2 Luup Nyeye 6 - Wëël Jwøk

Kanya Ö Cølömanni Na Cään Lwaak

¹ Kanyøgø Cølöman aköö, ni «Wuuö Jwøk anø köö ni eni bëëdö yi pöölö mo odhïŋ.

² 'Ba ennø, ï na Wuuö Jwøk, aana gëëdö ki øda ajiem jïrï na kar bëëtö marï na bäre bäre.»

³ 'Ba kanya bëëde ni lwaa Icriel bäre cuŋŋö kaagø, nyeya ma Cølöman nyïme aløø baŋge ni gwïëth geni bëët.

⁴ Ni kööe, ni «Pwøc en jï Wuuö Jwøk, Jwø Icriel, na cäänö ki dhee jï wära ma Deebit, ni put gïna caane wëëk thur kare, ni kööe,

⁵ ni ‹Ki mana täge ki dïcäŋ mana käla jiya ma jø Icriel wøk ki yi ŋööm Ijep, aani bäŋ pääny mo yaa jierø ki røk päänye mo wïth tuŋi mo jø Icriel bëët naa gëënni yie ki øtø nee nyeŋŋa cwøl ree; ni bäŋ dhaanhø mo yaa jierø nee tïme na dïbwödhi mar jiya ma jø Icriel.

⁶ 'Ba Jerucalem yaa nø jier nee nyeŋŋa bëëde yie, ni jiera Deebit nee bëëde na wïth jiya ma jø Icriel.›

⁷ «'Ba wära ma Deebit gïnögø nut cwïnye cøøn ki man gëëde ki øtø kiper nyeŋ Wuuö Jwøk, Jwø Icriel.

⁸ 'Ba Wuuö Jwøk aköö jï wära ma Deebit, ni ‹Kiper mana bëët cwïnyï ni manynya man gëëde ki øtø kiper nyeŋŋa, beeye gïn mo beer na caarï ki cwïnyï.

⁹ 'Ba paa ïïni noo geer øtø manøgø; 'ba beeye wäädï mano nywølï noo geer gø kiper nyeŋŋa.›

¹⁰ «'Ba ennø, Wuuö Jwøk luubö mare mana caane anø wëëk thur kare; kiper aana nø ci kar wära ma Deebit ni pïïa bäät wälu mar jø Icriel, kaawat mana caani ya Wuuö Jwøki, ni nø gëëda ki øtø kiper nyeŋ Wuuö Jwøk, Jwø Icriel,

¹¹ ni nø cïba acanduk kaace, ni beeye acanduk mana en luumma tuut Wuuö Jwøki ki jiy yie, ni beeye luumma tuude ki jø Icriel.»

Lam Mar Cølöman

¹² Kanyøgø, Cølöman acuŋŋö nyïm gïn wø cïp olämme bääte mar Wuuö Jwøk, ni thaaŋ ceŋŋe maal nyïm lwaa Icriel bäre.

¹³ 'Ba eno nø tïïö ki thudhi mo tïïc ka nywïënyö ma jwïël, mo bär mare beeye gööye abïïc, ni dööŋ yie beeye gööye abïïc, ni bär mare mar maal beeye gööye adäk, ni ee tïï dï kal. 'Ba ena cuŋŋö bäät gø, ni put cøŋŋe këël piny yie nyïm acooŋ jø Icriel bäre ni thaaŋ ceŋŋe maal.

¹⁴ Ni läme ni kööe, «Wui Wuuö Jwøk, Jwø Icriel, bäŋ Jwøk mo caala ïïni maalø wala bäät piny, mo luumma tuude ki jiy ee gwøø, ni nyooth mëër mare ni wø ba jøøl jï jiye mo wø tïïö ka adïëri nyïme ki cwïnyge bäre.

¹⁵ Ïïni, luumma caanï jï dhaanhnhï ma wära ma Deebit agwøgï, ni beeye mana caanï ki dhiï na wëëgï thur kare, kaawat man bëëde dïcäŋi en.

