nyeye 26:3-4 , 21-23 )

1 'Ba kanya tïme na ri cwiiri ma pïërariiø ka abïriiø moa beet Jeröbämmi ni ena nyeny Icriel, Adhariya wär Amaciya atïmö na nyeny Juuda.

2 'Ba kanya tïme na nyeya, cwiic dööŋö moe apaar ka abïciel, ni bëëde ni ena nyeya ki cwiiri ma pïërabïïc kurriiø yi Jerucalem. 'Ba nyeŋ menni beeye Jeköliya nyijø Jerucalem.

3 'Ba Adhariya abëëdö ni tïïya gïï mo nëëni ni beyø ki jï Wuuö Jwøk, kaawat moa tïïc wänni ma Amaciya.

4 'Ba gïna no odööŋ keere ni käre tïïö, kwör wø läm jiyi yïthge bäät thuuri käre raanynyø. 'Ba jiy poot bëëdö ni ge cïpö ko olämme ni ge wääŋö ki jer wø jïcge ŋwääi ni met yïth kwörögø.

5 'Ba Wuuö Jwøk nyeya ajääle ni kïth dëër gø ki dhøøbø, këël aŋuun kwøw mare. Ni bëëde yi øtø kur keere, ni ö wääde ma Jötham ni put tïmö ni paan-dwøŋ ki paac bäre ena cere.

6 'Ba luum tïïe møga bëët moa tïïc Adhariya ogöör piny yi Wëël Luup Nyec Juuda.

7 'Ba Adhariya athøw ni läp køør kwäcge, ni koonyi buut kwäcge yi Pääny Deebit. Ni ö wääde ma Jötham ni läw kar gø na nyeya.


Luum Dhekaraya Nyeny Icriel

8 'Ba kanya tïme na ri cwiiri ma pïëradäk ka abära moa beet Adhariya ni ena nyeny Juuda, Dhekaraya wär Jeröbäm atïmö na nyeny Icriel, ni bëëde ni ena nyeya ki dwäde abïciel Cameria.

9 'Ba ena bëëdö ni tïïya gïï mo nëëni ni reyø ki jï Wuuö Jwøk, kaawat moa tïïc kwäye, ni bëëde ni raay moa tïïc Jeröbämmi o Nebat na wëëk jø Icriel tïïc ki raay ba wiie.

10 'Ba Calum wär Jabëc agëëmö ki Dhekaraya, ni tuk gø piny ni 'näk gø dï jiy, ni läw kar gø na nyeya.

11 'Ba luum tïïe møga moa tïïc Dhekaraya ogöör piny yi Wëël Luup Nyec Icriel.

12 Kanyøgønø, luubö mana caan Wuuö Jwøki jï Jiyu aput thur kare na kööe, ni «Jiy moo käl dëërï, ki mano täge ki wäädï këël mano pïïe ri nyikwaar nyikwaarï, ge pïïa piny bäät wälu mar jø Icriel.»


Luum Calum Nyeny Icriel

13 'Ba kanya tïme na ri cwiiri ma pïëradäk ka abïŋween moa beet Adhariya ni ena nyeny Juuda, Calum wär Jabëc atïmö na nyeny Icriel, ni bëëde ni ena nyeya ki dwääy aciel Cameria.

14 Køøre Menaëm o Gadi atïŋŋö Tirja ni ci Cameria, ni tuk Calum wär Jabëc piny ni 'näk gø kaace, ni läw kar gø na nyeya.

15 'Ba luum tïïe møga moa tïïc Calummi, këël ki luum ageem mana tïïe, ogöör piny yi Wëël Luup Nyec Icriel.

16 Kanyøgø Menaëm acäŋ tïŋŋö ki Tirja, ni tuk Tipca ni raany gø ki jiy moa en yie bëët, ki mïëri moa en deŋŋe, kiper mana ö jøøgø na kweerge ki man cïpge ceŋge jïre. Ni ö eni ni riet yïth mään bëët moa näk yïthge da jiy.


Luum Menaëm Nyeny Icriel

17 'Ba kanya tïme na ri cwiiri ma pïëradäk ka abïŋween moa beet Adhariya ni ena nyeny Juuda, Menaëm o Gadi atïmö na nyeny Icriel, ni bëëde ki cwiiri apaar ni ena nyeya Cameria.

18 'Ba ki yïth nïne moa beede bëët, ena bëëdö ni tïïya gïï mo nëëni ni reyø ki jï Wuuö Jwøk, ni bëëde ni raay moa tïïc Jeröbämmi o Nebat na wëëk jø Icriel tïïc ki raay ba wiie.

19 'Ba Puul nyeny Aciria aöö nee këëde ki jø Icriel, ni ö Menaëmmi ni cïpe jï Puul ki gwet-bïrö mo peek mare beeye rumme ma kuma aciel mo røm ka rumi mana cwøl ni kikar kiper nee eni køny Puulli nee tier nyec mare këët piny ni teek.

