2 Nyeye 10 - Wëël Jwøk

Kanya Ö Jiyu Na 'Näk Jø Tuuŋ Akap

¹ 'Ba kar kanyøgø da jiy ma pïërabïriiø mo käla dëër Akap mo ge bëëdö Cameria. 'Ba Jiyu agöödö ki weeli ni jääŋ ge Cameria baŋ dïbwöthe mo Jedhriel, ki jø døøŋŋø, ki jiy mo wø piith jiy moa käl dëër Akap, ni kööe,

² ni «Ennø, kanyo pïïc wëëlö man baŋu, gøøc ni jiy moa käl dëër nyeya maru ena baŋu, ni jïïu da jïëth leny mo wø tut okwëënyi, ko okwëënyi, ki pääny mana näk ogeerø ni teek, ki jap leny,

³ wäru jëëtu ki dhaanhø aciel mo beer mo orømø røk jiy moa käl dëër nyeya maru, ni cïbu gø bäät wälu, ni këëdu kiper dhi øt nyeya maru.»

⁴ 'Ba jøøgø gena lwäyö døc ni köge, ni «?Ka adïëri møn, ŋat mo kär løny jï nyeye moa na ariiø, ni beege Jöram nyeny Icriel ka Akadhiya nyeny Juuda, olønye jïwa nidïï?»

⁵ Køøre ŋata bëën paan dwøŋ, ki ŋata bëën pääny, ki jø døøŋŋø, ki jiy mo wø piith jøøa käl dëër nyeya, gena jääk baŋ Jiyu ki dwøl ni köge, ni «Waani waana jiy moï, ni gïïo caanï jïwa bëët tïïcwa tïïö; 'ba waani bäŋ dhaanhø mo røønywa na nyeya. Beerra man tïïyï mana manynyï jaak.»

⁶ Køøre Jiyu acäŋ göödö ki wëëlö ni kööe, ni «Ni näk mou ena kura, ni dwøra wïnynyu wïnynyö, uuni jiy moa käl dëër nyeya maru, ŋulu wïthge wøk ni ööu baŋa ki ge yi Jedhriel diøø kar kany nø.» 'Ba jøøgø na pïërabïriiø na käl dëër nyeya yøø, ge bëëdö buut jøøa døøŋŋø na bëën pääny, na piith geni.

⁷ 'Ba kanya pïïc wëëlö manøgø baŋge, geni jøøgø na pïërabïriiø na käl dëër nyeya yøø aputge lwør ni 'näkge ge, ni kïthge wïthge yïth gupe, ni jääŋge ge Jedhriel baŋ Jiyu.

⁸ 'Ba acaan jï Jiyu ni købi, ni «Geni wïth jøøa käl dëër nyeya anø kälge.» Ni kö Jiyu, ni «Lööru geni kanya ciel dhi kiir na athwöe ariiø, nee bëëtge kaace këël amöölla.»

⁹ 'Ba kanya tïme na amöölla, ena ö wøk ni cuŋŋe nyïm jiy bëët ni kööe, ni «Uuni, u tøør yi thøø man. Ka adïëri møn, beeye aani na gëëmö ki nyeya mara ma Jöram ni nääa gø. ?'Ba jøøi ii bëët onäga ŋa?

¹⁰ 'Ba beerra man putu gø ŋäc ni luum Wuuö Jwøk mana caane kiper jø dhi øt Akap ba maayi, kiper Wuuö Jwøk gïna näk ee nø caan ki dhi dhaanhnhe ma Ilaaja atïïe.»

¹¹ Kanyøgø Jiyu jø dhi øt Akap bëët moa no odööŋ na en Jedhriel ki jøøa døøŋŋø moe, ki jøøa näk eno ŋïyö ki geni, ki dïlämme moe, aput näk ge bëët, ni bäŋ dhaanhø aciel mo ee wiiø jïgø ni kwøw.

