2 Camiel 22 - Wëël Jwøk

Duut Deebit Mana Pwøc Jwøk Ki Gø

¹ 'Ba Deebit duut man acaae ni wär gø jï Wuuö Jwøk ni pwøya gø, ki køør pïëm mana piemi ya Wuuö Jwøki ceŋ nyïïmänne bëët, këël cer Cøøl.

² Ni kööe, «Wui Wuuö Jwøk, ïïna teek mara, ni ïïna kar gwøk røk kipera, ni beeye ïïni wø piem aani.

³ Ïïna Jwøk mara møn, ni teek mara wø jooda baŋï, ni beeye ï wø kana raa buutï. Ï caala kwöt leny naa gëëŋŋï gëëŋŋö ki gïï mo leth, ni beeye ï na pïëmi mara, niï caala kiir mo ogeerø ni teek kipera, ni beeye ï wø kana raa buute; ïïna pïëmi mara, ni beeye ï wø køny aani yïth gïï mo leth.

⁴ «Wui Wuuö Jwøk, ï na näk orømø ki pwøc, kany wø kwaa ïïni, a wø putï ka køny ceŋ nyïïmänna.

⁵ Kiper aana bëëdö ni aano ciel thøø dïër kaamar dhaanhø mo omaa athage dï naam, ni ö ränynyö mo päl ni pïïe bääta kaamar naam mo pänhnhö.

⁶ Kar thøø atïmö ni cään ki aani, naa ee meenø kaamar thøøl, ni thøø bëëdö naa ee ciiø kaamar abïëp.

⁷ Wui Wuuö Jwøk, kanya ena yïth gïï mo leth, aana jwöŋö dëërï; aana jwöŋö dëërï møn, ï na Jwøk mara, ni ö dwøra ni wïnynyï gø niï ena kar bëëtö marï. Aana jwöŋö kiper køny, ni putï gø wïnynyö møn.

⁸ «'Ba ki køør teegï, piny aput tïmö ni kwanynyi ni jäŋŋi, ni ö kwöra näk maal ocwää rege ni putge rege tuk, ni putge tïmö ni jäŋŋi ki køør wëër marï.

⁹ 'Ba kanya jwïëyï ki jwïëy mo dwøŋ, jïrö mo päl aput nitul ki ummï, ni ö maaci ki cuk mo oäpö mo jiy di thöörö ni öge wøk ki dhiï.

¹⁰ Wui Wuuö Jwøk, maal ajapï ni ööï piny, ni kanya cäädhï, kuna näk da tietï piny da pöölö mo cøl døc.

¹¹ 'Ba ïïna put mäännö niï ena bäät nyïïatwiel maal mana cwøl ni kirubël; niï määnni ka yi jamø.

¹² 'Ba deŋŋï bäre atïïyï na muudhö, ni ö pøølli mo nëëni na køth ni put maal gääbö.

¹³ Ni ö agaackøthi mana mal nyïmï ni put liel na maac.

¹⁴ Wui Wuuö Jwøk, dwørï awïnyö kaamar køth mo pöödö maal, ni caanï marï, ï na Jwøa Dwøŋ ni en Maal.

¹⁵ Ni tïïyï køth nee pööde bäät nyïïmän, ni caala man wø thöödhö ka athëëre, ni ö nyïïmän ni putge keethø, ni putï wïthge kier ka agaackøth.

¹⁶ Wui Wuuö Jwøk, kanya wëërï ki nyïïmännï niï jooga geni, kanya jwïëyï ki jwïëy mo dwøŋ, tiet ŋøøm aput nëënö, ni ö pï naama dwøŋ ni pääŋge rege këël mana nëën ŋøømmi.

¹⁷ «Ï na Wuuö Jwøk, cerï arwääï niï ena maal, ni lwørï aani; ni kälï aani wøk ki yi bëëtö mo leth, ni caala man wø lääm dhaanhø wøk ki tiet pïï.

¹⁸ Aana piemï ceŋ nyïïmänna moa bëëdö ni teeka ge bääta, ni beege nyïïmänna moa no okadhø ki teek døc, ni beege jøøa bëëdö ni män ki aani.

¹⁹ Kanya bëëda ni aano ränynyö, nyïïmänna aö maal bääta, 'ba ï na Wuuö Jwøk, ïïna bëëdö niï køønynya aani;

²⁰ ni kälï aani wøk ki kany mo diiny mo jwïëya omiiø yie; ni japï jöö jïra ni dunynya wøk ki yïth gïï mo leth, ni kønyï aani kiper mana bëëdï niï mëër ki aani.

²¹ «Ï na Wuuö Jwøk, aana cunnï ki køør bëëtö mara na beer; ni ŋatï aani ki køør mana waany dëëra ni bäŋ raay.

²² Kiper aana bëëdö ni luupï yaa gwøø, ï na Wuuö Jwøk; ni bäŋ gïn mo raac mo yaa tïïö mo pää aani ki ïïni, ï na Jwøa;

²³ kiper aani luup ŋøl moï bëët ena nyïma, ni kära gaa wøk ki ciik moï.

²⁴ Aana bëëdö ni bäŋ gïn jøøŋŋi ri bëëtö mara nyïmï, ni bëëda ni raa yaa gwøø ki raay.

²⁵ Kiper manøgønø, ï na Wuuö Jwøk, aana cunnï ki køør bëëtö mara na beer, ki køør bëëtö mara na bëëda ni dëëra waany nyïmï, ni bääta bäŋ raay.