¹⁶ 'Ba ennø, wui Wuuö Jwøk, Jwø Icriel, luumma caanï jï dhaanhnhï ma wära ma Deebit put gwøk, na kööï, ni ‹Ni näk mo jiy moo käl dëërï wïthge koorge koorø ki bëëtö marge, ni bëëtge ni ge cäädhi ka køør ciik 'moa kaawat mana tïïyï, ï ba can ki dhaanhø mo pï piny bäät wälu mar jø Icriel.›

¹⁷ 'Ba ennø, wui Wuuö Jwøk, Jwø Icriel, beerra man ö luummï mana caanï jï dhaanhnhï ma wära ma Deebit ni wëëgï gø thur kare.

¹⁸ «?Aŋø, Jwøk bëëdö ki jiy bäät piny møn? Ka adïëri møn, ï na Jwøk, maal këël maal kuya kunece ï ba røm yie. ?A øtø man ni yaa geerø en, ïïno rømï yie nidïï?

¹⁹ Wui Wuuö Jwøk, ï na Jwøk mara, wïny lam mara, a na dhaanhnhï en, ni cegï ïthï ki kwac mara ki lam mara man kwaa ïïni ki gø en.

²⁰ Beerra man raŋŋï Øt Jwøk man ki waŋcäŋ ki wäär, øda kööï ni nyeŋŋï doo wøørø yie, kiper nee lam mara wïnynyï kany wø läma, a na dhaanhnhï en, ni nyïma yaa luu Øt Jwøk kany.

²¹ Beerra man wïnynyï kwac mara, a na dhaanhnhï, ki kwac mar jiyï ma jø Icriel, kany wø lämge ni nyïmge ege luu Øt Jwøk kany. Beerra man wïnynyï gø kany wø bëëdï yie maalø; beerra man wïnynyï gø møn ni wëënnï waani.

²² «'Ba ni näk mo dhaanhø obääyö dëër ŋat atut mare, ni tïïi nee kööŋe, ni ööe ni kööŋe nyïm gïn wø cïp olämme bääte marï yi Øt Jwøk man,

²³ beerra man wïnynyï gø ki maal ni ŋølï mar jiyï, ni jäälï ŋata mare raac, ni dwøgï gïna raac wïïe keere na tïïe, ni ŋunnï ŋata mare beer, ni duunnï jïre ki køør mare na beer.

²⁴ «'Ba kanyo näk mo jiyï ma jø Icriel bööt nyïïmänni böötö, kiper mana tïïge ki raay dëërï, ni cäŋge duu baŋï ni cøørge nyeŋŋï, ni lämge ni kwacge ïïni yi øtø man,

²⁵ beerra man wïnynyï gø maal, ni wëënnï raay mo jiyï ma jø Icriel, ni duuï ge yi ŋöömma cïpï jïge ki kwäcge.

²⁶ «'Ba kany wø näk mo maal ocuŋŋö, ni tïme ni bäŋ køth, kiper mana tïï jiyï ki raay dëërï, ni lämge ni nyïmge ege luu Øt Jwøk kany, ni cøørge nyeŋŋï, ni løkge rege ni wecge raay moge kanyo caannï geni,

²⁷ beerra man wïnynyï gø maal, ni wëënnï raay mo jiyï ma jø Icriel, ni pwönynyï geni ki jöö mana beer man cääthge ki gø, ni jääŋŋï køth bäät ŋøøm moï moa cïpï jï jiyï na mo dööŋ jïge na moge.

