2 Körin 12 - Wëël Jwøk

Lääk Pøøl Ki Moa Tietge Nyooth Jïre

¹ 'Ba aani, a töödö nø, këël na bëëde ni bäŋ gïn mo joot dëër gø, 'ba aano pööth baŋ luup lääk ki gïïa nyooth Wuue jïra.

² Da ŋat mo ŋääa ni ena dëër Krictø mo ojudhö ni kïthi yi dää maal køør cwiiri ma apaar kurŋween mo opöödhö, 'ba nee eni ena ri dëël wala ba en ri dëël kuua. Ŋäya Jwøki.

³ Ŋääa ni ŋatøgø ajuth ni kïthi maal kany mo beer døc, 'ba nee ena ri dëël, wala ba en ri dëël kuua. Ŋäya Jwøki.

⁴ Eni gïï mo ba maar lønyø ki caan, mo ba beer jï dhaanhø ki man caan ge, awïnynye.

⁵ Ŋatøgø beeye noo tööda kipere. Aani, a bäŋ doo töödö kiper dëëra keera, 'ba beeye jäk mara keere noo tööda kipere.

⁶ 'Ba ni näk maa manynya man tööda, a ba doo tïmö ni aana bøøl, kiper a cara adïëri. 'Ba aani, dëëra amäna ki gø, kiper nee bäŋe ya ŋat mo caar aani ni kara dwøŋ ni kaala mo wø neene dëëra wala man wø wïnynye baŋa.

⁷ 'Ba kiper naa ba kanynya døc ni kaala kanynyø mana daa kanynyø ki gø kiper gïïa thööth na nyooth jïra, koodhø akïth dëëra na näk nyïïatwiel Ceethan kiper naa ööle, naa ba kanynya døc ni kaala kanynyø mana daa kanynyø ki gø.

⁸ 'Ba Wuuö akwaaya kwöre adäk kiper nee gïnögø aae dëëra.

⁹ 'Ba ena köö jïra, ni «Met ec mara orømø kiperï, kiper teek mara wø thur kare ka ri jäk.» Kiper manøgønø, yia met døc ki man tööda kiper jäk mara, kiper nee teek Krictø tïme ni bëëdö bääta.

¹⁰ Kiper manøgønø, aano jïëy ki jäk ki nyeŋ Krictø, ni aano jïëy ki man wac nyeŋŋa, ni jïëa ki jwør gïï mo leth, ki caannø, ki rïm can. Kiper kany wø jääa, beeye teek mara eni.

Pøøl Lääŋŋa Acooŋ Jwøk Mar Körin

¹¹ Aani, aana tïmö keda aana bøøl, 'ba beeye uuni na wëëk aani tïïc gïnögø. Kiper doo naa beeye uuni na doo pwøc aani, kiper aani, kara ba thiinh ki nyïïatwietøgø no okadhø døc yøø, këël na kuc nyeŋŋa.

¹² 'Ba gïï wø ŋec nyïïatwiel ma adïëri ki ge atïïc dïïu ni bäŋ jøømø, ni beege ŋïïce, ki gïï mo rëëma ec, ki tïïe mo døøŋŋø.

¹³ ?Aŋø, agïnaŋø na tïïc dï acook Jwøk møga, ni kääŋu ki gø? ?Paa mana kära uuni öölö keere? Cïbu cwïnynyu piny ki aani kiper gïnö ni yaa baa enø.

¹⁴ 'Ba kawaane dëëra yaa nø jek ki dää wäädhi ki man ööa baŋu. 'Ba u ba ööla, kiper a ba many japu, 'ba beeye dëëtu keere ni manynya. Kiper patha obwöre na doo känö ki jammi jï jøøa nywøl geni, 'ba beeye jøøa nyöödö ni wø känö jï nyïïge.

¹⁵ 'Ba yia met døc ki man cïba dëëra bäre kiper jwïëyu. ?Ni näk maa mëër ki uuni døc, mëëyu ki aani doo tïmö ni thiinh?

¹⁶ 'Ba këël na ŋäyu gø nou kära öölö, u wø poot köö, ni yia da atade, nou yaa mødø ki riek waŋ mara.

¹⁷ ?Aŋø, da gïn mo yaa lwørø baŋu ki riek waŋ ki køør jøøa jääŋŋa baŋu?

¹⁸ Tayta aköömma ni ö baŋu, ni jääŋŋa cöögø ki eni na aciel. ?Aŋø, da gïn mo olwør Tayta baŋu ki riek waŋ? ?Eni, gïna tïïe ki gïna tïïa patha aciel? ?Wa kär cäädhö ki jöö aciel?

¹⁹ ?Aŋø, you caarø ni wa piema dëëtwa nyïmmu? Beeye nyïm Jwøk ni cäänwa en ki nyeŋ Krictø. Ni gïïögø bëët tïïcwa kaper nou tëënnu, u no omëëcwa.

²⁰ Kiper a lwäär ni kanymør no ööa, u cwäna cwänö ki bëëtö mo patha mana manynya, ni jootu aani naa cäänö ki dwøl mo ba manynyu. Ni kanymør kanyøca jïtö ki pïëm, ki keec, ki wëër, ki ŋäc røk, ki raany nyeŋ ŋat mør, ki waac nyeŋ, ka atöör, ki dïlweel.

²¹ A lwäär kiper kanyo cäŋa duu baŋu, Jwøk mara waŋa odøøc mo law nyïmmu, ni kïmma ki gïr jøø ni thööth no obääyö yøø, ni ge poot bëëdö ni cwïnyge ba løkge ki man wecge rääö, ki käp, ki jap laac wïc na tïïcge.