2 Nyeye 13 - Wëël Jwøk

Luum Jeyöakac Nyeny Icriel

¹ 'Ba kanya tïme na ri cwiiri ma pïërariiø kurdäk moa beet Jöaci wär Akadhiya ni ena nyeny Juuda, Jeyöakac wär Jiyu atïmö na nyeny Icriel Cameria, ni bëëde ni ena nyeya ki cwiiri apaar ka abïriiø.

² 'Ba ena bëëdö ni tïïya gïï mo nëëni ni reyø ki jï Wuuö Jwøk, ni bëëde ni caatha køør gïïa reyø na tïïc Jeröbämmi o Nebat na wëëk jø Icriel tïïc ki raay, ni bëëde ni tïï raay moøgø ba wiie.

³ Køøre Wuuö Jwøk awëër døc ki jø Icriel, ni cïp ge cer Adhaël nyeny Aram ki wääde ma Ben-Adat, nee wø böötge cooth cooth.

⁴ Køøre Jeyöakac Wuuö Jwøk akwaae, ni ö Wuuö Jwøki ni wïny kwac mare, kiper Wuuö Jwøk caannø mana ö nyeny Aram na caan jø Icriel ki gø ajoode.

⁵ Kanyøgø Wuuö Jwøk jø Icriel amooe ki ŋat mo piem geni; ni ö geni ni öge wøk ceŋ jø Aram, ni bëëtge yïth mïëri moge kaawat mana dïkwøŋ.

⁶ 'Ba geni raay moa tïïc jø dhi øt Jeröbämmi na wëëk jø Icriel tïïc ki raay, kärge wiiø; 'ba gena bëëdö ni ge caatha køør raay moøgø. Ni ö jaadha näk otieŋø na no ocaa ri jwøa cwøl na Acara thuwø ni put bëëtö no ocwöth piny Cameria.

⁷ 'Ba jø leny mo wø cäädhi ki bäät okwëënyi moa dööŋ jï Jeyöakac, kwäänge ba pöödhi ki kwään jiy ma pïërabïïc, ni kwään jïëth leny mo wø tut okwëënyi ba pöödhi ka apaar, ni kwään jø leny mo wø këëdi ki piny ba pöödhi ki kume apaar, kiper gena 'näk nyeny Arammi, ni nyør geni ni ŋethge kaamar tør.

⁸ 'Ba luum tïïe møga bëët moa tïïc Jeyöakaci, këël luum teek mare, ogöör piny yi Wëël Luup Nyec Icriel.

⁹ 'Ba Jeyöakac athøw, ni läp køør kwäcge, ni koony eni Cameria; ni ö wääde ma Jeyöac ni läw kar gø na nyeya.

Luum Jöac Nyeny Icriel

¹⁰ 'Ba kanya tïme na ri cwiiri ma pïëradäk ka abïriiø moa beet Jöaci ni ena nyeny Juuda, Jeyöac wär Jeyöakac atïmö na nyeny Icriel Cameria, ni bëëde ni ena nyeya ki cwiiri apaar ka abïciel.

¹¹ 'Ba ena bëëdö ni tïïya gïï mo nëëni ni reyø ki jï Wuuö Jwøk, ni bëëde ni raay bëët moa tïïc Jeröbämmi o Nebat, na wëëk jø Icriel tïïc ki raay, ba wiie, ni bëëde ni caatha køør raay moøgø.

¹² 'Ba luum tïïe møga bëët moa tïïc Jeyöaci, ki luum teek mare mana këëde ka Amaciya nyeny Juuda ki gø, ogöör piny yi Wëël Luup Nyec Icriel.

¹³ 'Ba Jeyöac athøw ni läp køør kwäcge, ni koonyi Cameria buut nyec Icriel, ni ö wääde ma Jeröbäm ni läw kar gø na nyeya.

¹⁴ 'Ba kanya tïm Ilaaca ni tuu ki täw mana put thøø ki gø, Jeyöac nyeny Icriel aløøc piny baŋe kuna liim gø, ni jwöŋe bäät gø ni kööe, na «Awuuö, Awuuö, bee ï ni wø piem jø Icriel kaamar jïëth leny mo wø tut okwëënyi, ki jø leny mo wø këëdi ki bäät okwëënyi!»

¹⁵ 'Ba Ilaaca aköö jïre, ni «Kwany atum ka athëëre.» Kanyøgø, eni atum ka athëëre akwanye.

¹⁶ Køøre Ilaaca aköö jïre, ni «Teel atum.» Ni teel gø. Køøre Ilaaca ceŋŋe acïp bäät ceŋ nyeya.

¹⁷ Ni kööe, ni «Jap dha awëërnyeŋ mana en jï løø kur tuul-cäŋ.» Ni jap gø. Køøre Ilaaca aköö, ni «Thööthï!» Ni put thööthö. Ni ö Ilaaca ni kööe, na «Atheerø manøgø nyootha gø ni jø Aram moa en ya Apëk böötï böötö ki teek Wuuö Jwøk këël mano dïïrï wïthge.»

¹⁸ Køøre Ilaaca aköö, ni «Cäŋ athëëre kwanynyø.» Ni kwany ge. Ni kö Ilaaca jïre, ni «Cööp piny.» Ni cööp gø kwöre adäk ni put gø wec.

¹⁹ Kanyøgø, nyikuŋ Jwøk ma Ilaaca aput wëër ki eni, ni kööe, ni «Ïïni, piny doo na iï cööbö kwöre abïïc wala abïciel; køøre nø, jø Aram diï nääö këël kanya diï wïthge dïïrö yie. 'Ba ennø, jø Aram 'nägï nääö kwöre adäk keerge.»

Luum Thøw Ilaaca

²⁰ Køøre Ilaaca athøw, ni koonyi. 'Ba kar kaaca, dïtwïëte mo jø Möap ge wø ööa yi ŋööm Icriel baŋ twëër ki yi cwiir cooth.

²¹ 'Ba dïcäŋ aciel ni jø Icriel kunyö ki dhaanhø, dïtwïëte ajootge, ni putge dëër dhaanhø kïth yi bwörö mar Ilaaca. 'Ba kanya ö ŋata näk othøw na gut cuu mo Ilaaca, ena put kwøw ni put cuŋŋö ki tiete.

Luum Lenye Moa Këël Jø Icrielli Ki Jø Aram

²² 'Ba Adhaël nyeny Aram bëëdö ni jø Icriel ee caarø ki yïth nïne bëët moa beet Jeyöakaci ni ena nyeya.

²³ 'Ba Wuuö Jwøk met ec ki bäth ec mare anyoodhe jï jø Icriel, ni løø cwïnye baŋge, kiper luumma näk ee tuudö ki Eeberam ki Aydhak ki Jeekap, ni eni ba many man raany jø Icriel, wala ki man riem ge buute, këël dïcäŋi en.

²⁴ 'Ba kanya ö Adhaëlli nyeny Aram na thøøe, wääde ma Ben-Adat aläw kar gø na nyeya.

²⁵ Køøre Jeyöac wär Jeyöakac päänye moa käl cer wänni ma Jeyöakac, na käl Adhaëlli ri leny, acäŋ lwørrø cer Ben-Adat wär Adhaël. Ni ö Ben-Adati ni bööti ya Jeyöaci kwöre adäk, ni ö Jeyöaci ni cäŋ päänye mo jø Icriel dwøk karge.