²⁶ «Wui Wuuö Jwøk, mëër marï ni wø ba jøøl wø nyoothï nyoodhø jï jø wø bëëdö ki bëët-mëër, ni nyoothï bëëtö marï na näk kare jï jø wø bëëdö ki bëëtö ma kare.

²⁷ Tac cwïny marï wø nyoothï nyoodhø jï jø wø bëëdö ni cwïnyge tar; 'ba ï wø bëëdö ni waŋï riek bäät jø wø bëëtö marge ba tiir.

²⁸ Jøøa no ocaarø wø kønyï kønyø; 'ba jø wø töödö, waŋï wø këëta rege ki man dwøgï wïthge piny.

²⁹ «Wui Wuuö Jwøk, ïïna tar mara; ni beeye ï na Wuuö Jwøk wø wiil muudhö mara na tar.

³⁰ Ki køør teek marï, a wø reŋŋa baŋ jø wø ö baŋ twëër; ni beeye ï na Jwøa ni wø mooc aani ki teek mo päära yi kiir mar nyïïmän ki gø.

³¹ «'Ba ï na Jwøk, bäŋ gïn jøøŋŋi ri bëëtö marï, ni luubö marï adïëri; niï bëëdö niï caala kwöt leny jï jiy bëët mo wø kan rege buutï.

³² ?Aŋø, da jwøk mør këët mo caala ïïni, ï na Wuuö Jwøk? ?A da ŋat mo teek mo caala ïïni, ï na Jwøwa?

³³ Beeye ï Jwøk na näk kar gwøk røk mara mo otïïö ni teek; ni beeye ï wø tïïc bëëtö mara ni bäŋ gïn jøøŋŋi ree.

³⁴ Tieta akwathï ni tïmge ni jööt ni caala tiet aŋer, ni tïïyï aani naa cuŋŋa naa teek kwöra perge leth na en bäät thuuri.

³⁵ Aana pwönynyï ki jïëth leny, ni tïme ni løny jïra ki man thöödha ka atheerø ma atum mare tïïc ka nywïënyö ma jwïël.

³⁶ 'Ba ï caala kwöt leny jïra ni wø piem aani, ni ö kønynyi marï ni put kara tïïc ni dwøŋ.

³⁷ Waŋjöö ajapï ni dwøŋ nyïma, ni kära tiera cwaanyø.

³⁸ «Aani, køør nyïïmän 'moa aŋwiea ni puta wïthge dïïr, ni kära duu ŋääa këël mana ö nyïïmänna na thumge.

³⁹ Nyïïmän 'moa wïthge adïïra møn, ni puta ge nyath na bäre, ni tïme ni ba løny jïge ki man öge maal këët; ni putge bëëtö ni geno pädhö tieta.

⁴⁰ Ï na Wuuö Jwøk, aana mooyï ki teek mo këëda ki gø ri leny, ni ö jøøa ö maal bääta ni putï wïthge dwøk piny jïra.

⁴¹ Ïïni, nyïïmänna atïïyï nee ŋäthge luuge baŋa ni reŋge, ni ö jøøa bëëdö ni män ki aani, ni puta ge thöör.

⁴² 'Ba kanya nëënge, bäŋ ŋat mo okøny geni. Këël mana kwacge ïïni, ï na Wuuö Jwøk, bäŋ gïn mo iï løø jïge.

⁴³ Køøre nø, gena puta nyath këël mana tïmge ni caala tør, ni nyøra geni kaamar odhöönh mo ena dï jöö.

⁴⁴ «Aana kønyï ceŋ jø powa moa bëëdö ni gëëmö ki aani; ni tïïyï aani nee wïth juurre tïmge ni ena tiera; këël wïth juurre mo kuua, ge puta bëëtö ni ge bëënna aani.

⁴⁵ Juurre mo path, a wø wøørge wøørø ni dëëtge rïïŋö ki lwär, ni kany wø cääna ki ge, dwøra wø leŋge leŋø.

⁴⁶ 'Ba geni, bäätge wø pädhö, ni öge wøk yïth kiiri moge moa no ogeerø ni teek ni dëëtge kwanynyi.

⁴⁷ «Wui Wuuö Jwøk, ï nut niï kwøw møn. Pwøc en jïrï, ï na teek mara; beerra man ö nyeŋŋï ni wïnye, ï na Jwøa teek ni wø piem aani.

⁴⁸ Beeye ï na Jwø wø cool kwöra dëët nyïïmänna, ni wø tïïc wïth juurre nee bëëtge ni ena tiera.

⁴⁹ Beeye ï thuwø ni wø køny aani ceŋ nyïïmänna; ni tïïyï jøøa ö maal bääta nee bëëtge ni ena tiera; ni kälï aani wøk ceŋ jø kwöri.

⁵⁰ Wui Wuuö Jwøk, ï pwøa pwøø dï wïth juurre kiper gïïa tïïyï bëët, ni wära ki duut naa pwøya nyeŋŋï.

⁵¹ Beeye ï wø køny aani, a na tïïyï na nyeya; ni ö mëërri marï na näk ba jøøl ni putï gø nyooth jïra, a na tïïyï nee wïïa thïïmmi ki maaw niï røønya aani; ni ö mëërri manøgø ni put bëëtö ni nut kipera, a na Deebit en. 'Ba put mëër manøgø tïïc nee pïïe baŋ nyïïkwaaya ni ba cuŋ.»