2 Camiel 3 - Wëël Jwøk

¹ 'Ba kar kaagø, män mana en yïthakic jøøa en ri Cøøl ki jøøa en ri Deebit akän wøk ki kany mo bäär. Ni ö teeki mar Deebit ni bëëde ni cäätha maal; 'ba jøøa en ri Cøøl, gena bëëdö ni jäk marge cäätha maal thuwø.

Nyeŋ Wäät Deebit

² Moi beege wäät Deebit moa nywøle Keeprön; kanynye beeye Amnön na nywøle ki cïïe ma Akinaam nyi jø Jedhriel;

³ 'ba rietge beeye Kiliap, na nywøle ki cïïe ma Abigël cï Nabal nyï Karmël, dhaaŋŋa näk odööŋ na cï thøø; ni dääge beeye Abëcëlöm, o cïïe ma Maika nyi Thalmay nyeny Gëcur;

⁴ ni ŋweerge beeye Adöniya o cïïe ma Agith; ni bïïge beeye Cepathiya o cïïe ma Abital;

⁵ ni bïcierge beeye Ithriam o cïïe ma Ëgla. Obwöre moøgø beege wäät Deebit moa nywøle Keeprön.

Kanya Ö Abinërri Na Dwäte Ki Deebit

⁶ 'Ba kanya bëëde ni da män yïthakic jøøa en ri Cøøl ki jøøa en ri Deebit, Abinër bëëdö ni dëëre ee tïïö ni eno kadhø ki teek røk jøøa en ri Cøøl.

⁷ 'Ba Cøøl da cïïe mo odööŋ wï paare mo nyeŋŋe cwøl ni Ricpa nyi Aya; køøre Icböcëth Abinër apëënynye ni kööe, na «?Aŋø na ciï baŋ cï wära ni butï ki gø na dhaagø?»

⁸ Kar kaagø Abinër aput wëër døc kiper luubö mana caan Icböcëthi, ni kööe, na «?Aŋø, ki jïrï a bëëdö kaamar gwök, naa iï kwaan kur jø tuuŋ Juuda? Neenï, këël kar kany ennø, aana bëëdö naa nyootha mëër jï wäru ma Cøøl, ki tuuŋge, ki jiye, ni gwøa ïïni, ni kära ï cïp cer Deebit; 'ba dïcäŋi ennø, ïïna tïmö niï kïtha bääta ka ajäla kiper luum dhaagø jaak.

⁹ 'Ba ennø møn, ni näk mo kööŋ mar Wuuö Jwøk kiper nyec mar Deebit ba tïïa ni thur kare, beerra man ö Wuuö Jwøki ni raany aani.

¹⁰ Kiper dwør Wuuö Jwøk beeye ni nyec cööde wøk dhi øt Cøøl ni cïp gø jï Deebit nee put bëëtö na nyeya bäät jø Icriel bëët ki nyïïmëëkge ma jø tuuŋ Juuda, ki mana täge ki Daan këël mana këët Bëërcïïba.»

¹¹ 'Ba kar kaagø, Icböcëth aput bëëtö ni bäŋ luubö mo ee dwøgø këët jï Abinër kiper ena lwäyö.

¹² Køøre Abinër ajääk baŋ Deebit ki jiy kanya bëëde yie ni kööe, na «?Aŋø, ŋöömö man bäre en a mar ŋa? 'Ba ennø, tudï ki luubö ki aani; ka adïëri møn, a puta dwätö ki ïïni, ni kuura jø Icriel bëët dëërï.»

¹³ 'Ba Deebit aköö, «Beer, aani a tudö ki luubö ki ïïni møn. 'Ba da gïrpiny aciel keere maa manynya gø nee tïïyï; ni näk mo gïnögø kärï tïïö, täärnyïma ba diï joodø na bäre. 'Ba gïno tïïyï kiree beeye ki man kälï Mikal nyi Cøøl kanyo ööï baŋa.»

