2 Körin 1 - Wëël Jwøk

Määdhe

¹ Aana Pøøl na nyïïatwiel mar Krictø Jecu, ki køør mana many Jwøki, ki cöögø ma Timöthi. A göönna baŋ acooŋ Jwøk mana en yi Körin, ki jï jø Jwøk bëët moa en dï Akeea bäre.

² Met ec bëëde bäätu, ki bëët-mëër man wø ööi ki baŋ Jwøk na näk Wääø, ki Kwäärö ma Jecu Krictø.

Luum Cøm Cwïny Ri Jwør Gïï Mo Leth

³ Pwøc en jï Jwøk na näk Wää Kwääyø ma Jecu Krictø, na näk Uun køny, eni na Jwø wø cøm cwïny jiy bëët,

⁴ ŋat wø cøm cwïnywa yïth gïï wø leth bëët ni wø pïï dëëtwa, kiper nee jiy møga mo wø jïti ki gïï mo leth nee cwïnyge cømwa ki cøm cwïny man wø ö Jwøki wø cøm cwïnywa ki gø.

⁵ 'Ba kaawat man bëëtwa cooth en ni wa jøøya teeŋ gïïa leth na jwør Krictø, cwïnywa ocøm thuwø cooth ki køør Krictø.

⁶ Ni näk dëëtwa jïtö ki gïï mo leth, jootwa kaper nou jïtu ki cøm cwïny ki pïëm man piem uuni ki gø. 'Ba ni näk cwïnywa ocømø, cøm kaper nou jïtu ki cøm cwïny kany wø jïënynyu gïïö ni leth yøø ni wø jwørru kaamarwa ni cwïnynyu you cïp piny.

⁷ 'Ba ŋäädhe marwa kiperu kär dak. Kiper ŋäcwa ni keda man bëëdu en nou nywaaga gïï wø leth ni wø jwørwa, cwïnynyu ocøm thuwø ki teeŋ cøm cwïny marwa.

⁸ Kiper wa ba many man kuyu gïr gïna leth na pïï dëëtwa yi Eecia, nyïïmëëkwa. Kiper gïnöce atïmö ni teek døc jïwa, ni cwïnywa kärwa maar mak, ni caarwa gø ni wa ba kwøw këët.

⁹ Ka adïëri møn, acaarwa ni luum thøø onø ŋøl bäätwa. 'Ba beeye kiper nee wa ba göökwa dëëtwa, 'ba, nee wa göökwa ri Jwøk ni wø tïŋ jiy maal ki yi thøø.

¹⁰ Waana käl wøk cer gïn mo raac døc mo doo kännö ki thøø dëëtwa. 'Ba waani, waano cäŋ käl wøk. Ni eni ewa ŋäädhö ni wa poot käle wøk cooth.

¹¹ 'Ba uuni thuwø, wa dou kønyø ni kwaayu Jwøk, kiper nee jiy mo thööth tïmge ni pwøya Jwøk kiperwa, kiper gwïëth mano wëëk waani noo duui ki køør laam mo jiy mo thööth.

Wääth Pøøl Mana Dee Ci Körin Akääŋö

¹² 'Ba atöör marwa beeye en, kiper ŋäcwa ki cwïnywa ni waana bëëdö pinyi en ki bëëtö mana en kur keere na käl baŋ Jwøk, ni bäŋ atade yie, ni kadha bëëtö mana beetwa nyïmmu. Ni bëëtö marwa ba käl ri riek waŋ mar pinyi en, 'ba käla ri met yi Jwøk.

¹³ Kiper wa ba göör luup mo teek baŋu, 'ba beege luup mo løny jïïu ki kwaan ni kwanynyu tietge. Yaa ŋäädhö ni tietge okwanynyu bäre,

¹⁴ keda mana kwøŋu gø kwany ki mo thiinh, kiper nou töödu kiperwa kaawat mano töötwa kiperu dïcäŋo näk cäŋ Kwäärö ma Jecu.

¹⁵ 'Ba kiper na tïm moøgø bëët ni ŋääa ki cwïnya, aana tïmö naa manynya man ööa baŋu dïkwøŋ, kiper nee yïthu mïnge kwöre ariiø.

¹⁶ Kiper a doo naa manynya man lïïma uuni kanya cøøa Macedönia, ni daa cäŋ gää baŋu kanya duua ki yi Macedönia, ni daa tïŋŋö ki buutu naa cøøa Judia.

¹⁷ 'Ba aani, mara paa kier wïc kanya manynya man tïïa gïnögø. Aani, a ba cäänö kaa man wø cään jø pinynyi, ni wø laar cäänö ki dööti ariiø.

¹⁸ 'Ba kaawat man bëëdö ni Jwøk adïëri en, luumwa na caanwa jïïu kär tïmö na dööti ariiø.

¹⁹ Kiper O Jwøk ma Jecu Krictø na nyeŋŋe wara køpwa dïïu, ni beeye aani, ki Cilbana, ki Timöthi, luumme patha dööti ariiø. 'Ba ki nyeŋŋe wø joota dwøl aciel cooth.

²⁰ Kiper gïïa buuk Jwøki bëët wø thura karge ki ri Krictø. Ni beeye ni wø kööø ni «Enøgønø» ki køøre, ni ø jiema Jwøk.

²¹ 'Ba beeye Jwøk ni wø wëëk waani ki uuni tëënnö ki ri Krictø, ni jier øøni.

²² Ni mooc dëëtø ki ŋïï mare, ni kïth Jwïëye cwïnynyø na kuri.

²³ 'Ba acaara mara ŋäc Jwøki kiree, ki man näk mo gïna kääŋa ki ööny yi Körin, a kääŋi kaper nou ba cäänna ki dwøl mo teek.

²⁴ Ni patha ni ŋäädhe maru bëënna waani, 'ba marwa tïïc ki uuni na aciel nee yïthu mïnge, kiper u cuŋŋi nou teek ki ri ŋäädhe maru.