2 Camiel 19 - Wëël Jwøk

Kanya Ö Jöapi Na Jääl Deebit

¹ Køøre acaan jï Jöap ni køp, ni «Neenï, nyeya bëëdö ni jwöŋö, ni kïmmö kiper thøw Abëcëlöm.»

² 'Ba met ec mana di yïth jø leny mïnnö ki gø dïcäŋeca kiper mana kääthge, ree awiile na kïmmö jï jø leny bëët, kiper awïny jø lenynyi dïcäŋeca ni køp, ni «Nyeya kïmmö kiper wääde.»

³ 'Ba dïcäŋeca jø leny gena put ci yi pääny ni rege kwaalge kwaalø, kaamar jiy mo ceŋge okaadhø ri leny ni reŋge ni wïthge olääö.

⁴ 'Ba kar kaagø, nyeya nyeŋŋe ee rïëbö, ni jwöŋö ni dwøre ee tïŋ maal ni kööe, «Wui wääda ma Abëcëlöm, wui Abëcëlöm, wääda, wui wääda.»

⁵ 'Ba Jöap aö baŋ nyeya yi øtø mana en yie, ni kööe, ni «Dïcäŋi wïth jø leny moï bëët anø lääï, ni beege jøøa piem ïïni, ki wäätï, ki nyïï, ki määrï bëët dïcäŋi en,

⁶ ni tïmï niï mëër ki jøøa män ki ïïni, ni männï ki jøøa mëër ki ïïni. Kiper dïcäŋi marï anyoothï ni kwääc lwaae ki jø leny moï bäŋ karge ki jïrï. 'Ba aani, ŋääa dïcäŋi ni doo na Abëcëlöm kwøw ennø, ni waani bëët waano thøw, yiï doo met.

⁷ 'Ba ennø, ö maal ni ciï wøk baŋ jiyï, ni cäänï ki geni ni täärnyïmï leer, kiper aana kööŋ ŋëët Wuuö Jwøk, ni näk miï ba ci baŋge, ka adïëri møn, bäŋ ŋat mo dööŋ ki ïïni kany këël dïwääni. 'Ba luubö man tïmö ni leth døc kiperï ni kaala moa leth na nø pïï bäätï ki mana täge ki thïnhö marï këël kawaane ennø.»

⁸ Kanyøgønø, nyeya aput ö maal ni ci kuna pï piny dhi kiir kar acooŋa. 'Ba kanya caani jï jø leny bëët, ni køp, ni «Neennu, nyeya opï piny dhi kiir kar acooŋa», jø leny bëët gena put ö nyïm nyeya. 'Ba kar kaagø jø Icriel moa en dëër Abëcëlöm geno nø bwøk, ni ö ŋati man nø ni reŋ paare.

Luum Duun Deebit Paac

⁹ 'Ba wïth tuŋi mo jø Icriel bëët geno løny ni ge jälla rege keerge, ni ge köö, ni «Nyeya ma Deebit øøna pieme ceŋ nyïïmän moø, ni køny øøni ceŋ jø Pilitin; 'ba ennø, ena nø reeŋø paac ni ŋwieya Abëcëlöm.

¹⁰ 'Ba Abëcëlöm na wïïe thïïmmø ki maaw na røønyø na nyeya bäätø, anø thøø ri leny. ?'Ba ennø, u lïŋu aperŋø ni nyeya ma Deebit ba duu paac?»

¹¹ 'Ba luup moa car jø Icrielli awïny nyeya ma Deebit kanya bëëde yie. Køøre ena jääk baŋ Dhadök ka Abiethaar na näk Dïlämme Moa Døøŋŋø, ni kööe jïge, ni «Cäänu ki jø døøk Juuda, ni kööu, na ‹?Aŋø, u ba tïmu aperŋø ni uuna jiy moo kwøŋ nyeya duu paare?

¹² Kee uuna nyïïmera, ni øøna remø aciel, ni ø käla ri dëël aciel. ?Aŋø nø, ni dööŋu cään en ki man dwøgu nyeya paare?›

¹³ Køøre thuwø wär caannu jï Amaaca, ni kööu, ‹?Aŋø, ø paa remø aciel, ni ø käla ri dëël aciel? Ennø, beerra man ö Jwøki ni tïïe ki gïn mo raac dëëra, ni näk miï ba tïmö na kwääy lwaa leny jïra na kar Jöap ki mano täge ennø.› »

¹⁴ Kanyøgønø, luup moa car Deebiti aput ci cwïny jø tuuŋ Juuda bëët, ni putge cwïnyge løø køør Deebit ni tïmge kaamar dhaanhø aciel. Køøre, jø tuuŋ Juuda gena put jääk baŋ nyeya ma Deebit ki dwøl, ni köge, ni «Duu paac, ni beeye ïïni ki jø kööre moï bëët.»

