2 Camiel 2 - Wëël Jwøk

Kanya Ö Deebiti Na Røønyi Na Nyeya Bäät Jø Tuuŋ Juuda

¹ 'Ba na tïme na køøre cään, Deebit Wuuö Jwøk apëënynye ni kööe, ni «?Cøøa pääny aciel røk päänye mo jø tuuŋ Juuda naa bëëda yie?» Køøre Wuuö Jwøk aköö jïre, ni «Ciï.» 'Ba Deebit acäŋ köö, na «?A cøøa yi mane?» Ni kö Wuuö Jwøki, ni «Ci Keeprön.»

² Kanyøgønø, Deebit aput ci kunece ki määre karge riet, ni beege Akinaam nyi jø Jedhriel ka Abigël cï Nabal nyï Karmël, dhaaŋŋa näk odööŋ na cï thøø.

³ Ni ö Deebiti ni aae ki jø leny moe moa bëëdö ki eni, ni ŋati man nø rege aay ka jøøa en paare; ni putge pï piny, ni bëëtge yïth päänye mo Keeprön.

⁴ Køøre jø døøŋŋø mo jø tuuŋ Juuda gena öö ni thïïmge wï Deebit ki maaw ni ge røønya gø na nyeya bäät jø tuuŋ Juuda. 'Ba acaange jï Deebit ni köge, ni «Beege jø Jabic-Gelät na koony Cøøl.»

⁵ Køøre Deebit ajääk baŋ jø Jabic-Gelät ki jiy, ni kööe jïge, ni «Uuno gwïëth Wuuö Jwøki kiper mana nyoothu mëër maru jï nyenynyu ma Cøøl ki køør mana koonynyu eni.

⁶ 'Ba ennø, beerra man ö Wuuö Jwøki ni nyooth adïëri mare ki mëër mare ni wø ba jøøl jïïu; këël aani thuwø, gïn mo beer otïïa kiperu, ki køør gïna nø tïïyu.

⁷ Ennø, beerra man magu rou ni bëëdu nou teek; këël na bëëde ni nyenynyu ma Cøøl othøw, jø tuuŋ Juuda aana nø røønyge na nyeya bäätge ni thïïmge wïïa ki maaw.»

Kanya Ö Abinërri Na Røøny Icböcëth Na Nyeya Bäät Jø Icriel

⁸ 'Ba kar kaagø, Abinër o Nër na näk kwääy lwaa leny mar Cøøl, Icböcëth o Cøøl ee nø käl ni kïth gø løø Naam Jördan løøga, yi pääny mana cwøl ni Maanayim.

⁹ Ni røøny Icböcëth na nyeya bäät jø Gelät, ki jø Acër, ki jø Jedhriel, ki jø tuuŋ Ipariem, ki jø tuuŋ Benjamen, këël bäät jø Icriel bëët.

¹⁰ 'Ba kanya tïm Icböcëthi o Cøøl na nyeya bäät jø Icriel, cwiiye oløny na pïëraŋween, ni bëëde na nyeya ki cwiiri ariiø. 'Ba jø tuuŋ Juuda gena bëëdö ni ge bëënna Deebit.

¹¹ 'Ba cwiiri moa beet Deebiti ni ena nyeya Keeprön bäät jø tuuŋ Juuda beege cwiiri abïriiø ki dwäde abïciel.

Luum Leny Mana Tägö Yïthakic Jic Abinër Ki Jic Jöap

¹² 'Ba Abinër o Nër atïŋŋö ki Maanayim ni ci Gibien ki jø leny mo Icböcëth o Cøøl.

¹³ Ni ö Jöapi o Dheruya ki jø leny mo Deebit ni tïŋge, ni røømge bäät puul mana en Gibien; ni pïge piny, ni jø leny mo Icböcëth ge ena løø puul løøk maya ni jø leny mo Deebit ge ena løøk maya.

¹⁴ Køøre Abinër aköö jï Jöap, ni «Beerra man ö jiyi moa dëëtge teek røk jø leny 'moø ni öge maal nee këëtge nyïmmø.» Ni put Jöapi jïëy ni kööe, «Wøp, öge maal.»

¹⁵ Kanyøgønø, jiy apaar kurriiø røk jø tuuŋ Benjamen aput ö maal røk jø leny mo Icböcëth o Cøøl, ni ö jiyi apaar kurriiø thuwø ni öge maal røk jø leny mo Deebit.