¹² Køøre Jiyu aö maal ni aae ni cøøa Cameria. 'Ba kanya cäädhe waŋjöö, na pïïe Bëëth-Ikid, kany wø røøm dïkwääc dïëki yie,

¹³ ena røømmø ki jø tuuŋ Akadhiya nyeny Juuda ni pëëny geni, ni «?Uuna jøøe?» Ni dwøkge gø, ni «Waana jø tuuŋ Akadhiya. Wa løøya piny kiper nee jööt dëël mar wäät nyeya ma Jöram ki jööt dëël mar wäät gwanynyø ma Jedhebel nee neenwa.»

¹⁴ Kanyøgø Jiyu aput köö jï jiye, ni «Magu geni.» Køøre jøøgø aputge mak ni 'näkge ge bäät buur mana en Bëëth-Ikid. 'Ba kwään jøøgø beege jiy ma pïëraŋween kurriiø; ni bäŋe gø mo ee wiiø dëëtge.

¹⁵ 'Ba kanya nø tïŋ Jiyu kaace, ena røømmø ki Jönadap o Rëkap, ni Jönadap ööa kuna jøl eni. Ni ö Jiyu ni määth gø ni kööe jï gø, ni «?Ïïni cwïnyï aciel ki cwïnya kaawat man bëët cwïnya na aciel ki cwïnyï en?» Ni løgi ya Jönadapi, ni «Yaa, beeye kare.» Ni köö Jiyu, «Ni näk cwïnyï aciel ki cwïnya, rwää cerï baŋa.» Ni ö Jönadapi ni put cere rwaak baŋ gø, ni ö Jiyu ni put gø käl baŋe yi jääy man wø tut okweenynyi.

¹⁶ Ni kö Jiyu, ni «Øøni ø aay na aciel nee gïno tïïa ki cwïnya bäre kiper Wuuö Jwøk nee neenï.» Køøre ena put aay ki eni na aciel ki yi jääy mare man wø tut okweenynyi.

¹⁷ 'Ba kanya pïïe Cameria, jø dhi øt Akap bëët moa no odööŋ na en Cameria aput näk, këël mana dïïr wï Akap bäre, ki køør dwør Wuuö Jwøk mana caane ki dhi nyikuŋ Jwøk ma Ilaaja.

Kanya Ö Jiyu Na 'Näk Jø Wø Tïny Baal

¹⁸ Køøre Jiyu jiy bëët acooŋ kanya ciel ni kööe jïge, na «Akap jwøa cwøl ni Baal atïnynye mëëth, 'ba aani Baal tïnynya tïnynyö døc ni kaala mar Akap.

¹⁹ 'Ba ennø, cwøllu nyïïkuk Baal ge bëët, ki jø wø tïny eni bëët, ki dïlämme moe bëët, ni bäŋ dhaanhø mo kääŋi, kiper aani jïra da olämi mo dwøŋ mo cïba cïbö jï Baal; ni ŋato kääŋi ba kwøw.» 'Ba Jiyu gïnögø tïïe ni mare cwøk, kiper nee jø wø tïny Baal nääe.

²⁰ Ni kö Jiyu, ni «Cwötu ka acooŋa mo ena kur keere kiper Baal.» Ni ö geni ni gøøge awaaci piny.

²¹ Kanyøgø Jiyu ajääk dï Icriel bäre, ni ö jø wø tïny Baal bëët ni putge öö, ni bäŋ dhaanhø aciel mo odööŋ ni kär öö. 'Ba kanya dønyge yi øt lam mar Baal, yi øtø aput pääŋö ki mana täge ki deŋ øtø man këël mana këët deŋŋe maya.

²² Køøre Jiyu aköö jï ŋat wø koor kar kän mar abïïk lam, ni «Kän wøk ka abïïe jï jiy mo wø tïny Baal bëët.» Ni ö ŋatøgø ni kän wøk ka abïïe jïge.

