2 Camiel 7 - Wëël Jwøk

Luubö Mana Caan Jwøki Kiper Dhi Øt Deebit

¹ 'Ba kanya tïme ni nyeya ma Deebit bëëdö paan dwøŋ yi øde mana geer jïre, ni eno nø mooc Wuuö Jwøki ki jwöm, ni lenye moa këële ki nyïïmän moe moa en deŋŋe bëët oløny nikwöc,

² ena köö jï nyikuŋ Jwøk ma Nathan, ni «Neenï, aani a bëëdö yi øtø mo geer ka jenni mo perge leth; 'ba acanduk mar Jwøk bëëdö yo oduŋkaara jaak.»

³ Køøre Nathan aköö jï nyeya, «Wui nyeya, beerra man tïïyï jammi bëët moa manynyï ki cwïnyï, kiper Wuuö Jwøk ena buutï.»

⁴ 'Ba na tïme na dïwäänögø, dwør Wuuö Jwøk aö bäät Nathan ni kööe,

⁵ ni «Ci baŋ dhaanhnha ma Deebit ni caanï luumma jïre, ni kööï ni man beeye dwør Wuuö Jwøk, ena köö, na ‹?Aŋø, beeye ïïni noo gëëdö ki øtø jïra mo bëëda yie?

⁶ Kiper aani, a kär bëëdö yi øtø ki mana täge ki kanya käla jø Icriel wøk ki Ijep këël dïcäŋi ennø; 'ba a bëëdö naa wïdö ni kar bëëtö mara beeye oduŋkaara.

⁷ 'Ba kwöra caadha ki jø Icriel bëët, da gïn mo yaa maar caan jï dïbwöthe mo jø Icriel, moa köömma ni käärge jiya ma jø Icriel, mo aano köö, na «?Aperŋø, ni ba gëëdu ki øtø jïra en, mo geer ka jenni mo perge leth?»?›

⁸ «'Ba ennø, caanï jï dhaanhnha ma Deebit, ni man beeye dwør Wuuö Jwøk, eni na wïth jammi bëët, ena köö, ni ‹Aani, ïïna jiera kanya enï pwöl kwaath niï kwaaya dïëk, niï tïmï ni ïïna dïbwödhi mar jiya ma jø Icriel.

⁹ 'Ba aana bëëdö ki ïïni ki yïth kwöra caathï bëët ni dïïra wïth nyïïmän moï nyïmï; 'ba nyeŋŋï poot tïïa tïïö nee wïnye, ni caala nyeŋ jiy moa no owïnyö døc bäät piny.

¹⁰ Aani thuwø da kany mo jiera jierø kiper jiya ma jø Icriel nee tietge këëtge piny yie, ni beeye kany bëëtge yie na poge, ni tïme ni bäŋ jiy mo kiera wïthge këët, ni bäŋe jiy mo wïthge reyø mo caara ge këët kaawat mana dïkwøŋ,

¹¹ ni beeye ki mana täge ki dïcäŋa thïïŋa pïëmme jï jiya ma jø Icriel. 'Ba aani, ï mooa mooø ki jwöm ni tïme ni bäŋ leny yïthakiyu ki nyïïmän moï bëët. 'Ba ennø, a na Wuuö Jwøk, a caana mara jïrï ki man näk beeye a na Wuuö Jwøk noo tïïc dhi ødï ni teek.

¹² « ‹'Ba kanyo päŋ nïne moï noo thøwï noo läpï køør kwäyu, aani, da ŋat mo käla dëërï mo thïïŋa thïïŋö køørï; 'ba aani tier nyec mare këëlla piny.

¹³ Ni ö eni ni gëëde ki øtø kiper nyeŋŋa, ni këëlla tier wälu mar nyec mare piny na bäre bäre.

¹⁴ 'Ba aano bëëdö ni aana wuuö jïre, ni bëëde na wäädö jïra. 'Ba kanyo näk eno bääyö, pwönynya pwönynyö kaawat man wø ö dhaanhe wø pwöny wääde, ni jääla gø kaawat man wø ö dhaanhe wø jääl wääde,

¹⁵ 'ba mëër mara ni wø ba jøøl, na paanya bäät Cøøl, ŋata käla wøk niï läwï kare, ba paanya bäät ŋataca.

