2 Camiel 8 - Wëël Jwøk

Luum Wïth Juurre Moa Bööt Deebiti

¹ 'Ba na tïme na køøre cään, Deebit akëëdö ki jø Pilitin ni dwøk wïthge piny; ni ö Deebiti ni lwør pääny mana dwøŋ ceŋ jø Pilitin.

² Køøre Deebit jø Möap abööte thuwø, ni ö jiyi moa maae ki tøŋ ri leny ni cïïm geni na tëëŋŋe, ni wëëk geni but piny. Køøre eni tëëŋŋe ariiø moa cïïmme røk jøøgø anääe, ni wec tëëŋŋö aciel bäre ni kwøw. Køøre, jø Möap aput tïmö ni ge bëënna Deebit ni ge cïpö ka ajwäk jïre.

³ 'Ba Deebit Adadëdher o Reeyöp nyeny jø Dhöba abööte thuwø kanya ö Adadëdherri na aae ni cøøa kuna cäŋ nyec mare dwøk kare bäät Naam Upareeti.

⁴ 'Ba Deebit jø leny mo wø cäädhi ki bäät okwëënyi ma kuma aciel ki dïpe abïriiø ki jø leny mo wø cäädhi ki tietge ma kume ma pïërariiø amaae cer Adadëdher; ni ö Deebiti ni ŋøør ojwönyi mo tiet okwëënyi bëët mo wø tut jïëthe. 'Ba møøk mo orømø awiie kiper jïëthe mo wø tut okwëënyi ma dïpa.

⁵ 'Ba kanya ö jø Aram moa en Damacka na öge kuna kønyge Adadëdher nyeny jø Dhöba, Deebit anääö ki jø Aram ma kume ma pïërariiø kurriiø.

⁶ Kanyøgønø, Deebit aput tïïö ki kwör koor dï mïëc jø Aram moa en tier Damacka, ni ö jø Arammi ni putge tïmö ni ge bëënna Deebit ni ge cïpö ka ajwäk jïre. 'Ba Wuuö Jwøk aput bëëte ni køønynya Deebit kany wø tuge yie jaak.

⁷ 'Ba Deebit kööde mo leny moa käär jø lenynyi mo Adadëdher na näk otïïö ki warkey aput lwør, ni käl ge yi Jerucalem.

⁸ 'Ba nyeya ma Deebit akädö ki nywïëny ma jwëëlli mo thööth døc ki yïth päänye mo nyeya ma Adadëdher, ni beege Bëtha ki Bëröthay.

⁹ 'Ba kanya ö Töi nyeny jø Amath na wïny gø ni Deebit jø leny mo Adadëdher bëët ee nø böötö,

¹⁰ Töi wääde ma Jöram aput jääŋŋö baŋ nyeya ma Deebit nee määdhe mare ki gwïëth mare caan jï Deebit, kiper mana ö Deebiti na këëde ka Adadëdher ni bööt gø; kiper Adadëdher bëëdö ni këëdö ki Töi. 'Ba Jöram o Töi aay ni käädö ki gïï mo tïïc ka warkey ki gwel-bïrö ki nywïënyö ma jwïël jï Deebit.

¹¹ 'Ba Deebit gïïögø aput cïp kur keerge jï Wuuö Jwøk, ni dwal ge bäät warkey ki gwel-bïrö moa näk ee kwøŋ cïp kur keerge jï Wuuö Jwøk, ni beege moa käle baŋ wïth juurre bëët moa näk wïthge ee dwøk piny;

¹² ni wïth juurre moa käl gïïögø baŋge beege jø Ëdöm, ki jø Möap, ki jø Amön, ki jø Pilitin, ki jø Amalëk. 'Ba gïïa twier baŋ Adadëdher o Reeyöp, nyeny jø Dhöba, ee nø cïp kur keerge jï Wuuö Jwøk thuwø.

¹³ Kanyøgønø, Deebit nyeŋŋe aput wïnyö kanya duue ni jø Ëdöm ma kume apaar ka abära ee nääö Goor Acäbö.

¹⁴ Køøre Deebit dï Ëdöm bäre aput kïthö ki kwör koor, ni ö jø Ëdömmi bëët ni putge tïmö ni ge bëënna Deebit. 'Ba Wuuö Jwøk aput bëëte ni køønynya Deebit kany wø tuge yie jaak.

Jic Deebit Moa Kwörge Døøŋŋø

¹⁵ Køøre Deebit aput bëëdö na nyeya mar jø Icriel bëët; ni luup ŋøle na karge, ni tïïya adïëri jï jø Icriel bëët.

¹⁶ 'Ba Jöap o Dheruya beeye kwääy lwaa leny, ni ö Jøcapati wär Akilut ni bëëde na nyikugö.

¹⁷ 'Ba Dhadök wär Akitöp ka Ayemëlëk wär Abiethaar beege dïlämme moa døøŋŋø, ni ö Ceraya ni bëëde ni beeye ŋat wø göör luup akwöma piny.

¹⁸ 'Ba Benaya o Jööda beeye kwääy lwaak mar jø leny mo wø koor nyeya, ni beege jø Kelita ki jø Pelita. 'Ba wäät Deebit gena jø wø køny nyeya ka acaara.