2 Camiel 23 - Wëël Jwøk

Luup Moa Car Deebiti Na Aŋuudi

¹ 'Ba moi beege luup moa car Deebiti na aŋuudi, ena köö, na «A caana dwør Jwøk, a na Deebit o Jeci; a caana dwør Jwøk møn, na tïïc kara ni dwøŋ; ni beeye Jwø Jeekap na tïïc aani nee wïïa thïïmmi ki maaw ni røønya aani; 'ba beeye aani wø cääö ki dudi mo met jï jø Icriel.

² «Jwïëc Wuuö Jwøk aö bääta ni cääne ki raa, ni tïm luupe ni ena dhaa.

³ Jwø Icriel mare anø caane, ni beeye Jwø Icriel na teek na cäänö ki aani ni kööe, ni ‹Ŋato bëëdö na nyeya ni käär jiy ki jöö ma kare, ni jiy kääre ni eni lwäära aani, a na Jwøk,

⁴ eni tïmö kaamar tiet øw kany wø bëëde ni cäŋ tuulö, ni tïme ni caala maal mo bäŋ pøøl kany wø bëët pinynyi na amöölla, ni tïme ni nëëni ni mïërö ni caala luum mo pulli mo tuya piny, kany wø rieny cäŋŋi køør køth.›

⁵ «?Aŋø, nyec mar dhi øtø mara ba tïmö ni caala nyec manøgø nyïm Jwøk? Kiper eno tudö ki luubö ki aani mo bëëdö na bäre bäre, ni beeye luubö mana näk ee cïp piny ni ba wiil. ?A ni näk mo enøgønø, Wuuö Jwøk a ba put piem, këël dhi øtø mara, ni wëëk gïï wø mïn eci ki ge bëët thur karge?

⁶ 'Ba jøøa wïthge reyø bëët, ge di wetø kaamar koodhi, kiper koodhi bäŋ wø mak ki cenø;

⁷ 'ba ŋat wø cooŋ ge wø cooŋe ka thiir tøŋ, ni putge waaŋ na bäre bäre karge na enge yie.»

Luum Jø Leny Mo Deebit Moa Teek Na Näk Nyeŋge Owïnyö

⁸ Moi beege nyeŋ jø leny mo Deebit moa teek. Dhaanhø mana dïkwøŋ beeye Jöcëp-Baacëbët nyï Taakmön, na bëëdö na wïth jø leny moa na adäk. Ena këëdö ki tøŋ ni nääe ki jiy ma dïpe abära ki yi leny aciel keere.

⁹ 'Ba riet jiy beeye Eliedhar o Dödö nyï Aköki. Ena dhaanhø aciel dëët jø leny moa teek moa na adäk na en buut Deebit, ni beege na ŋwöö bäät jø Pilitin moa näk rege ege cooŋ kanya aciel kaace kiper leny. 'Ba kar kaagø, jø leny møøk mo jø Icriel geno nø døø ŋäthge.

¹⁰ Køøre Eliedhar acuŋŋö ni 'näk jø Pilitin këël mana ööl cere no opëëllö poot ee maaø ni teek. 'Ba dïcäŋeca Wuuö Jwøk atïïö ki køny mo dwøŋ døc jï jø Icriel. Kanyøgønø, jø leny mo jø Icriel aduu baŋ nyenøgø; 'ba ge duui kiper twëër keere.

¹¹ 'Ba dää jiy beeye Cimia wär Agë nyï Arar. Dïcäŋ aciel jø leny mo jø Pilitin rege acooŋge yi pwödhö ma adaci thööth yie døc. Ni ö jø lenynyi mo jø Icriel ni bwøkge ki jø leny mo jø Pilitin.

¹² 'Ba Cimia acuŋŋö dï pwödhö ni mäna pwödhö ki jø Pilitin, ni 'näk ge. Ni ö Wuuö Jwøki ni tïïe ki køny mo dwøŋ jï jø Icriel.

¹³ 'Ba da jø leny adäk møøk røk jø leny moa näk pïëradäk na perge leth. 'Ba jø leny moøgø na adäk yøø, gena ci baŋ Deebit yi øt kïdi mana en ya Adulam kanya tïme na kar kac ki beel. 'Ba kar kaagø, jø leny mo jø Pilitin twïër marge ege tïïö yi Goor Rapayim.

¹⁴ 'Ba kar kaaca, Deebit ena kanya näk kar gwøk røk, ni jø leny mo jø Pilitin ge ena kar koor marge Bethelem.