²³ Køøre Jiyu adøny yi øt Baal ge ki Jönadap o Rëkap, ni kööe jï jø wø tïny Baal, ni «Rääŋu døc, ni manynyu dëëtu, ki man näk mo bäŋ jic Wuuö Jwøk mo ena dëëtu kany, 'ba beeye uuni ni wø tïny Baal keeru na en kany.»

²⁴ Kanyøgø gena tägö ki man cïpge ko olämme mo wø waaŋ bäre ko olämme møga. 'Ba Jiyu da jiy ma pïërabära mo ee nø cïp wøk ni nø caan gø jïge, ni «Ŋat wäro wec dhaanhø røk jøøi ni cïba ceŋŋu ii nee bødhe ki thøø, eni di nääö na kar ŋatøca.»

²⁵ 'Ba kanya tïme ni Jiyu løny ennø ki cïp olämme mo wø waaŋ bäre, ena köö jï jø koor moe ki jï jø leny moe moa teek, ni «Dønynyu yi øtø, ni 'nägu geni; kär dee gø mo weyu nee duny wøk.» Kanyøgø jø koor ki jø leny moøgø jøøa tïny Baal aputge 'näk ko opëëllö, ni leeŋge dëëtge wøk, ni putge pööth thääŋ øt Baal mana en kuya.

²⁶ Ni kälge jenni wøk moa no ocwöth piny yi øt Baal na gïï lam, ni waaŋge ge.

²⁷ Køøre thuwø, gïna no otieŋø na no ocaa ri Baal atøcge, ni nyaage øt Baal piny, ni putge kar gø tïïc na øt laac këël dïcäŋi en.

²⁸ 'Ba manøgø beeye jöö mana ö Jiyu na raany lam mar Baal ki gø dï Icriel.

²⁹ 'Ba Jiyu raay moa tïïc Jeröbämmi o Nebat na wëëk jø Icriel tïïc ki raay käre wiiø, ni beeye mana bëëde ni jiy lama nyïïrøøe moa no otïïö ki warkey na en Bëthël ki Daan.

³⁰ 'Ba Wuuö Jwøk aköö jï Jiyu, ni «Kiper mana nø tïïyï gïn mo nëëni ni beer ki jïra, ni tïïyï mana manynya ki cwïnya dëët jø dhi øt Akap, jiy moo käl dëërï, ki mano täge ki wäädï këël mano pïïe ri nyikwaar nyikwaarï, ge pïïa piny bäät wälu mar jø Icriel.»

³¹ 'Ba Jiyu wïïe käre koorø døc ki man cäädhe ki cwïnye bäre køør ciik mo Wuuö Jwøk Jwø Icriel; eni raay moa tïïc Jeröbämmi na wëëk jø Icriel tïïc ki raay, käre wiiø.

Luum Thøw Jiyu

³² 'Ba ki yïth nïröka beeye kanya täk Wuuö Jwøki ki man ŋun wøk ki thäk ŋøøm dëër Icriel. Ni ö Adhaëlli nyeny Aram ni bööt jø Icriel dï ŋööm Icriel bäre,

³³ mana en jï løø kur tuul-cäŋ ki Naam Jördan, ni beeye ŋööm Gelät bäre, man wø bëët jø tuuŋ Gaati yie, ki jø tuuŋ Ruben, ki jø tuuŋ Maneeca. 'Ba ŋøøpøgø tägi ka Aröör, paana en bäät waaŋ Naam Arnön, ni rwöpa ŋööm Gelät ki ŋööm Baacan bäre.

³⁴ 'Ba luum tïïe møga moa tïïc Jiyu bëët, këël luum teek mare, ogöör piny yi Wëël Luup Nyec Icriel.

³⁵ 'Ba Jiyu athøw ni läp køør kwäcge, ni koony eni Cameria. Ni ö wääde ma Jeyöakac ni läw kar gø na nyeya.

³⁶ 'Ba cwiiri moa beet Jiyu ni ena nyeya bäät jø Icriel yi Cameria beege cwiiri ma pïërariiø ka abära.