¹⁶ 'Ba dhi øtø marï ki nyec marï puta ruuö køørï; ni këëlla tier wälu marï piny na bäre bäre.› »

¹⁷ Køøre Nathan luup bëët, këël gïïa nyooth Jwøki bëët jïre, acaane jï Deebit.

Kanya Ö Deebiti Na Läme Jï Jwøk Ni Pwøya Gø

¹⁸ Køøre nyeya ma Deebit aci kar lam ni pï piny nyïm Wuuö Jwøk ni läme ni kööe, «?Wui Kwäärö Wuuö Jwøk, aana ŋa? ?A dhi øtø mara thuwø, nyïëdi, ni tïïyï gïïögø bëët yøø kipera?

¹⁹ ?Wui, Kwäärö Wuuö Jwøk, ki jïrï, gïna nø tïïyï enø beeye gïn mo thiinh jaak? 'Ba ïïna cäŋ cäänö kiper gïno tïïyï kiper dhi øtø mara yi nyïme kunece. ?Wui, Kwäärö Wuuö Jwøk, teeŋ gïnögø putï ka tïïc kiper dhaanhø møn en?

²⁰ «Wui, Kwäärö Wuuö Jwøk, ?agïnaŋø noo caana jïrï këët nø mo kaala man, a na Deebit en? Kiper a na dhaanhnhï en, cwïnya oløny ni ŋäyï døc.

²¹ 'Ba kiper luupï bëët moa nø carï nee thurge karge, ki køør mana caarï ki cwïnyï, beeye ni tïïyï tier luubö man ni pere leth en nee bëëde ni ŋääa.

²² «Wui, Kwäärö Wuuö Jwøk, ïïna Jwøk niï dwøŋ. Ka adïëri møn, bäŋ jwøk mør mo caala ïïni, ni bäŋ jwøk mør këët, 'ba bee ï keerï, kaa mana wïnywa gø ki ïthwa.

²³ ?Aŋø, da wï jur bäät piny kany mo caala jiyï ma jø Icriel? Kiper beeye ï na Jwøk marwa na ö baŋ jiyï ma jø Icriel, ni kälï wa wøk ceŋ jø Ijep, nee wa bëëtwa na jiyï, ni tïïyï nyeŋŋï nee wïnye. Ïïna tïïö ki gïï mo døøŋŋø mo di lwäärö dëët wïth juurre ki juu moge, ni riemï ge wøk nyïmwa, wa na jiyï.

²⁴ Wui Wuuö Jwøk, beeye ïïni na këël tiet jiyï piny ma jø Icriel, nee putge bëëtö na jiyï na bäre bäre, ni tïmï ni ïïna Jwøk marge.

²⁵ «'Ba ennø, ï na Wuuö Jwøk, luubö mana nø caanï kipera, a na dhaanhnhï, ki dhi øtø mara, beerra man putï gø wëëk thur kare na bäre, ni tïïyï gø kaawat mana nø caanï gø.

²⁶ 'Ba nyeŋŋï obëëdö ni dwøŋ na bäre bäre, ni kö jiyi, ni ‹Wuuö Jwøk, eni na wïth jammi bëët, beeye Jwøka eni mar jø Icriel›; 'ba a na dhaanhnhï ma Deebit en, put dhi øtø mara tïïc ni teek nyïmï.

²⁷ «Wui, Wuuö Jwøk ï na wïth jammi bëët, ï na Jwø Icriel, gïnögø anø nyoothï jïra, a na dhaanhnhï, ni kööï, ni ‹Aani dhi øtø marï otïïa ni teek.› Kiper manøgønø, a na dhaanhnhï, cwïnya ajïtö ki cer ki man läma jïrï.

²⁸ Wui, Kwäärö Wuuö Jwøk, bee ï na Jwøk, ni luup moï beege adïëri, ni bee ï na buuk luummi en na beer jïra, a na dhaanhnhï.

²⁹ 'Ba ennø møn, a kwaya ïïni nee dhi øtø mara gwïëthï, a na dhaanhnhï, ni tïme ni puta bëëte ni nut na bäre bäre nyïmï. Wui Kwäärö Wuuö Jwøk, gïnögø anø caanï; 'ba ki køør gwïëth mano gwïëthï dhi øtø mara ki gø, a na dhaanhnhï, gwïëth manøgø put bëëte ni nut na bäre bäre. Enøgønø.»