¹⁴ Kanyøgønø, Deebit aput jääk baŋ Icböcëth o Cøøl ki jiy ni kööe, ni «Cïïa ma Mikal, dhaaŋŋa nywøma ki buyi mo jer dëët jø Pilitin ma dïpa moa daaŋa, duuï jïra.»

¹⁵ Køøre Icböcëth aput jääk baŋ Mikal kanya bëëde yie po cwøre ma Paltiel o Laaic, ni käl gø.

¹⁶ 'Ba cø Mikal manøgø aay ki gø na aciel, ni cäädhi ni jwöŋö këël mana pïïcge paana cwøl ni Baurim. Køøre Abinër aköö jï Paltiel, «Ci døøgï.» Kanyøgønø, Paltiel aput døø paare.

¹⁷ 'Ba Abinër ajïtö ka acooŋa ki jø døøk Icriel ni kööe, ni «Ki kany mo bäär, u manynya Deebit nee tïme na nyeya maru.

¹⁸ 'Ba ennø, røønynyu nø. Kiper Wuuö Jwøk anø cäänö kiper Deebit ni kööe, ni ‹Jiya ma jø Icriel opiema ceŋ jø Pilitin këël nyïïmän moge bëët ki ri dhaanhnha ma Deebit.› »

¹⁹ 'Ba Abinër thuwø luummögø acaane ni wïnyö jï jø tuuŋ Benjamen. Kanyøgønø, ena put tïŋŋö ni ci baŋ Deebit kanya bëëde yie Keeprön, nee luubö mana näk nëëni ni beer ki jï jø Icriel bëët ki jø tuuŋ Benjamen nee caane jïgø.

²⁰ Køøre Abinër ki jiy ma pïërariiø na cäädhe ki ge, gena pïï Keeprön baŋ Deebit. Ni ö Deebiti ni tïïe ki cam kiper Abinër ki jiy moa cäädhö ki eni.

²¹ 'Ba na tïme na køøre cään, Abinër aköö jï Deebit, na «A kwaya ïïni naa tïŋŋa naa cøøa kuna cooŋa jø Icriel bëët kanya aciel jïrï, ï na nyeya mara, nee tïme ni løny jïge ki man tutge ki luubö ki ïïni, niï tïmï ni ïïna nyeya marge bëët, ni gïno manynyï jaak thura kare.» Køøre Deebit, Abinër aput wëëk wääth, ni put aay ki jööt dëël.

Kanya Ö Abinërri Na Nääi

²² 'Ba na tïme na kaagø, ka adïëri møn, jø leny mo Deebit ki kwääc lwaa leny marge ma Jöap gena duuö ki baŋ twëër ni ge käädö ki jammi mo thööth døc. 'Ba kanya pïïcge, Abinër onø aay buut Deebit Keeprön kaagø, kiper ee nø wëëk wääth ni aae ki jööt dëël.

²³ 'Ba kanya ö Jöapi ki jø leny bëët moa cäädhö ki eni na pïïcge ennø, aput caan jï Jöap ni køp, ni «Neenï, Abinër o Nër aö baŋ nyeya, ni ö nyeya ni wëëk gø wääth, ni nø aae ki jööt dëël.»

²⁴ Køøre Jöap aci baŋ nyeya ni kööe, «?Wui nyeya, agïne ni iï tïïö en? Ka adïëri møn, Abinër anø ö baŋï. ?'Ba aperŋø na wëëgï eni wääth ni put aay?

²⁵ ?Aŋø, kuyï na Abinër o Nër, ö baŋï ka atade kiper nee bëëtö marï bäre këël gïï wø tïïyï bëët kwaane?»

²⁶ 'Ba kanya ö Jöapi na ö wøk ki baŋ Deebit, ena put jääk køør Abinër ki jiy, ni ö jøøa jääŋŋi ni duuge eni ki bäät iith Cira; 'ba gïnögø kuc Deebiti.

