2 Camiel 17 - Wëël Jwøk

Kanya Ö Ucay Na Cïp Acaara Mare Ni Nøøna Abëcëlöm

¹ 'Ba na tïme na kaagø, Akithöpël aköö jï Abëcëlöm, «A jëëdö ki jø leny ma kume apaar kurriiø naa läpa køør Deebit dïwääni.

² 'Ba kanyo pïïa ree ni eno ööl ni dëëre ba løny køny jïre, eni puta lwäyö døc, ni ö jiyi bëët moa en buute ni putge bwøk. Køøre nø, eni puta dööŋŋö keere ni puta gø 'näk;

³ ni ö jiyi bëët ni puta ge duu baŋï. 'Ba kanyo nø thøw ŋata manynyï keere, jiy bëët duuö møn; ni jït paaci ki bëët mëër.»

⁴ Kanyøgønø, Abëcëlöm ki jø døøk Icriel bëët yïthge aput tïmö ni met ka acaara manøgø.

⁵ Køøre Abëcëlöm aköö, ni «Ucay nyï Arki cwøl thuwø, nee dwøre mano caane nee wïnynyø.»

⁶ 'Ba kanya ö Ucayi na ö baŋ Abëcëlöm, Abëcëlöm aköö jïgø, na «Akithöpël acaara man anø caane jïwa. ?Ennø, kïthwa acaara man bäät tïïc? Ni näk mo paa kare, caan marï.»

⁷ Kanyøgønø, Ucay aköö jï Abëcëlöm, «Acaara mana cïp Akithöpëlli yie man keere, paa acaara ma wøp.»

⁸ Ni cäŋ Ucayi köö, ni «Ïïni, bëët wäru ki jø leny moe ŋäyï døc, ki man näk mo gena jø leny mo teek ni cwïnyge keec kaamar ŋuu mo nyïïe okälö ki teek dï paap. Këël wäru thuwø, beeye ŋat mo oŋïyö ki leny, ni ba løny ki man but dï jiy jaak.

⁹ Neenï, kawaane en, kanymør wäru ree ee nø kan yi øt kïdi aciel røk uut kïte moa en kunece, wala ree ee kanø kany mør jaak mo kuc. 'Ba ni näk mo jø leny moï okwøŋ Deebiti tuk møn, jøw owïny gø bëët ge puta köö, ni ‹Jiy mo thööth athøw røk jøøa cäädhö køør Abëcëlöm.›

¹⁰ 'Ba këël da ŋat leny mo teek, mo thwønh mare caala thwønh mar ŋuu, eni cwïnye puta bwøk døc; kiper ŋäc jø Icrielli bëët ni wäru beeye ŋat leny mo teek, ni jø leny moe beege jiy mo teek døc ki leny.

¹¹ «'Ba ennø møn, acaara mara beeye ki man cwölï jø Icriel bëët baŋï, ki mano täge ki Daan këël mano këët Bëërcïïba, nee jiy tïmge ni thööth døc kaamar nyeŋ akwöny deŋ naama dwøŋ, ni ö ïïni ki dëërï kiree ni ciï baŋ leny ni jøøgø bwøtha ïïni.

¹² Køøre nø, ø puta pïï ree ni joodø eni kanyo näk ree ee kanø yie, ni putø eni tuk ni ø thööth døc kaawat man wø ö rwöci wø ö piny; 'ba eni ki jø leny moa en buute bëët, puta tïmö ni bäŋ dhaanhø mo bøth këël dhaanhø aciel.

¹³ 'Ba ni näk mo da pääny mo eni reŋŋa yie, ø na jø Icriel bëët en, pääny maneca putø ka wïr ki thøøli ni gøø gø piny, këël mano leeŋø gø ya agäm-kïdi mano en buute kaace, ni ö kar pääny manøgø ni dööŋe ni leer ni bäŋ waŋ kïdi mo joot yie këël mo thiinh.»

¹⁴ Køøre Abëcëlöm ki jø Icriel bëët gena köö, na «Acaara mar Ucay nyï Arki beerra eni døc ni kaala acaara mar Akithöpël.» 'Ba gïnögø bäre tïïya Wuuö Jwøki na acaara mar Akithöpël na beer tïme ni bäŋ tiere, nee eni na Wuuö Jwøk gïn mo leth tïïe dëër Abëcëlöm.

Kanya Ö Deebiti Na Wäänynyi, Ni Put Päär Wøk Ki Kanya En Yie

¹⁵ Køøre Ucay aci baŋ Dhadök ka Abiethaar na näk Dïlämme Moa Døøŋŋø, ni caan acaara mar Akithöpël mana caane jï Abëcëlöm ki jø døøk Icriel, ni caan acaara mare thuwø.

