2 Luup Nyeye 8 - Wëël Jwøk

Luum Jammi Møøk Moa Tïïc Cølömanni

¹ 'Ba cwiiri moa thöör Cølömanni kanya bëëde ni gëëdö ki Øt Wuuö Jwøk ki øtø mare beege cwiiri ma pïërariiø.

² 'Ba na tïme na aŋuun cwiiri moøgø, päänye moa cïp Kirammi jïre acäŋ geerrø ni wëëk jø Icriel bëëtö yïthge.

³ Køøre Cølöman aci Amath-Jöba ni mac gø;

⁴ ni geer kanya cwøl ni Tatmör dï paap Amath ki päänye bëët moa näk yïthge da uut kän na en Amath.

⁵ 'Ba eni Bëëth-Örön mana en maal ki mana en piny ageere thuwø; ni tïïc kiiri ki dhøk kiiri mo päänye moøgøøni ni teek døc, këël ki dïdëëdi mo odhuule moge.

⁶ 'Ba Cølöman päänya cwøl ni Baalath ageere thuwø, ki päänye moe bëët mo cuŋ yïthge ki caammi, ki päänye mo bëët jïëth leny moe yïthge mo wø tut okwëënyi, ki päänye mo bëët jø okwëënyi moe yïthge, ki gïïa manynye bëët nee geere yi Jerucalem, ki yi Libaanø, ki yi ŋöömö mana en tiere bäre.

⁷ 'Ba jiy bëët moa näk patha jø Icriel na bøth ki thøø røk jø Këth, ki røk jø Amör, ki røk jø Përec, ki røk jø Ëwi, ki røk jø Jeebuc,

⁸ na näk kär raany jø Icrielli, nyïïkwaacge moa dööŋ amak Cølömanni ki teek kiper tïïc, këël man bëëde dïcäŋi en.

⁹ 'Ba Cølöman bäŋ jiy mo ee tïïö na laaŋe ki røk jø Icriel kiper tïïc mare. 'Ba jø Icriel atïïe na jø leny, na kwääc lwaae moe mo leny, na kwääc lwaae mo jïëth leny moe mo wø tut okwëënyi, ki jø wø këëdi ki bäät okwëënyi.

¹⁰ 'Ba da jø Icriel møøk mo ocuumö na jø wø käär tïïe mo Cølöman mo kwäänge dïpe ariiø ki pïërabïïc, mo ocïïmmö bäät jiy na mo käär jiy.

¹¹ Køøre Cølöman, nyi Peerø akäl wøk ki yi Pääny Deebit ni kïth gø yi øda geere kiper gø; kiper ena köö, ni «Cïïa ba bëëdö këët yi øt Deebit nyeny Icriel, kiper kwöra cïp acanduk yïthge beege kwör mo ena kur keerge na mo Jwøk.»

¹² 'Ba Cølöman acïpö ko olämme mo wø waaŋ bäre jï Wuuö Jwøk bäät gïn wø cïp olämme bääte mar Wuuö Jwøk, ni beeye mana tïïe nyïm agööl Øt Jwøk.

¹³ 'Ba olämme moøgøøni na cïpi ya Cølömanni, tïïe ka køør ciik Modhe moa näk ocïp piny kiper yi cïp olämme mo wø cïp ki yi cäŋ cooth, ki yïth cääŋŋe mo jwöm, ki kany wø päär dwääyi, ki kwör ajwöm moa na adäk mo wø wøør ki yi cwiir cooth, ni beege Ajwöm Møga Näk Ree Bäŋ Thømmø, ka Ajwöm Caammi Mo Wø Kwøŋ Ciek, ka Ajwöma Man Wø Wøør Ki Yïth Abïle.

¹⁴ 'Ba Cølöman ki køør ciik mo wänni ma Deebit, dïlämme acïïmme na dhøgi bäät tïïe moge; ni cïïm jø tuuŋ Libay na dhøgi kiper tïï dwøk pwøc ki køny dïlämme ki tïïc ki køør ciik moa näk ocïp piny kiper yi cäŋ cooth; ni cïïm jø koor dhøk kal na dhøgi bäät dhøk kal bëët, ki køør mana caan Deebiti na näk dhaanh Jwøk.

¹⁵ 'Ba geni bäŋ gïn mo ege gwäyö røk ciik nyeya moa caane kiper dïlämme ki jø tuuŋ Libay, këël nyi gïn mo thiinh, wala gïn mo guta uut kän.

¹⁶ 'Ba tïïe mo Cølöman bëët acäädhö ni beer ki mana täge ki kanya cak tier Øt Wuuö Jwøk ki geer këël mana thöör øtø bäre. Kanyøgønø, Øt Wuuö Jwøk athum bäre ki tïïc.

¹⁷ Køøre Cølöman aci Edhiyön-Gabir ki Ëlath, mïëya en bäät Naama Kwaar ŋööm Ëdöm.

¹⁸ 'Ba Kiram ena jääk baŋ Cølöman ki baabuure ki ceŋ jiy moe, ki jiy mo da gïn mo ŋäcge kiper bëët naam. Kanyøgø jøøgøøni ki jic Cølöman gena ci kanya cwøl ni Öpïr kuna määnyge ki warkey, ni jïtge ki warkey mo rumme ma kikarri ma dïpe aŋween ki pïërabïïc, ni kälge gø jï nyeya ma Cølöman.