²⁷ 'Ba kanya ö Abinërri na duu Keeprön, ena put Jöapi kïth kur keere dhi kiir ni nëëni kede manynya man cääne ki gø na eni keere. Køøre Jöap Abinër aput cwøp ki yi gø ni put thøø, ni eni coola kwör rem coki ma Acaël.

²⁸ 'Ba kanya ö Deebiti na wïny gïnögø cään, ena köö, ni «Aani ki jøøa bëëdö tier nyec mara, ki man näk mo karwa bäär ki kwör rem Abinër o Nër, ŋäc Wuuö Jwøki.

²⁹ Beerra man ö ajäla manøgø ni päth bäät Jöap ki jø dhi øt wänni bëët; ni bäŋ dhaanhø mo dööŋ dhi øt Jöap ni dëëre ba jïti ki teeŋ täwe mo wø leth, wala ge tïmö ni jägö ni geno kwaan kur mään, wala ge tïmö ni ge di nääŋŋö ko opëëlle, wala ge tïmö ni bäŋ cam jïge.»

³⁰ 'Ba Jöap ki coki ma Abicay Abinër anäkge kiper mana ö Abinërri na 'näk cokge ma Acaël ri leny mana en Gibien.

Kanya Ö Deebiti Na Jwøk Abinër

³¹ Køøre Deebit aköö jï Jöap ki jiy bëët moa nut buutge kaagø, ni «Jwøgu Abinër, ni jeeyu abïïe mou ni røøu keece dëëtu na abïïe ni nyoothu pänh cwïny maru.» Kanyøgønø, nyeya ma Deebit aput wääth køør pëëm mana käär dëër dhaanhø ki gø.

³² 'Ba Abinër aputge koony Keeprön; ni ö nyeya ni jwöŋe ni dwøre ee tïŋ maal døc bäät bwöc Abinër, ni ö jiyi bëët ni jwöŋge thuwø.

³³ Køøre nyeya duut man acaae ni wär gø ni jwøga Abinër ni kööe, «?Aŋø, Abinër doo thøw møn ni jääk jaak?

³⁴ Wui Abinër, ceŋŋï kee kär twöö, ni tietï thuwø kär kïth yo orøgø; 'ba ïïna put 'näk kaamar dhaanhø mo 'näga jiyi mo wïthge reyø.» Kanyøgønø, jiy bëët acäŋ jwøk kiper Abinër.

³⁵ 'Ba ni poot na dïcäŋögø, jiy bëët aö kuna kwaacge Deebit nee cäme; 'ba Deebit akööŋ ni kööe, «Ni näk mo da cam këël gïn mo thiinh jaak mo ya belø ni cäŋ poot kär päth piny, beerra man ö Wuuö Jwøki ni raany aani.»

³⁶ Kanyøgønø, jiy bëët gïnögø aputge kïth cwïnyge, ni jootge gø ni beeye gïn mo beer. Këël jammi bëët mo wø tïïc nyeya obëëde, ajootge ni beege gïï mo beyø thuwø.

³⁷ 'Ba jic Deebit bëët këël jø Icriel bëët aputge ŋäc dïcäŋeca ni nyeya ma Deebit tøør ri thøø mar Abinër o Nër.

³⁸ Køøre nyeya ma Deebit aköö jï jiye, na «?Aŋø, kuyu ni kwäärö mo kare dwøŋ athøw dïcäŋi Icriel?

³⁹ 'Ba aani, këël na bëëda ni aana nyeya mo wïïe othïïmmö ki maaw, dïcäŋi aana tïmö naa jääk; ni ö Jöap ka Abicay, wäät Dheruya, ni tïmge ni teeka geni ki aani. 'Ba ennø, beerra man ö Wuuö Jwøki ni cun ŋat raay ki køør raay mo wø tïïe.»