2 Nyeye 14 - Wëël Jwøk

Luum Amaciya Nyeny Juuda

¹ 'Ba kanya tïme na ri riet cwiiri moa beet Jeyöac wär Jeyöakac ni ena nyeny Icriel, Amaciya o Jöac atïmö na nyeny Juuda.

² 'Ba Amaciya kanya tïme na nyeya, cwiiye pïërariiø kurbïïc, ni bëëde ni ena nyeya ki cwiiri ma pïërariiø ka abïŋween Jerucalem. 'Ba nyeŋ menni beeye Jöadan nyijø Jerucalem.

³ 'Ba Amaciya abëëdö ni tïïya gïï mo nëëni ni beyø ki jï Wuuö Jwøk, kaawat moa tïïc wänni ma Jöac bëët; 'ba ba caal moa tïïc kwari ma Deebit.

⁴ 'Ba gïna no odööŋ keere ni käre tïïö, kwör wø läm jiyi yïthge bäät thuuri käre raanynyø. 'Ba jiy poot bëëdö ni ge cïpö ko olämme ni ge wääŋö ki jer wø jïcge ŋwääi ni met yïth kwörögø.

⁵ 'Ba kanya ö tier nyeci mare na këët piny ennø, eni jøøa tïïö tiere na 'näk wänni kanya bëët wänni na nyeya aput 'näk.

⁶ 'Ba wäät jøøgø na dïnäge yøø käre nääö, ki køør luubö mana no ogöörö yi wëël ciik Modhe, na cem Wuuö Jwøki na kööe, ni «Wëëe ba doo nääö kiper gïïa tïïc obwöre moge, no obwöre ba doo nääö kiper gïïa tïïc wëëkge. 'Ba ŋati man nø doo thøw ni thuunhnha raaye keere.»

⁷ 'Ba Amaciya jø leny mo jø Ëdöm mo jïtö ki kume apaar anääe yi goor Acäbö, ni mak Cela ki leny, ni put nyeŋ gø cak ni Jökthiël, këël man bëëde dïcäŋi en.

⁸ Køøre Amaciya ajäägö ki dwøl jï nyeny Icriel ma Jeyöac o Jeyöakac nyikwaar Jiyu, ni kööe, ni «Ööï nee dëëtø raŋø.»

⁹ 'Ba Jeyöac nyeny Icriel aput jääk baŋ Amaciya nyeny Juuda ki dwøl mo köö, ni «Ïïni, ï caala oŋöönö jaak mana en yi lur Libaanø, na jääk baŋ jaath mana pere leth na en yi lur Libaanø, ni kööe, ni ‹Cïp nyaarï jï wääda nee nywøme.› 'Ba kar kaagø, lää paap mo bëëdö yi lur Libaanø aput cør kaace ni put oŋöönö nyøøn piny.

¹⁰ 'Ba ennø møn, jø Ëdöm anø böötï ni jït cwïnyï ka atöör. Beerra man mïn yiï ka ajiem mana jootï ni bëëdï paarï. ?Aŋø ni manynyï gïn mo raac en, mo ïïni ki jiyï ma jø Juuda u thum ki gø?»

¹¹ 'Ba Amaciya akweer ki man cek ïthe. Køøre Jeyöac nyeny Icriel aci baŋe; ni put wïthge nigäk ka Amaciya nyeny Juuda, ni putge këëdö kanya cwøl ni Bëëth-Camic, na en løø kur jø tuuŋ Juuda.

¹² Ni ö jø Juuda ni bööti ya jø Icrielli, ni reŋge ni ŋati man nø reŋŋa paare.

¹³ Køøre Jeyöac nyeny Icriel, nyeny Juuda ma Amaciya o Jöac nyikwaar Akadhiya aput mak ki tøŋ yi Bëëth-Camic, ni ci Jerucalem ni toor kiir Jerucalem piny ki mana täge ki dhi kiir mana cwøl ni Ipariem këël mana këët dhi kiir mana en gøøt; ni kanya toor piny, bär mare beeye gööye ma dïpe aŋween.

