2 Körin 2 - Wëël Jwøk

¹ Kiper wïïa acaara naa ba doo cäŋa lïïmmö baŋu këët ni cwïnya oränynyö.

² ?Kiper ni näk cwïnynyu yaa raanynyø, aŋa noo døøc cwïnya mo met, ni näk mo patha uuni na cwïnynyu kwøŋa raanynyø?

³ 'Ba wëëllöca agööra baŋu kiper nee dïcäŋa daa ö baŋu nee cwïnya ba raany jøøa doo døøc yia mo met, kiper u yaa ŋäädhö døc u bëët, ni met yia beeye met ec maru bëët.

⁴ Kiper aana göön baŋu ni yia oränynyö døc, naa kïmmö døc ki cwïnya, ni nyeŋŋa lïïö ki pïï. Ni mara a ba raany cwïnynyu, 'ba a wëëga uuni ŋäc mëër mara na päl kiperu.

Cäŋu Mëër Maru Dwøk Kare

⁵ 'Ba ni näk da ŋat mo okännö ki räny cwïny, paa cwïnya keere na raanynye, 'ba ki kwör møøk beeye cwïnynyø bëët na raanynye. 'Ba a ba many man cääna ki luup mo thööth kiper gø.

⁶ Kiper teeŋ dhaanhø ma enøgønø, ajäla mana kïth jøøa thööthi bääte, orømø.

⁷ Kiper manøgønø, eni dou wëënnö, ni cømmu cwïnye, kiper nee cwïnye ba pädhe no okadhø døc.

⁸ Kiper manøgønø, a kwaya uuni ki man cäŋu mëër maru dwøk kare ki eni.

⁹ Ni beeye na göönna baŋu naa päänynya uuni, nee ŋääa ki man näk luup bëët you leŋø.

¹⁰ 'Ba ŋato wäro wëënnu, wëënna wëënnö thuwø. Ni näk cwïnya yaa cïp piny ki gïrpiny, gïna cïba cwïnya piny ki gø, tïïa kaperu nyïm Krictø,

¹¹ kiper nee ø ba bööt Ceethanni. Kiper atade moe paa gïï mo kuuø.

Jammi Bëët Wø Dïïmwa Ka Nyeŋ Krictø

¹² 'Ba kanya cøøa Tarööa kuna køba luumma nyään na met mar Krictø, jööra atïmö ni ŋaam ki nyeŋ Wuuö.

¹³ 'Ba cwïnya kär pï piny, kiper na kära coka ma Tayta joodø kaace. Kiper manøgønø, aana tïŋŋö dïge ni pöötha Macedönia.

¹⁴ 'Ba pwøc en jï Jwøk, ni wø bwøth waani cooth ni dïïmwa jammi bëët ki nyeŋ Krictø, ni tïïc nyeŋ gø ni ŋäc yi piny bäre ki køørwa, ni caala gïn mo ŋwäänynye met.

¹⁵ Kiper wa caala gïï mo ŋwäänyge met mo Krictø ki nyïm Jwøk dï jø wø piem ki jø wø raanynyi.

¹⁶ Ki kur ciel ŋwänynyi na thøø na bäre bäre, 'ba ki kur ciel ŋwänynyi na kwøw na bäre bäre. ?Aŋa na doo rømø ki gïïögø?

¹⁷ Kiper wa ba caal jøø ni thööth yøø ni wø køp luum Jwøk kiper gwel. 'Ba waana jiy mo bäŋ atade cwïnywa, mo jiera Jwøki, ni wa cäänö ka nyeŋ Krictø nyïm Jwøk.