¹⁵ Køøre nyeya aput duuö ni pïïe bäät Naam Jördan. 'Ba jø tuuŋ Juuda gena put ci Gëlgela ni ge cii kaper nee nyeya jølge, nee eni ŋølge løø Naam Jördan løøga.

¹⁶ 'Ba Cimiy o Gëra, nyï tuuŋ Benjamen mo käla Baurim, alaar öö ki jø tuuŋ Juuda nee ge røømge ki nyeya ma Deebit.

¹⁷ 'Ba Cimiy ööi ka jø tuuŋ Benjamen ma kuma, ni Dhiba ŋat tïïc mar dhi øt Cøøl ööi ka wääte ma apaar kurbïïc ki jø tïïc moe ma pïërariiø; ni laarge reŋ bäät Naam Jördan ni nyeya poot kär pïï kaace.

¹⁸ Køøre naam aŋørge ni ge kaadha jø po nyeya løøga, ni ge tïïya yi nyeya ni met. 'Ba kanya ö nyeya na tïme keda ŋuta løø Naam Jördan ennø, Cimiy o Gëra, ree aput gøø piny nyïm nyeya,

Kanya Ö Deebiti Na Wëën Bääyö Mar Cimiy

¹⁹ ni kööe jïgø, «Wui nyeya, bääyö mara kär kan cwïnyï, ni ba caarï wïïï ki jammi moa reyø na tïïa dïcäŋa ööï wøk ki Jerucalem; 'ba ennø, ï na nyeya mara, kär gïnögø kïth cwïnyï.

²⁰ Kiper aani, a na dhaanhnhï, ŋääa ni aano bääyö; ni ka adïëri møn, beeye tiere gø na ööa dïcäŋi en, ni aana ŋata dïkwøŋ røk jø Icriel bëët na kwøŋ pïï nee røømme ki ïïni, ï na nyeya mara.»

²¹ 'Ba Abicay o Dheruya ajutö ni kööe, na «?Aŋø, Cimiy ba doo nääö kiper ajaany mana jany Deebit, ŋata näk otïïc Wuuö Jwøki nee wïïe thïïmmi ki maaw nee røøny na nyeya?»

²² 'Ba Deebit aköö, «?Wui, wäät Dheruya, a tïïa ŋø ki uuni nø? ?Aŋø, u bëëdö kaamar nyïïmän aperŋø? Kiper u bëëdö na acaara maru ki mara patha aciel. ?Aŋø, dïcäŋi doo da dhaanhø mo di nääö dï Icriel? ?Aŋø, kuua ni aana nyeya dïcäŋi bäät jø Icriel?»

²³ Kanyøgønø nyeya akööŋ jï Cimiy ni kööe, ni «Ïïni, ï ba thøw.»

Kanya Ö Deebiti Na Nyooth Bäth Ec Mare Jï Mepiböcëth

²⁴ 'Ba Mepiböcëth nyikwaar Cøøl aöö nee røømge ki nyeya; ni ööi ni tiete käre lwøø, ni jïëc dhee käre nyaarø, na abïïe moe käre penyø ki mana täge ki dïcäŋ mana ö nyeya ma Deebit na päär wøk yie këël dïcäŋ mana duu nyeya paac yie ni dëëre jööt.

²⁵ 'Ba kanya ö Mepiböcëthi na ööe ki Jerucalem nee røømge ki nyeya, nyeya aköö jïgø, na «?Aŋø Mepiböcëth, aperŋø na kärï aay ki aani?»

²⁶ 'Ba aløk Mepiböcëthi jï nyeya ni kööe, «Wui nyeya, ŋäyï ni aani, a na dhaanhnhï, aana ŋwøl. Neenï, acaana jï ŋat tïïc mara ma Dhiba na arëën mara jiiŋŋe naa aa ki ïïni naa cäädhi ka bääte na bëëde; 'ba aana cøøge.

²⁷ 'Ba eni thuwø, nyeŋŋa anø waae ki ïïni, ï na nyeya. 'Ba ennø, beerra man tïïyï mana beerra eni ki jïrï jaak dëëra; kiper ï na nyeya, leec wïc marï caala leec wïc mar nyïïatwiel maal mar Jwøk.

²⁸ Wui nyeya, jø dhi øt wära bëët doo na rømi ka thøø nyïmï; 'ba aani, a na dhaanhnhï, aana tïïyï naa tïma naa ena røk jø wø cämö ki ïïni na aciel. ?Agïnaŋø noo dööŋ këët nø, noo cäŋa köö ni yiï cwaada cwaadø ki gø?»