¹⁵ Kanyøgønø, Deebit pï poge apare ni kööe, «Wui, doo na da ŋat mooc aani ki pïï mo maadha mo käla yi iith mana en dhi kiir Bethelem, doo beer.»

¹⁶ Kanyøgønø, jø leny moa na adäk na teek, gena put aay ni dønyge dï twïër mar jø leny mo jø Pilitin ki teek, ni putge lwötö ki pïï yi iith mana en dhi kiir Bethelem, ni öge ni käärge käärö, ni kälge gø baŋ Deebit. 'Ba Deebit akweer ki man maath pïï moøgø, ni put gø køny piny jï Wuuö Jwøk.

¹⁷ Ni kööe, «Wui Wuuö Jwøk, kara tïme ni bäär ki pïïögø. Kiper pïï moøgø caala rem jiy moa cøø na cïp dëëtge.» Kiper manøgønø, Deebit akweer ki man maath pïï moøgø. 'Ba man beeye gïrpiny aciel røk jammi moa tïïc jø lenynyi moa teek na näk adäk.

¹⁸ 'Ba Abicay cöök Jöapi o Dheruya beeye wïth jø leny moa teek moa näk pïëradäk. Ena këëdö ki tøŋ ki jiy ma dïpe adäk ni 'näk geni, ni put tïmö na ŋat mo nyeŋŋe owïnyö ni caala nyeŋ jøøa na adäk.

¹⁹ 'Ba ena dhaanhø mo owøørø døc ki røk jø leny moa näk pïëradäk, ni put tïmö ni ena kwääy lwaak marge. 'Ba eni kär pïï kar jøøa na adäk.

²⁰ 'Ba ŋat leny mør mo teek beeye Benaya o Jööda nyï Kapcël. 'Ba ena tïïö ki jap thwønh mo thööth døc. Eni jø Möap ariiø ma jø leny mo teek anääe. Eni thuwø, ena ci yi buur ni 'näge ki ŋuu dïcäŋ aciel ni piny da pey.

²¹ Ni ö nyï Ijepi mo dëëre dwøŋ ni 'näk gø thuwø. 'Ba nyï Ijep mana nääe enø, cere da tøŋ kar kaace. 'Ba Benaya aci baŋ gø ni eni käära athøra, ni cööt tøŋ wøk cer nyï Ijep, ni put gø 'näk ki tøŋ mar gø.

²² 'Ba jammi moøgø beege moa tïïc Benaya o Jööda, ni put tïmö ni nyeŋŋe owïnyö ni caala nyeŋ jøøa na adäk na teek døc.

²³ 'Ba ena bëëdö ni ena dhaanhø mo owøørø ki røk jø leny moa näk pïëradäk. 'Ba eni kär pïï kar jøøa na adäk. 'Ba ena røøny Deebiti na wïth jø koor moe.

²⁴ 'Ba jø møøk mo ge ena røk jøøa näk pïëradäk na teek beege Acaël cöök Jöapi, ki El-Anan o Dödö nyï Bethelem,

²⁵ ki Cimia ki Elieka jø Aaröt,

²⁶ ki Këleth nyï Bëëth-Pëlët, ki Ira wär Ikëc nyï Tëköa,

²⁷ ka Abiedhar nyï Anathöth, ki Mabunay nyï Uca,

²⁸ ki Jaalmön nyï Aköki, ki Maaray nyï Nethöpa,

²⁹ ki Këlëp o Baanaa nyï Nethöpa, ki Itay o Ribay nyï Giba na en kur jø tuuŋ Benjamen,

³⁰ ki Benaya nyï Pirathön, ki Iday nyï waŋ naam Geäc,

³¹ ka Abi-Albön nyï Arba, ka Adhemawët nyï Baurim,

³² ki Eliaba nyï Caalbön, ki Jacen nyï Gidhön,

³³ ki Jönathan o Cimia nyï Arar, ka Akiam o Carar nyï Arar,

³⁴ ki Elipelet wär Acbay nyï Maika, ki Eliam wär Akithöpël nyï Gilö,

³⁵ ki Edharø nyï Karmël, ki Paaray nyï Araba,

³⁶ ki Igal o Nathan nyï Dhöba, ki Bani nyï Gaat,

³⁷ ki Cëlëk nyï Amön, ki Nakaray nyï Bëëröth, nyen wø käär jap leny jï Jöap o Dheruya,

³⁸ ki Ira nyï Jëtër, ki Garëp nyï Jëtër,

³⁹ ko Uria nyï Këth. 'Ba ge bëët gena jiy ma pïëradäk ka abïriiø.