¹⁶ Kanyøgønø, ena köö, ni «Ennø, laaru jääk baŋ Deebit, ni caannu gø jïre ni kööu, ni ‹Dïwääni kärï but dï paap bäät naam kanya näk dïët ki caara, 'ba ï na nyeya, ï doo ŋuta løøga, kiper ni näk miï kär ŋut løøga, ïïni ki jø leny bëët moø en buutï yøø, wïthu dïdö.› »

¹⁷ 'Ba Jönathan ka Akimaath, ge na wäät Dïlämme Moa Døøŋŋø, ge bëëdö ni ge kurö bäät jøøro mana cwøl na Ayn-Rögëël, kiper ge ba many gø nee ge joot ni ge dønynya yi pääny. 'Ba da ŋat tïïc ma dhaagø mo wø cøø ni caan gïïa tägö jïge, nee tïme ni løny jï jagøgø ki man cige ni caange gø jï Deebit.

¹⁸ 'Ba da nyen mo jagøgø ee joodø, ni cøøe ni waac gø jï Abëcëlöm. Kanyøgønø, jagøgø karge riet gena laar reeŋø ni cige Baurim baŋ nyen mør mo jïre da iith yi kal mare, ni putge døny yie ni ge kana rege.

¹⁹ Køøre dhaagø mana en kaace, rëëbi alwøre ni rïëp gø bäät iith, ni määc beel yi rëëbi manøgø kiper nee bäŋe ŋat mo dïëta gø.

²⁰ Køøre jic Abëcëlöm aö baŋ dhaagø manøgø paare ni köge, «?Aŋø, Akimaath ki Jönathan enge kaa?» 'Ba dhaagø manøgø aköö jïge, ni «Gena nø kath løøga ni aacge.» 'Ba kanya ö jic Abëcëlömmi na määnyge, Jönathan ka Akimaath kärge joodø, ni putge døø paac yi Jerucalem.

²¹ 'Ba kanya tïme ni jic Abëcëlöm onø aay, Jönathan ka Akimaath gena put duny wøk ki yi iith ni cige ni caange dwøl jï nyeya ma Deebit, ni köge, ni «Ö maal ni laarï ŋut løø naam løøga, kiper Akithöpël acaara mo raac anø caane kiperï.»

²² Køøre Deebit ki jiy bëët moa cäädhe ki geni, gena put ö maal ni ŋølge Naam Jördan. 'Ba na tïm pinynyi na amöölla, bäŋ dhaanhø mo odööŋ ni Naam Jördan käre ŋølø.

²³ 'Ba kanya jooti ya Akithöpëlli ni køør acaara mare kär caadhø, arëën mare ajiiŋŋe ni tïŋŋe ni ci paare na en pääny poge, ni jiiŋ jap paare na karge, ni put ree lïër ni thøøe. Køøre ena kïth yi bwörö mar wänni.

²⁴ 'Ba kar kaagø, Deebit onø pïï pääny mana cwøl ni Maanayim. Ni ö Abëcëlömmi ni put Naam Jördan ŋøl, ni beeye eni ki jø leny mo jø Icriel bëët.

²⁵ 'Ba Abëcëlöm Amaaca acuume na kwääy lwaa leny na kar Jöap. 'Ba Amaaca wänni beeye Jëtër nyï Icmiel, ni beeye Jëtër na ci baŋ Abigël nyi Naøc na dhaagø. 'Ba Abigël beeye cöök Dheruya mana näk dhaagø, ni beeye Dheruya mii Jöapi.

²⁶ 'Ba Abëcëlöm ki jø leny mo jø Icriel twïër marge atïïcge yi ŋööm Gelät.

²⁷ 'Ba kanya ö Deebiti na pïïe Maanayim, Cööbi o Naøc, ŋat mo käla pääny jø Amön mana cwøl ni Raaba, ki Makir wär Amiel, ŋat mo käla pääny mana cwøl ni Lödebaar, ki Bardhilay nyï Gelät, mo käla pääny mana cwøl ni Rögelim,

²⁸ gena kännö ki jap niine, ka athääe, ki dääe, ki beel, ni beege cïndë ki gäbci, ki muunni, ki beel mo omuuö, ki ŋööri, ka adaci,

²⁹ ki maar kïc, ki caak ma dïïle, ki dïëk, ki mäth dhäk. 'Ba caammi moøgø bëët kälge jï Deebit ki jøøa cäädhe ki geni nee camge. Kiper gena köö, ni «Jiy oööl, ni geno 'näk käci ki riew dï paap.»