²⁸ «'Ba ni näk mo da käc paac, wala täw mo leth, wala twöŋi mo raanynya beel, wala bäänyö, wala adïtwie, wala ni näk ge ciel nyïïmänni ciel dïër yïth päänye moge; këël ööa gïï mo leth ki täwe mo nyïëdi cøøn,

²⁹ ni näk mo dhaanhø aciel wala jiyï ma jø Icriel bëët lämö ni kwacge ïïni, ni ŋati man nø gïna leth na tägö dëëre ŋääe ki cwïnye, ni thaaŋ ceŋŋe jï kuna en Øt Jwøki man yie,

³⁰ beerra man wïnynyï gø kany wø bëëdï yie maalø, ni wëënnï ŋati man nø ni cunnï gø ki køør moa tïïe bëët, ni beege jøøa cwïnyge ŋäyï, kiper bee ï keerï ni ŋäc cwïny jiy bëët,

³¹ nee ge lwäcge ki ïïni, ni cääthge ki jöörï ki yïth nïne bëët moo beetge yïth ŋøøm moa cïpï jï kwäcwa.

³² «Këël jur thuwø mo ba käl røk jiyï ma jø Icriel, kany wø ööe ki paac mo bäär kiper mano wïny dööŋö mar nyeŋŋï ki teek badï, ni ööe ni läme ni nyïme ee luu Øt Jwøk kany,

³³ beerra man wïnynyï gø kany wø bëëdï yie maalø, ni tïïyï gø ki køør gïïa pëënynye bëët, nee nyeŋŋï ŋäc jø bäät pinynyi bëët, niï lwäärge kaawat man wø tïïc jiyï ma jø Icriel, nee ŋäcge møn ni øtø man ni yaa geerø en cwøla ri nyeŋŋï.

³⁴ «'Ba kany wø ö jiyï wø cige baŋ leny baŋ nyïïmän moge, ni këël ge jääŋŋï ka waŋjööra ŋø cøøn, ni lämge jïrï ni nyïmge ege luu yi pääny man na näk iï jierø ki øtø mana näk yaa geerø kiper nyeŋŋï,

³⁵ beerra man wïnynyï lam marge maal ki kwac marge, ni kønyï geni.

³⁶ «'Ba kany wø bääcge dëërï, kiper mana näk mo bäŋ dhaanhø cøøn mo ba bääyi, ni wëërï ki geni ni cïbï geni ceŋ nyïïmän, ni ö geni ni magi ya nyïïmänni ki tøŋ, ni kïthge geni yïth ŋøøpge, kany mo bäär wala kany mo cään,

³⁷ ni näk mo ge cätö ni løkge cwïnyge yi ŋöömö mana kïth ge yie ni ge mak ka tøŋ, ni kwacge ïïni yi ŋööm jøøa mak geni ki tøŋ, ni köge, ni ‹Waana bääyö, ni nø tïïwa ki gïï mo reyø døc;›

³⁸ ni näk mo ge duua baŋï ki cwïnyge bäre ka acaacge bäre ki kanya kïth geni yie yïth ŋøøp nyïïmän moge na mak geni ki tøŋ, ni lämge jïrï ni nyïmge ege luu yi ŋöömö marge na cïpï jï kwäcge, ki pääny mana jierï, ki øtø mana geera kiper nyeŋŋï,

³⁹ beerra man wïnynyï lam marge ki kwac marge kany wø bëëdï yie maalø, ni kønyï geni, ni wëënnï jiyï moa no obääyö dëërï.

⁴⁰ «'Ba ennø, ï na Jwøk mara, a kwaya ïïni, beerra man räŋŋï ni cegï ïthï ki lam man wø lam kany.»

⁴¹ «'Ba ennø, wui Wuuö Jwøk, ö maal, ni ööï kar bëëtö marï, ïïni ka acanduk man wø nyooth teek marï. Wui Wuuö Jwøk, beerra man ö dïlämme moï ni røøge bëënynyö dëëtge, ni ö jiyï mo wø cwïnyge en køørï ni mïn yïthge ki beenynyï.

⁴² Wui Wuuö Jwøk, kär täärnyïmï kanï ki aani na røønyï, ni parï wïïï ki mëër marï ni wø ba jøøl na nyoothï jï dhaanhnhï ma Deebit.»