2 Körin 8 - Wëël Jwøk

Luum Cïp Jap Køny Ki Met Ec

¹ 'Ba nyïïmera, wa manynya man ŋäyu met yi Jwøk na nyooth yïth acook Jwøk mo Macedönia.

² Kiper këël na pääny geni ki gïna leth na pïï dëëtge, yïthge poot met døc ni cïpge ki jammi mo thööth ki bäth ec, këël na cange døc.

³ Kiper gena cïpö kaawat moa en ceŋge, ni ŋääa døøc, ni moa cïpge kaala moa dege cïbö, ni cïpge ka met ec marge keerge.

⁴ Ni kwaacge waani døøc, kiper nee ge jïtge ki kurge man kønyge can jø Jwøk ki gø.

⁵ Ni tïïcge gïnögø ni kaala mana ŋääthwa baŋge, kiper dëëtge akwøŋge wëëk Wuuö ki waani ki køør Jwøk na tïïc gïnögø cwïnyge.

⁶ Kiper manøgønø, Tayta aköömwa ki man thöör tïïögø thuwø dïïu ni en ri met ec enø, kaawat mana nø täk gø.

⁷ 'Ba kawaane kaawat man ŋäyu jammi bëët ennø, teeŋ ka ŋäädhe, ki cäänö, ki ŋäc luup, ni cwïnynyu you cïp ri tïïu, nou mëër ki waani, caarru wïthu nee tïïc man ni en ri met ec en, nee ŋäyu thuwø.

⁸ 'Ba manøgø ba caana naa cema uuni, 'ba a cäänö kaper gïïa tïïc jø møga ki cwïnyge bäre, kiper nee dëëtu nyoothu thuwø ni mëër maru adïëri.

⁹ Kiper met yi Kwääyø ma Jecu Krictø ŋäyu, ni eni këël na näk mo okwär, acännö kiperu, kiper nou kwärru ki køør canne.

¹⁰ 'Ba mana en cwïnya kiper luummi nø, a cäänna uuni, ni doo beerra eni jïïu ki man thöörru gïna tägu ki tïïc cwiina pöödhö, na näk beeye gïna manynyu ki cwïnynyu kiree.

¹¹ Kiper nee jïëy maru na laaru jïëy ki gø nee tïïyu nee thur kare nø ki køør moo en ceŋŋu kaawat mana kwøŋu gø caan.

¹² Kiper ni näk cwïny dhaanhø tar ki man cïpe, ojïëö kaawat mano nut cere, ni eni ba pëënynyi ki gïno tøør cere.

¹³ Naa ba caan gø ni jø møga kurge tïme ni jööt, ni tïm kuru ni teek.

¹⁴ 'Ba a caana gø, nee maru ki marge tïme ni röömi, ni kønynyu cange ki gïïö ni thööth ni en ceŋŋu ennø, nee cannu läwge køny ki gïïo thööth noo en ceŋge dïcäŋ aciel, ni tïm maru ki marge ni röömi.

¹⁵ Kaawat mana gööri, ni «Ŋata cuuŋö ki mo thööth, bäŋgø mo odööŋ wøk wïth moe, 'ba ŋata cooŋ mo nøk, bäŋgø mo orëëm wïth moe.»

Tayta Ki Jiy Ariiø Moa Jääŋŋi Körin

¹⁶ 'Ba pwøc en jï Jwøk, na løø cwïny Tayta baŋu ni mëëye ki uuni døc kaamara.

¹⁷ Kiper eni ba jïëc döötwa keere, 'ba eni ki dëëre cwïnye manynya gø døc ki man ö baŋu, ki met ec mare.

¹⁸ 'Ba cöögö mana nyeŋŋe lïëŋ dï acook Jwøk bëët kiper pwöc mare ki luumma nyään na met ni wø købe, ajääŋwa ki eni na aciel.

¹⁹ Ni patha manøgø keere, 'ba ena jier acook Jwøki thuwø nee wø cäädhe ki waani ri tïïc man ni en ri met ec ni poot tïïcwa en, kiper Wuuö nee jiem, nee tac cwïny marwa ŋäc thuwø.

²⁰ Ni gïnögø tïïcwa kaper nee bäŋe ŋat mo jääl waani kiper muuce moi ni thööth ii na cïp ki tac cwïny, ni tïïcwa en.

²¹ Kiper wa manynya gïn mo mïërö, ni patha ki waŋ Wuuö keere, 'ba këël ki jï jiy thuwø.

²² 'Ba cöögø, ŋata päärwa kwöre mo thööth, na jootwa ni cwïnye tar ki yïth jammi mo thööth, ajääŋwa ki geni na aciel. 'Ba kawaane cwïnye ee cïp køør tïïögø kiree, kiper u ee ŋäädhø døc.

²³ 'Ba Tayta beeye eni ni wø cäädhi ki aani, ni ena ŋat tïïc ki aani ri tïïc maru. 'Ba nyïïmëëe møga, ge jääŋŋa acook Jwøki, ni gena jø wø jiem Krictø ki køørge.

²⁴ Kiper manøgønø, nyoothu mëër maru jïge, nee tier atöör marwa kiperu nee ŋäc acook Jwøki.