2 Camiel 14 - Wëël Jwøk

Luum Duun Abëcëlöm Jerucalem

¹ 'Ba aŋäc Jöapi o Dheruya ni nyeya cwïnye ena køør Abëcëlöm døc.

² Køøre Jöap ajääk baŋ dhaagø mo ena Tëköa mo waŋe riek, ni put dhaaŋŋøgø öö. Ni kö Jöapi jïgø, ni «Nyijøøe, tïïc riï niï kïmmö keda ï ena bäät thøø, ni kïthï dëërï ka abïïk thøø, ni ba wïïrï dëërï ki maaw; 'ba tïïc dëërï kaamar dhaagø mo oruu ni kïmmö kiper dhaanhø mo othøw.

³ Køøre nø, wärï ci baŋ nyeya ni caanï luup jïre moo caana jïrï ennø.» Køøre Jöap luup moøgø aput cïp dhi nyijøøgø.

⁴ 'Ba kanya ö nyijø Tëköa na ci baŋ nyeya, cøŋŋe akëël piny ni kuul wïïe piny ni määtha gø, ni kööe, «Wui nyeya, køny aani.»

⁵ 'Ba nyeya aköö jïre, na «?Agïnaŋø na tägö riï?» 'Ba aløk nyijøøgø jïre, na «Adïëri møn, aani, cwøra othøw, naa bëëdö ni aana cï thøø.

⁶ 'Ba a na dhaanhnhï da wääta ariiø. 'Ba obwöre moø na ariiø yøø, gena këëdö paap; 'ba bäŋ dhaanhø mo othääk ge. Kanyøgønø, dhaanhø aciel rege, coki agøøe ni 'näk gø.

⁷ 'Ba ennø, jø paara bëët gena ö maal bääta, a na dhaanhnhï, ni köge, ni ‹Cïp wäädï mana 'näk coki nee 'näkwa na kwör coki na nääe. Waani, wäädï manøgø na lwiidhø enøgø, 'näkwa nääö.› 'Ba geni, ge raanynya wïïa mana no odööŋ, nee cwøra dööŋe ni bäŋ wïïe mo dööŋ bäät piny.»

⁸ Køøre nyeya aköö jï nyijøøgø, ni «Beerra man ciï paarï. Aani da gïn mo tïïa tïïö kiper luubö marï.»

⁹ 'Ba nyijø Tëköa manøgø aköö jï nyeya, «Wui nyeya, ni näk mo luummögø tïmö ni raac, ajäla mar luummögø puta tïmö ni ena bääta ki dhi øt wära; 'ba ï na nyeya këël ki nyec marï bäŋ ajäla bäätï.»

¹⁰ Kanyøgønø, nyeya aköö, ni «Ŋat mo poot bëëdö ni cwaata yiï kiper luummögø, wär käl baŋa, nee yiï ba cwaade këët.»

¹¹ 'Ba nyijøøgø aköö, «Wui nyeya, beerra man kööŋï ŋëët Wuuö Jwøk, Jwøk marï, kiper nee jøø ni many gø nee kwör remø coolge enø nee ge ba cutge këët, ni ba raanyge jwïëc wääda.» 'Ba aløk nyeya jïre, ni «Ŋëët Wuuö Jwøk, Jwøa kwøw, bäŋ jëën wï wäädï aciel kiree mo päth piny.»

¹² 'Ba nyijøøgø aköö, «Wui nyeya, naa cäänna ki luubö aciel keere.» Køøre nyeya aköö, ni «Caanï nø.»

¹³ Kanyøgønø, nyijøøgø aköö, «?Wui nyeya, aŋø, teeŋ luum caana jïrï en tïmmï gø ŋø dëët jic Jwøk ni beege jø Icriel? ?A ki køør luubö mana nø caanï kawaane ennø, ï na nyeya, ï ba jääl dëërï keerï? Kiper wäädï mana reeŋø kärï wëënnö nee duu paac.

¹⁴ Ka adïëri møn, øøni ø thøw kaawat man bëëde ni pïï mo oøøc piny ba løny ki jøøp këët. 'Ba Wuuö Jwøk jwïëc dhaanhø ba raanynye; eni määnyö ki jöö nee dhaanhø mo oreeŋø ki køør gïna baae nee duu baŋe, ni ba bëëde ni tøør dëëre.

¹⁵ «'Ba ennø, gïna ööa kany kipere nee luummi en caana jïrï, ï na nyenynya, beeye ni jø paara aana tïïcge naa lwäya; ni beeye ni kööa ennø, ni ‹Beerra man cøøa nee luummi caana jï nyeya. Kanymør nyeya gïno pëënynya eni ki gø tïïe tïïö jïra.

