2 Luup Nyeye 12 - Wëël Jwøk

Kanya Ö Cicak Nyeny Ijep Na Tuk Juuda

¹ 'Ba kanya nø ö Reeyöbömmi ni këël tier buc nyec mare piny ni teek, eni ki jø Icriel bëët ciik Wuuö Jwøk awecge.

² 'Ba kiper mana wecge Wuuö Jwøk, kanya tïme na ri bïï cwiiri moa beet nyeya ma Reeyöbömmi ni ena nyeya, Cicak nyeny Ijep aöö ni këëde ki jø Jerucalem,

³ ni ööe ki jïëth leny ma kuma ki dïpe ariiø mo wø tuut okwëënyi, ki cwøw leny ma kume ma pïërabïciel mo këëdi ka bäät okwëënyi. 'Ba jø leny moa öö ki eni ki Ijep ba løny ki kwaan, ni jø leny moøgøøni beege jø Libya, ki jø Cuka, ki jø Kuuc.

⁴ Ni mak päänye mo Juuda moa no ogeerø ni teek, ni ööe këël mana pïïe buut Jerucalem.

⁵ 'Ba nyikuŋ Jwøk ma Cemaya aö baŋ Reeyöböm ki kwääri mo Juuda moa näk rege ege cooŋ yi Jerucalem ni ge lwäära Cicak, ni kööe jïge, ni «Mana caan Wuuö Jwøki beeye en, ena köö, ni ‹Kiper mana weyu aani, aani thuwø, uuna wiia cer Cicak.› »

⁶ Køøre kwääri mo jø Icriel ki nyeya dëëtge aputge dwøk piny ni köge, ni «Wuuö Jwøk mare beeye adïëri.»

⁷ 'Ba kanya ö Wuuö Jwøki na neen gø ni rege ege dwøk piny, dwøre acäŋ ö bäät Cemaya ni kööe, ni «Kiper mana nø dwøkge dëëtge piny, ge ba raanynya këët. 'Ba ki kany mo cään køny mara nyoodha nyoodhø jïge, ni ö wëërri mara ni ba kïtha gø bäät Jerucalem këët ki ri Cicak.

⁸ 'Ba ge tïmö ni gena laaŋe jï Cicak, nee kwänyge ki man ŋäcge apääk mana en yïthakic man tïnyge aani ki man tïnyge nyeye mo bäät piny.»

⁹ Kanyøgø Cicak nyeny Ijep aöö ni tuk Jerucalem, ni twier jammi moa no okanø yi øt kän jammi mo Øt Wuuö Jwøk ki moa no okanø yi øt kän jammi mo øt nyec, ni käl jammi bëët. Këël kööt leny moa no otïïö ki warkey na tïïc Cølömanni akäle thuwø.

¹⁰ Køøre nyeya ma Reeyöböm atïïö ki kööt leny møøk mo tïïc ka nywïënyö ma jwïël na kar moøgø, ni cïp ge ceŋ kwääc jø koor mo wø koor dhi øt nyec.

¹¹ 'Ba kany wø ö nyeya wø døny yi Øt Wuuö Jwøk, ge wø cøø ki eni na aciel ni kööt leny moøgø käärge käärö, ni kany wø duuge wøk, duuge yi øt jø koor.

¹² 'Ba kiper mana ö Reeyöbömmi na dwøk ree piny, wëëc Wuuö Jwøk ree apaanye bääte, ni käri ya Wuuö Jwøki raanynyø na bäre këët. 'Ba da jammi møøk mo poot beyø thuwø yi ŋööm Juuda.

Aŋuun Luup Moa Caan Kiper Reeyöböm Ki Thøø Mare

¹³ 'Ba nyeya ma Reeyöböm tier nyec mare akëël piny ni teek yi Jerucalem, ni put bëëte na nyeya. 'Ba eni, kanya tïme na nyeya, cwiic dööŋö moe beege pïëraŋween kurciel, ni bëëde ki cwiiri apaar ka abïriiø ni ena nyeya Jerucalem, ni beeye päänya jier Wuuö Jwøki ki røk päänye bëët mo wïth tuŋi mo jø Icriel nee nyeŋŋe bëëde ni ŋäc yie. 'Ba Reeyöböm nyeŋ menni beeye Nayma nyi jø Amön.

¹⁴ 'Ba Reeyöböm abëëdö ni tïïya gïï mo reyø kiper mana näk cwïnye käre cïbö ki man many Wuuö Jwøk.

¹⁵ 'Ba jammi moa tïïc Reeyöbömmi ki mana täge këël aŋuunge ogöörö yïth luup mo nyikuŋ Jwøk ma Cemaya, ki yïth luup mo Idö, ŋata wara joot jammi ki køør man wø nyooth Jwøki jïre, ni beege luup moa no ogöörö kiper tier tuuŋ nyec marge. 'Ba Reeyöböm ki Jeröbäm ge bëëdö ni da leny yïthakicge cooth.

¹⁶ 'Ba Reeyöböm athøw ni läp køør kwäcge, ni koonyi yi Pääny Deebit. Ni ö wääde ma Abaaja ni läw kar gø na nyeya.