20 'Ba Menaëm gwel moøgø jwääe baŋ jø Icriel bëët moa no okwär, ni ŋati man nø jwääe ka gwet-bïrö ma pïërabïïc pïërabïïc, kiper nee cïbe jï nyeny Aciria. Køøre nyeny Aciria kär ruu këët yïth ŋøøpøgø; ena put døø.

21 'Ba luum tïïe møga bëët moa tïïc Menaëmmi ogöör piny yi Wëël Luup Nyec Icriel.

22 'Ba Menaëm athøw ni läp køør kwäcge, ni ö wääde ma Pekaya ni läw kar gø na nyeya.


Luum Pekaya Nyeny Icriel

23 'Ba kanya tïme na ri cwiiri ma pïërabïïc moa beet Adhariya ni ena nyeny Juuda, Pekaya o Menaëm atïmö na nyeny Icriel Cameria, ni bëëde ki cwiiri ariiø ni ena nyeya.

24 'Ba ena bëëdö ni tïïya gïï mo nëëni ni reyø ki jï Wuuö Jwøk, ni bëëde ni raay moa tïïc Jeröbämmi o Nebat na wëëk jø Icriel tïïc ki raay ba wiie.

25 'Ba kwääy jø leny mare ma Peka o Remaliya adwätö ki jø Gelät ma pïërabïïc, ni gëëmge ki eni, ni tukge gø piny Cameria, ge ki Argøp ki Ariie, ni eni ena kar gwøk røk mana no ogeerø ni teek paan dwøŋ, ni puti ya Peka 'näk, ni ö Peka ni läw kar gø na nyeya.

26 'Ba luum tïïe møga bëët moa tïïc Pekaya ogöör piny yi Wëël Luup Nyec Icriel.


Luum Peka Nyeny Icriel

27 'Ba kanya tïme na ri cwiiri ma pïërabïïc kurriiø moa bëët Adhariya ni ena nyeny Juuda, Peka o Remaliya atïmö na nyeny Icriel Cameria, ni bëëde ki cwiiri ma pïërariiø ni ena nyeya.

28 'Ba ena bëëdö ni tïïya gïï mo nëëni ni reyø ki jï Wuuö Jwøk, ni bëëde ni raay moa tïïc Jeröbämmi o Nebat na wëëk jø Icriel tïïc ki raay ba wiie.

29 'Ba ki yïth nïne moa bëët Peka ni ena nyeny Icriel, Tiglat-Pilëëcër nyeny Aciria aöö ni mak päänye moa cwøl ni Ijöön, ki Abël-Bëëth-Maika, ki Janöa, ki Këdëc, ka Adhör, ki ŋööm Gelät ki ŋööm Galili, ni beeye ŋööm jø tuuŋ Naptali bäre; ni mak jiy ki tøŋ ni kïth ge ya Aciria.

30 'Ba Awcë wär Ëla agëëmö ki Peka o Remaliya, ni tuk gø piny ni 'näk gø, ni put läw kar gø na nyeya. 'Ba gïnögø atägö kanya tïme na ri cwiiri ma pïërariiø moa bëët Jötham wär Adhariya ni ena nyeny Juuda.

31 'Ba luum tïïe møga bëët moa tïïc Peka ogöör piny yi Wëël Luup Nyec Icriel.


Luum Jötham Nyeny Juuda
( 2 Luup Nyeye 27:1-4 , 7-9 )

32 'Ba kanya tïme na ri riet cwiiri moa bëët Peka o Remaliya ni ena nyeny Icriel, beeye kanya tïm Jötham wär Adhariya ni ena nyeya Juuda.

33 'Ba eni kanya tïme ni ena nyeya, cwiic dööŋö moe beege pïërariiø kurbïïc, ni bëëde ni ena nyeya ki cwiiri apaar ka abïciel yi Jerucalem. 'Ba nyeŋ menni beeye Jeruca nyi Dhadök.

34 'Ba ena bëëdö ni tïïya gïï mo nëëni ni beyø ki jï Wuuö Jwøk, kaawat moa tïïc wänni ma Adhariya.

35 'Ba gïna no odööŋ keere ni käre tïïö, kwör wø läm jiyi yïthge bäät thuuri käre raanynyø. 'Ba jiy poot bëëdö ni ge cïpö ko olämme ni ge wääŋö ki jer wø jïcge ŋwääi ni met yïth kwörögø. 'Ba eni dhi kal mar Øt Wuuö Jwøk mana en jï maal acäŋ geerrø.

36 'Ba luum tïïe møga moa tïïc Jöthammi ogöör piny yi Wëël Luup Nyec Juuda.

37 'Ba ki yïth nïröka beeye kanya täk Wuuö Jwøki ki man jääŋ Recin nyeny Aram, ki Peka o Remaliya nee këëtge ki jø Juuda.

38 'Ba Jötham athøw ni läp køør kwäcge, ni koonyi buut kwäcge yi pääny kwari ma Deebit. Ni ö wääde ma Eeyeth ni läw kar gø na nyeya.

© The Bible Society of Ethiopia 

Bible Society of Ethiopia
Lean sinn:



Sanasan