¹⁴ Ni ö Jeyöaci ni lwør warkie bëët, ki gwet-bïrö bëët, ki jap paac bëët moa joot yi Øt Wuuö Jwøk, ki moa joot kwör kän moa en yi øt nyec, ni käl jiy moa maae ki tøŋ thuwø ni døø Cameria.

¹⁵ 'Ba luum tïïe møga moa tïïc Jeyöaci, ki luum teek mare, ki luum lenye moa këële ka Amaciya nyeny Juuda, ogöör piny yi Wëël Luup Nyec Icriel.

¹⁶ 'Ba Jeyöac athøw ni läp køør kwäcge, ni koonyi buut kwäye ma nyec Icriel Cameria; ni ö wääde ma Jeröbämmi ni läw kar gø na nyeya.

¹⁷ 'Ba Amaciya o Jöac nyeny Juuda abëëdö ki cwiiri apaar kurbïïc køør thøw Jeyöac wär Jeyöakac nyeny Icriel.

¹⁸ 'Ba luum tïïe møga moa tïïc Amaciya ogöör piny yi Wëël Luup Nyec Juuda.

¹⁹ 'Ba da ageem maa tïïc dëër Amaciya yi Jerucalem, ni ö eni ni reŋ Lakic; 'ba gena jääk køøre Lakic ni put gø 'näk kunece.

²⁰ Køøre rïŋ dëëre akäli ki bäät okweeny ni koonyi yi Jerucalem buut kwäye Pääny Deebit.

²¹ Kanyøgønø, jø Juuda bëët Adhariya wär Amaciya alwørge, ni røønyge eni na nyeya kar wänni. 'Ba kar kaace Adhariya cwiiye apaar ka abïciel.

²² Ni ö Adhariya ni geer Elath ni dwøk gø tier Juuda, køør thøw wänni.

Luum Jeröbäm Wär Jeyöac Nyeny Icriel

²³ 'Ba kanya tïme na ri cwiiri apaar kurbïïc moa beet Amaciya o Jöac ni ena nyeny Juuda, Jeröbäm o Jeyöac atïmö na nyeny Icriel Cameria, ni bëëde na nyeya ki cwiiri ma pïëraŋween kurciel.

²⁴ 'Ba Jeröbäm abëëdö ni tïïya gïï mo nëëni ni reyø ki jï Wuuö Jwøk, ni bëëde ni raay bëët moa tïïc Jeröbämmi o Nebat, na wëëk jø Icriel tïïc ki raay, ba wiie.

²⁵ 'Ba eni waŋkeew mar jø Icriel adwøk kare ki mana täge ki Libø-Amath këël mana këët bäät Naam Araaba, ki køør dwør Wuuö Jwøk, Jwø Icriel, na caane ki dhi dhaanhnhe ma nyikuŋ Jwøk ma Joona wär Amitay, nyï Gëth-Ëper.

²⁶ Kiper Wuuö Jwøk caannø mar jø Icriel bëët mana leth na caan geni ki gø, ni beege jiy bëët këël laaŋe, ajoode, ni bäŋe ŋat mo kønya ge.

²⁷ 'Ba kiper mana näk mo Wuuö Jwøk ba many gø nee wïth jø Icriel dïïre bäät piny, gena kønye ki ri Jeröbäm o Jeyöac.

²⁸ 'Ba luum tïïe møga bëët moa tïïc Jeröbämmi, ki luum teek mare, ki luum lenye moa këële, ki luum dwøk thäk ŋøøp Damacka ka Amath, na kwøŋ bëëdö tiet nyec Juuda ki Icriel, ogöör piny yi Wëël Luup Nyec Icriel.

²⁹ 'Ba Jeröbäm athøw ni läp køør kwäcge ma nyec Icriel, ni ö wääde ma Dhekaraya ni läw kar gø na nyeya.