²⁹ Kanyøgønø, nyeya aköö jïgø, ni «Kär dee gïn caanï këët nø. Aani mara anø ŋøla, ni ïïni ki Dhiba, pääŋŋu ŋøøm.»

³⁰ 'Ba Mepiböcëth aköö jï nyeya, ni «Beerra man ö Dhiba ni käl ŋøøm bëët; kiper ï na nyeya mara, ïïna nø duu paac ni dëërï jööt.»

Kanya Ö Deebiti Na Nyooth Met Ec Mare Jï Bardhilay

³¹ 'Ba kar kaagø, Bardhilay nyï Gelät onø öö ki pääny mana cwøl ni Rögelim; ni ci bäät Naam Jördan ki nyeya na aciel ni eni jiedha gø løø Naam Jördan løøga.

³² 'Ba Bardhilay oløny na jaal mo dwøŋ, ni cwiiye oløny na pïërabära; 'ba eni, ena bëëdö ni cïpö ki cam jï nyeya kanya bëët nyeya Maanayim, kiper Bardhilay beeye dhaanhø mo okwär døc.

³³ 'Ba nyeya aköö jï Bardhilay, ni «Ï ŋuta løøga ki aani na aciel niï bëëdï buuta Jerucalem.»

³⁴ 'Ba Bardhilay aköö jï nyeya, «?Aŋø, a poot cøøa Jerucalem ki ï na nyeya këët ennø? ?A da cwiiri mo poot beeda beedø naa kwøw?

³⁵ Ennø, cwiiya oløny na pïërabära, ni bäŋ gïn mo beer wala gïn mo raac mo ŋääa këët. Këël cam mo met ki køøŋø mo met ba løny ŋec jïra ennø, ni dööt cwøw ki mään mo wø wär ki dudi bäŋgø mo met mo wïnyi jïra këët. ?Aŋø, a na dhaanhnhï, a cäŋï gø meet bäätï na tëër mør en kiperŋø?

³⁶ Wui nyeya, bäŋ gïn mo manynya këët baŋï mo diï cïbö jïra cøøn. A ööi naa jiedha ïïni løø Naam Jördan løøga keere.

³⁷ Wui nyeya, beerra man døøa, a na dhaanhnhï, naa thøøa yi pääny mar powa buut bwöc wära ki mera. 'Ba ennø, dhaanhnhï ma Kimiam enø, beerra man aayu ki gø, ï na nyeya mara, ni tïïyï gïna beerra eni jïre.»

³⁸ 'Ba aløk nyeya jï Bardhilay, ni kööe, ni «Kimiam, wa aay ki gø møn, ni tïïa jïre ki gïn mo nëëni ni beer ki jïrï. 'Ba gïno pëënynyï aani ki gø jaak ni tïïa, puta ka tïïc jïrï.»

³⁹ Kanyøgønø, jiy bëët aput kath løø Naam Jördan løøga, ni ö nyeya ni kadhe thuwø. Køøre nyeya dhi Bardhilay anuume ni gwïëth gø, ni ö Bardhilay ni put døø kanya bëëde yie.

Kanya Ö Jø Icrielli Ki Jø Tuuŋ Juuda Na Läärge Nyeya Ma Deebit

⁴⁰ Køøre nyeya aci Gëlgela, ni ge aay ki Kimiam na aciel. 'Ba jø tuuŋ Juuda bëët, ki jø Icriel mo nøk, ge cäädhi ki nyeya thuwø.

⁴¹ Køøre jø Icriel bëët, gena ö baŋ nyeya ni köge, «?Aŋø, nyïïmëëkwa ma jø tuuŋ Juuda ï tïïcge gø ni ïïna nyeya marge keerge en aperŋø, ni öge baŋï ni ŋulge ïïni løø Naam Jördan løøi, ni beeye ïïni ki jø paarï, ki jø leny moï bëët moa bëëdö ki ïïni?»

⁴² Kanyøgønø, aløk jø tuuŋ Juuda jï jø Icriel ni köge, ni «Beeye kiper mana näk mo nyeya tuuŋwa døc. ?Aŋø, u gootu kiper luubö man aperŋø? ?Aŋø, waani cam nyeya mo ewa camø wala gïn mo ewa kälö baŋe, dagø?»

⁴³ 'Ba aløk jø Icrielli jï jø tuuŋ Juuda ni köge, ni «Waani, da kurwa mo jïtö ki kwöre apaar dëër nyeya, kiper waana wïth tuŋi apaar, ni løny jïwa ki man köwa ni Deebit beeye nyeya marwa ni pöödha waani ki uuni. ?Aŋø, wa taagu gø aperŋø? ?Aŋø, paa wa na kwøŋ köö dïkwøŋ ni nyeya duu paac?» 'Ba jø tuuŋ Juuda adwögö ki luubö mo teek døc ni kaala mar jø Icriel.