2 Camiel 18 - Wëël Jwøk

Luum Thøø Mar Abëcëlöm

¹ 'Ba Deebit jø leny moa en buute kaagø akwaane ni röönye jïge ki kwääc lwaae mo wø käär jiy ma kume ki mo wø käär jiy ma dïpe.

² Køøre Deebit jø leny moe apääŋŋe na dhøgi adäk. Ni mooc kwääy lwaa leny ma Jöap ki dhøk aciel, ni mooc kwääy lwaa leny ma Abicay, cöök Jöapi o Dheruya, ki dhøk aciel, ni mooc kwääy lwaa leny ma Itay nyï Gëth ki dhøk aciel. 'Ba nyeya ma Deebit aköö jï jø leny, ni «Ka adïëri møn, aani ki dëëra a aa baŋ leny ki uuni na aciel.»

³ 'Ba jø leny aköö, ni «Ïïni, ï ba ci baŋ leny; kiper ni näk mo wa reeŋø, jøw këëdø ki geni, ge ba cädö kiperwa. Këël mo ge 'näga jiy mo thööth døc dëëtwa, ge ba cädö kiperwa na bäre. 'Ba ïïni, perï leth døc ni kaala jiy ma kume apaar røkwa. 'Ba ennø, beerra man kønyï waani niï ena yi pääny kany.»

⁴ Kanyøgønø, nyeya aköö jïge, ni «Gïna beerra eni ki jïïu jaak, tïïa tïïö.» Køøre nyeya acuŋŋö dhi kiir, ni ö jø lenynyi bëët ni cige wøk ni ge cäädhi na lwaae ma dïpe ki ma kume.

⁵ 'Ba nyeya ma Deebit, Jöap ka Abicay ki Itay aköömme, ni kööe, ni «Cädu kipera; kär nou tïïya wääda ma Abëcëlöm ki gïn mo leth.» 'Ba jø leny bëët luubö mana ö nyeya na kööm kwääc lwaae mo leny ki gø kiper Abëcëlöm wïnyö jïge.

⁶ Køøre jø leny gena aa wøk baŋ leny ki jø Icriel, ni ö lenynyi ni këëli yi lur Ipariem.

⁷ 'Ba jø leny mo jø Icriel gena put jø lenynyi mo Deebit böötö. 'Ba jiy moa 'näk kaace dïcäŋeca thööth, ni beege jiy ma kume ma pïërariiø.

⁸ 'Ba leny mana en kaace aput nyaa wøk, ni ö jø lenynyi mo thööth ni thøøge yi lul dïcäŋeca ni kaala jiy moa thøw ri leny.

⁹ 'Ba gïna tägö, Abëcëlöm anigäk ki jø leny mo Deebit. 'Ba kar kaagø, Abëcëlöm cäädhi ka bäät gääŋŋö mare. Køøre gääŋŋö areeŋø ni dønye ki tier jaath mo dwøŋ mo bääte onilway piny. Ni ö wï Abëcëlömmi ni puti ya bäät jaadhøgø mak, ni put dööŋŋö ni lïërö kaace. 'Ba gääŋŋö mana cäädhe ki bäät gø aput reeŋø.

¹⁰ 'Ba kanya ö dhaanhø aciel na joot Abëcëlöm, acaane jï Jöap ni kööe, ni «Ka adïëri møn, Abëcëlöm ajooda ni lïërö tier jaath kaace.»

¹¹ Kanyøgønø, Jöap aköö jï ŋata caan luummögø jïre, ni «?Ka adïëri møn, Abëcëlöm ajootï? ?Aŋø na ba putï gø 'näk kaace en? Aani, gwet-bïrö ma apaar ki kaw mar leny doo na yaa cïbö jïrï en.»

¹² 'Ba nyenøgø aköö jï Jöap, ni «Këël mo gwet-bïrö ma kuma ocïp cera cøøn, aani, cera ba daa kïtha dëër o nyeya; kiper ïïni ka Abicay ki Itay uuna kööm nyeya ni wïnyö jïwa, ni kööe, ni ‹Gwøgu wääda ma Abëcëlöm jïra.›

¹³ A ni näk mo aano tïïö ki gïn mo raac dëëre nø, ni ö nyeya ni wïny gïnögø, kiper bäŋ gïn mooŋ ki nyeya, ïïni ki dëërï, karï tïïyï tïïö ni bäär ki aani.»

¹⁴ 'Ba Jöap aköö, ni «Piny ba dhïëra ki ïïni këët.» Kanyøgønø, theri adäk aput lwør ni ci baŋ Abëcëlöm ni këër gø ki bäät wenynye na Abëcëlöm poot kwøw bäät jaath kaace.

¹⁵ 'Ba jaga na apaar ni wø käär jap leny jï Jöap rege aput cooŋ deŋ Abëcëlöm ni cööpge gø ni putge gø 'näk.

¹⁶ Køøre Jöap tuuŋ aput kooth, ni ö jø lenynyi ni duuge ki kuna ŋwiecge køør jø Icriel, kiper gena män Jöapi ki man ŋwiecge køørge.

¹⁷ Køøre jø leny mo Deebit dëër Abëcëlöm alwørge ni leeŋge gø yi buur mo bäär kaace yi lul, ni löörge kïte mo thööth bääte. 'Ba jø leny mo jø Icriel moa cäädhö køør Abëcëlöm gena bwøk, ni ö ŋati man nø ni reŋ paare.