¹⁶ Ni ö ŋati man nø ni put nyimänne mak ki wï gø ni cööpge dëëtge ki caakïïne ki tiet butge, këël mana putge pädhö na aciel ni marge thøø. Kanyøgønø, pwöl Gibien manøgø aput cwøl ni Këlkath-Adhurim, na näk tiere beeye pwöl caakïïne.

¹⁷ 'Ba ki dïcäŋögø, leny aput tïmö ni teek døc, ni ö jø lenynyi mo Deebit ni böötge Abinër ki jø leny mo jø Icriel møga.

¹⁸ 'Ba kar kaagø, wäät Dheruya karge dääi ge ena kaagø, ni beege Jöap, ka Abicay, ka Acaël; 'ba Acaël ena dhaanhø mo rïïŋö døc ni caala aŋer.

¹⁹ Køøre Acaël køør Abinër aŋwiee døc ni ba gaa bäät cwïïe wala bäät caame.

²⁰ 'Ba Abinër alwïthö køøre ni kööe, na «?Aŋø, ïïna Acaël, ni rïïŋï køøra en?» Køøre aløk Acaël, ni «Beeye aani.»

²¹ 'Ba Abinër aköö jïgø, ni «Gaa bäät cwïï wala bäät caamï, ni ŋwieyï køør dhaanhø aciel røk jø leny moø ni rïïŋi yøø, ni magï gø, ni kälï jape moa en dëëre kiper dëërï.» 'Ba Acaël yie kär tïmö ni met ki man gaae ni wec køør Abinër ki ŋwiec.

²² 'Ba acäŋ Abinërri nwøyø jï Acaël ni kööe, ni «Gagï. Wec køøra ki ŋwiec. ?Aŋø, ï manynya gø niï nääa? ?A ni näk miï yaa nääø, waano bëëtwa nidïï ki coku ma Jöap?»

²³ 'Ba Acaël akweer ki man gaae; køøre Abinër Acaël aput cwøp ki thiir tøŋ ki yi gø, ni ö thiir tøŋŋi ni put tuny wøk ki dïŋääe. Ni put pädhö kaace ni put thøø. 'Ba jø leny bëët mo wø pïï kanya näk Acaël opädhö yie no othøw, ge wø puta cuŋŋö kaace.

²⁴ 'Ba Jöap ka Abicay køør Abinër aputge ŋwiec; 'ba kanya tïm cäŋŋi ni pätha piny, gena pïï bäät thuura cwøl na Amma, na en buut Giia, waŋjöör dï paap Gibien.

²⁵ Kanyøgønø, jø leny mo jø tuuŋ Benjamen rege acooŋge dëër Abinër ni tïmge na dhøk aciel, ni cuŋge bäät thuur mør kaace.

²⁶ Køøre Abinër Jöap arwaae ni kööe, na «?Aŋø, dëëtø putø ka thöör na bäre bäre møn ennø? ?Aŋø, kuyï ni ya aŋuunne, luubö man tïmö ni keec? ?A këël yi wäne nø noo bëëdï ni ba caanï jï jiyï ki man døøkge ni wecge køør nyïïmëëkge?»

²⁷ 'Ba Jöap aköö, ni «Ŋëët Jwøa kwøw, doo na bäŋ gïn mo iï caanø ennø, ka adïëri møn, wa doo puta rïïŋö køøru, u na nyïïmëëkwa, këël diøø ka amöölla.»

²⁸ Kanyøgønø, Jöap tuuŋ aput kooth; ni ö jiye bëët ni putge cuŋŋö ni kärge køør jø Icriel møga ŋwieø këët, këël mana putge leny wec.

²⁹ 'Ba Abinër ki jø leny moe gena aay ni ge cøra goor Jördan ni wø cwøl na Araaba, ni cääthge ki yi wäär bäre; køøre Naam Jördan aŋølge, ni cääthge ka amöölla bäre, ni pïïcge Maanayim.

³⁰ Køøre Jöap aduuö ki kuna ŋwiec køør Abinër; 'ba kanya cooŋ jø leny bëët kanya aciel, da jø leny mo Deebit ma apaar ka abïŋween mo tøør; 'ba Acaël kär kwaan rege.

³¹ 'Ba jø leny mo Deebit, jiy moa 'näkge røk jø leny mo Abinër beege jiy mo thööth ma dïpe adäk ki pïërabïciel, ni jøøgø käla ri jø tuuŋ Benjamen.

³² Køøre Jöap ki jiye dëër Acaël akälge, ni kïthge gø yi bwöc wänni na en Bethelem. 'Ba gena aay ni cääthge ki yi wäär bäre këël mana ruu øwi bäätge Keeprön.