2 Körin 10 - Wëël Jwøk

Luumma Caan Pøølli Kiper Tïïc Mare

¹ A na Pøøl ki dëëra, a kwaya uuni ki køør mööl mar Krictø, ki bäth ec mare, ni beeye a ŋat wø døøc dëëra mo mwöl kany wø ena buutu, ni en cerri cwïnya kany wø tøøra.

² A kwaya uuni, käru nou wëëga aani cäänö ki luubö mo teek ki uuni kanyo ööa baŋu, kaawat man yaa gø cooŋø ki cwïnya en noo caana jï jø wø cäänö kiperwa ni wa tïïya teeŋ gïï wø tïïc jø pinynyi jaak.

³ Kiper këël man bëëtwa piny en, wa ba leny teeŋ leny man wø këël jø pinynyi.

⁴ Kiper jap leny mowa, patha mo piny, 'ba jïge da teek Jwøk ki man nyakge kwör wø teek.

⁵ Wa wø nyaga pïëm, ki jammi bëët mo wø thïïŋ røkge ka atöör ni ge gëëŋa jöör Jwøk ki man ŋääi. Ni peecwa acaare bëët nee dwør Krictø leŋge.

⁶ 'Ba kanyo nø leŋŋu luup bëët, dëëtwa ewa jiiø ki man jäälwa jø adhala bëët.

⁷ Uuni, u neeta dëët jiy wøk. 'Ba ni näk da ŋat mo ree ee ŋäädhö ni ena dhaanh Krictø, beerra man ŋäc gø ni waana jø Krictø thuwø, kaawat mare.

⁸ Kiper këël atöör mara doo kääthö ki mo thiinh kiper cuum marwa mana wëëk Wuue waani kiper man wëëkwa uuni tëënnö ni patha man raanywa uuni, wïïa bäŋ doo lääö.

⁹ 'Ba a ba many man tïma keda a døøya uuni mo lwäär ki weeli.

¹⁰ Kiper jø wø cäänö kipera, ni «Weeli moe yïthge da luup mo leth ni teek, 'ba dëëre kiree jääk, ni dwøre ba wïnyi ni beer.»

¹¹ 'Ba beerra man ŋäyi ya teeŋ jøøgø nø, ni gïn wø caanwa ki yi wëëlö kany wø tøørwa buutge, wø poot caanwa caanø kany wø nutwa.

¹² 'Ba dëëtwa ba dewa päärö ki jø wø nyooth dëëtge, wala wa døøya dëëtwa mo röömi ki geni. 'Ba kany wø päänyge dëëtge ki ŋat mør ni päänyge dëëtge keerge, bäŋa gïn mo ŋäcge.

¹³ 'Ba waani, wa ba töödö ka atöör mo okadhø, 'ba wa töödö ka atöör mana wëëk Jwøki waani, ni beeye mano cööp baŋu thuwø.

¹⁴ 'Ba atöör marwa ba pöödhi døc kee wa kär kwøŋ ö baŋu, kiper bee wa na kwøŋ ö baŋu ki luumma nyään na met mar Krictø.

¹⁵ Wa bäŋ wø töödö ka atöör mo okadhø ki køør öölö mar jø møøk. 'Ba ewa ŋäädhö ni kanyo døøŋ ŋäädhe maru, karwa opälli dïïu døc,

¹⁶ kiper nee luumma nyään na met køpwa yïth mïëri moø ni ŋäthu yøø, ni wa ba töödö kiper tïïc mo onø tïïc ŋat mørri.

¹⁷ Kaawat mana gööri, «Beerra man ö ŋat wø töödö ni tööde ki nyeŋ Wuuö Jwøk.»

¹⁸ Kiper paa ŋat wø nyooth dëëre ni wø jïëc, 'ba beeye ŋat wø nyooth Wuue.