¹⁸ 'Ba Abëcëlöm, kanya poode ni kwøw, okwøŋ cööth piny ki kïdi na nyuudhi kiper dëëre yi gool mar nyeya, kiper ena köö, ni «Aani, bäŋ wääda mo cwøl nyeŋŋa ree.» Kanyøgønø, eni kïdi manøgø na nyuudhi enø aput caa ri nyeŋŋe, ni puti cwøl ni Kïn Abëcëlöm këël dïcäŋi en.

¹⁹ Køøre Akimaath o Dhadök aköö, ni «Beerra man reeŋa nee waac caana jï nyeya ki man näk mo eno piem Wuuö Jwøki ceŋ nyïïmän moe.»

²⁰ 'Ba Jöap aköö jïgø, ni «Ŋato cii nee waac man caane dïcäŋi paa ïïni; ïïno jïti ki waac mør mo waayï yi nyïme. Kär dee gïn mo waayï dïcäŋi, kiper o nyeya othøw.»

²¹ Køøre Jöap aköö jï nyï Kuuc, ni «Ci kuna caanï gïna jootï jï nyeya.» Kanyøgønø, nyï Kuuc cøŋŋe aput këël piny nyïm Jöap, ni put ö maal ni reeŋe.

²² 'Ba Akimaath o Dhadök acäŋ köö jï Jöap, na «A kwaya ïïni naa reŋŋa køør nyï Kuuc. Nee da gïn mo tägö, bäŋ gïre.» 'Ba Jöap aköö, na «?Aŋø nyie wääda, ï reŋŋï baŋ ŋø? Ï këël doo cøø, kee bäŋ gïn mo magï ree.»

²³ 'Ba Akimaath aköö, ni «Bäŋ gïre jaak, gïno tägi täge, aani, a reeŋø.» Kanyøgønø, Jöap aköö jïgø, ni «Ci reŋï nø.» Køøre Akimaath aput reeŋø ki waŋjöör Goor Jördan, ni put nyï Kuuc kaal.

²⁴ 'Ba kar kaagø, Deebit opï piny dhi kiir. Køøre ŋat wø kurö aeth bäät kiir, ni tïŋ wïïe maal ni räŋŋe. 'Ba ka adïëri møn, dhaanhø mo rïïŋa eni keere aput joot ni rïŋŋö.

²⁵ Kanyøgønø, ŋat koor manøgø aput cwötö ni caan gø jï nyeya. Køøre nyeya aköö, «Ni näk mo ŋatøgø rïŋŋa eni keere, beeye waac mo beer noo käle.» Kanyøgønø, ŋata rïŋŋö aput tïmö ni cäänhnha baŋge.

²⁶ 'Ba ŋat koor acäŋ jïtö ki dhaanhø mør mo rïŋŋö; 'ba ŋat koor manøgø ŋat wø koor dhi kiir acwøle ni kööe, ni «Neenï, dhaanhø mør acäŋ rïŋŋö ni rïïŋa eni keere.» 'Ba nyeya aköö, ni «Ŋatøgø thuwø poot käla waac mo beer.»

²⁷ 'Ba ŋat koor aköö, ni «Ŋata kwøŋ rïŋŋö, rïïŋi keda Akimaath o Dhadök kiree.» 'Ba nyeya aköö, ni «Nyenøgø beeye dhaanhø mo beer, ni waac mano käle beeye waac mo beer.»

²⁸ 'Ba Akimaath acwötö ni kööe jï nyeya, «Wui nyeya, jammi bëët beyø.» Køøre cøŋŋe akëël piny ni kuul wïïe piny nyïm nyeya ni määtha gø. Køøre Akimaath aköö, «Pwøc en jï Wuuö Jwøk, Jwøk marï, na cïp nyimännï cerï, jøøa gëëmö ki ïïni, ï na nyeya.»

²⁹ Køøre nyeya apëëö, «?A wääda ma Abëcëlöm, ba bäŋ gïn mo otägö dëëre?» 'Ba aløk Akimaathi jïre, ni «Kanya ö Jöapi na jääŋ aani, ajooda ni jøw ŋurö døc; 'ba aani gïna ŋur jøwi kipere, tiere kära kwanyø.»

³⁰ Kanyøgønø, nyeya aköö, ni «Nyiik kaace ni cuŋŋï yie.» Ni ö Akimaathi ni ci kaace ni put bëëtö ni cuŋŋö yie.

³¹ 'Ba ka adïëri møn, nyï Kuuc aput pïï, ni kööe, «Wui nyeya, beerra man wïnynyï luummi ni beer en, kiper dïcäŋi Wuuö Jwøk ïïna pieme ceŋ jøøa ö maal bäätï.»

³² 'Ba nyeya nyï Kuuc apëënynye, «?A wääda ma Abëcëlöm, ba bäŋ gïn mo otägö dëëre?» 'Ba aløk nyï Kuuc jï nyeya, «Wui nyeya, beerra man ö nyïïmännï, këël jiy bëët mo ö maal bäätï nee tïïge ki gïn mo raac dëërï, ni tïmge ni caala nyenøgø.»

³³ Kanyøgønø, nyeya cwïnye apädhö døc, ni put eth maal ni døny yi øtø mo ogeerø bäät kiir ni jwöŋe. 'Ba jwøk mana jwøk nyeya ni eni cäädhö yi øtø maal beeye en, ena köö, «Wui wääda ma Abëcëlöm, wääda, wääda ma Abëcëlöm. Beerra mana daa thøw na karï, wui Abëcëlöm wääda, wui wääda.»