¹⁶ Kiper nyeya luummi wïnynye wïnynyö ni piem aani ceŋ jøøa many jwïëcwa ki wääda, nee raanyge, nee wa tïmwa ni wa tøør bäät ŋöömma cïp Wuuö Jwøki.›

¹⁷ «'Ba a na dhaanhnhï, aana köö, ni ‹Beerra man ö dwør nyenynya ni cøm cwïnya, kiper leec wïc mar nyeya caala leec wïc mar nyïïatwiel maal mar Wuuö Jwøk, ni løny jïre ki man ŋøl luubö mana beer ki mana raac. 'Ba ennø, ï na nyeya, Wuuö Jwøk, Jwøk marï, bëëde ki ïïni na aciel.› »

¹⁸ 'Ba aløk nyeya ni kööe jï nyijøøgø, ni «Nyijøøe, gïno pëënynya ïïni ki gø en, kär mooŋï.» Ni kö nyijøøgø, «Wui nyeya, pëëï.»

¹⁹ Ni kö nyeya, ni «?Luubö man bäre en, cer Jöap ba en yie wän?» 'Ba aløk nyijøøgø ni kööe, «Wui nyeya, ŋëëtï keerï, mana caanï enøgø beeye kare. Ka adïëri møn, beeye dhaanhnhï ma Jöap na kööm aani, ni beeye eni na cïp luubö man bäre en dhaa, a na dhaanhnhï.

²⁰ Dhaanhnhï ma Jöap gïn en atïïe ni tiira luubö man. 'Ba ï na nyeya mara, wïïï leer kaamar nyïïatwiel maal mar Jwøk, ni jammi bëët mo wø en bäät piny ŋäyï.»

²¹ Køøre nyeya, Jöap acwøle ni kööe jïgø, ni «Neenï, ka adïëri møn, gïnögø ni manynyï enø tïïa tïïö; ennø, ci baŋ Abëcëlöm ni duuï gø paac.»

²² Kanyøgønø, Jöap cøŋŋe aput këël piny ni kuul wïïe piny ni pwøc nyeya; køøre Jöap aköö, «Wui nyeya, dïcäŋi aŋääa ni yiï met ki aani møn, a na dhaanhnhï, kiper na nø jïëyï gïna pëënynya ïïni ki gø.»

²³ Kanyøgønø, Jöap aput ö maal ni ci Gëcur baŋ Abëcëlöm, ni duu gø Jerucalem.

²⁴ 'Ba nyeya aköö, ni «Beerra man døø Abëcëlömmi paare, 'ba kär täärnyïme jooda kany.» Kanyøgønø Abëcëlöm aput døø paare; 'ba täärnyïm nyeya käre joodø.

²⁵ 'Ba ki dï Icriel bäre bäŋ ŋat mo kïte mïërö mo opwøc jiyi døc mo caala Abëcëlöm. Ki mana täge ki tiete këël mana pïïe wïïe bäŋ gïn mo di jøøŋŋø dëëre.

²⁶ 'Ba Abëcëlöm jïëye thööth døc; 'ba ki yi cwiir cooth wø di nyaarø kiper man wø tïmge ni thööth ni peek. 'Ba kany wø rømi, tïmö na rumme ma dïpe ariiø mar rumi mana cwøl ni cekel.

²⁷ 'Ba Abëcëlöm jïre da wääte adäk ki nyaare aciel mo nyeŋŋe cwøl ni Tamar; 'ba Tamar beeye nyaan mo kïte mïërö.

²⁸ 'Ba Abëcëlöm abëëdö Jerucalem ki cwiiri ariiø, ni täärnyïm nyeya käre joodø.

²⁹ Køøre Abëcëlöm ajääk baŋ Jöap, nee Jöap jääŋŋe baŋ nyeya; 'ba Jöap yie kär met ki man ö baŋe. Køøre ena cäŋ jääk bäŋ Jöap ri rietge; 'ba Jöap yie poot ba met ki man ööe.

³⁰ Kanyøgønø, Abëcëlöm aköö jï jiye, ni «Neennu, pwöth Jöap ena buut pwötha, ni eni jïre da gäbci yi pwöthe kaace; cou ni waaŋŋu pwöthe.» Køøre jic Abëcëlöm pwöth Jöap aputge waaŋ.

³¹ Kanyøgønø, Jöap aö maal, ni ci baŋ Abëcëlöm paare ni kööe jïgø, na «?Aŋø, jiyï waaŋge pwödhö mara aperŋø?»

³² 'Ba aløk Abëcëlömmi jï Jöap, ni «Neenï, aana jääk baŋï ki dhaanhø kiper niï ööï, niï jääŋŋa baŋ nyeya, nee caanï jïre na Abëcëlöm aköö, ni ‹Aano ööma ŋø ki Gëcur? ?Aŋø, ba beerra mana daa poodø naa ena kunece na bëëde?› 'Ba ennø, ï na Jöap en, a manynya man jooda täärnyïm nyeya; ni näk mo da gïn mo yaa baaø, beerra man ö nyeya ni 'näk aani.»

³³ 'Ba kanya ö Jöapi na ö baŋ nyeya na caan luummögø jïgø, nyeya Abëcëlöm aput cwøl. Ni ö Abëcëlömmi baŋ nyeya ni këël cøŋŋe piny ni kuul wïïe piny nyïm nyeya; ni ö nyeya ni nuum dha Abëcëlöm ni määtha gø.