2 Camiel 13 - Wëël Jwøk

Luum Amnön Ki Tamar

¹ 'Ba kar kaagø, Abëcëlöm o Deebit da coki ma dhaagø mo mïërö døc mo nyeŋŋe cwøl ni Tamar; 'ba Amnön o Deebit mëër ki nyiwänni ma Tamar døc.

² 'Ba Amnön yie ocwat acaac nyiwänni døc, ni put tïmö ni tuu. 'Ba Tamar ena nyakøø mo dëëre poot kuc dïcwøø, ni ki jï Amnön beeye gïn mo teek ki man tïïe ki gïrpiny dëër gø.

³ 'Ba Amnön do owänni mo nyeŋŋe cwøl ni Jönadap o Cimia cöök Deebiti; 'ba Jönadap ena dhaanhø mo waŋe riek døc.

⁴ Køøre Jönadap aköö jï Amnön, «Wui o nyeya, ?aŋø ni bëëdï niï dwada nyïme jaak en? ?Aŋø, gïnögø ni dwaat ïïni enø ba caanï jïra?» 'Ba Amnön aköö jïre, ni «Aani, a mëër ki Tamar døc, cöök owära ma Abëcëlöm.»

⁵ 'Ba Jönadap aköö jï Amnön, ni «Ci but piny bäät pëëmï ni cøøgï riï keda täw okadhø; 'ba kanyo ö wäru noo lïïm ïïni, wärï kööï jïre, na ‹Awuuö, beerra man ö nyiwära ma Tamar ni ööe nee tïïe ki cam jïra nee cama, ni cam manøgø jiiŋŋe ni nëënö jïra, naa caame.› »

⁶ Kanyøgønø, Amnön aput but piny ni cøøk dëëre ni kere täw okadhø. 'Ba kanya ö nyeya na lïïm eni, ena köö jï nyeya, na «Awuuö, beerra man ö nyiwära ma Tamar ni ööe nee bude ki dääpe ariiø ni nëënö jïra naa caame.»

⁷ 'Ba Deebit aput jääk paac baŋ Tamar, ni kööe, ni «Ci baŋ owäru ma Amnön yi øtø mare, ni tïï ki cam jïre.»

⁸ Kanyøgønø, Tamar aput ci baŋ owänni ma Amnön yi øtø mare. 'Ba kar kaagø, Amnön obut piny. 'Ba kanya ööe, eni käädö ki møø mo okudö, ni coot gø ni bul gø na dääpe, ni nëënö jï Amnön.

⁹ Ni ö Tamarri ni lwør dääpe yi gïna budö ki gø ni cïp gø nyïm Amnön; 'ba Amnön akweer ki cam. Køøre Amnön aköö, «Beerra man ö jøøi ni en kany en ni cige wøk.» Kanyøgønø, jiy bëët aput aa wøk buute.

¹⁰ Køøre Amnön aköö jï Tamar, ni «Käl cam kar niine mara, naa caamï.» Kanyøgønø, Tamar dääpe moa bule aput lwør ni kïth ge kar niine baŋ owänni ma Amnön.

¹¹ 'Ba kanya ö Tamarri na käl dääpe jï Amnön nee cäme, Amnön nyiwänni ma Tamar aput mak ki teek ni kööe jïgø, «Nya nyiwära, ööï naa buta ki ïïni.»

¹² 'Ba aløk Tamar jïre, «Nyie owära, ba løny. Kär a magï ki teek; kiper gïn mo caala man poot kär tïïö dï Icriel cøøn en. Kär niï tïïya gïn ni duunni ka apääda en.

¹³ ?Aŋø, apään gïnögø ööa wøk bääta këët? Këël ïïni thuwø, ï tïmö kaamar dhaanhø ma bøøl dï bøøre mo Icriel. 'Ba ennø, nyie owära, pëëny nyeya, kiper eni a ba mäne ki man nywømï aani.»

¹⁴ 'Ba Amnön ïthe käre ciiø ki luum nyiwänni; 'ba kiper mana näk dëëre teeka eni ki nyiwänni, nyiwänni aput mak ki teek ni put butö ki gø na dhaagø.

¹⁵ Køøre Amnön aput männö ki nyiwänni ma Tamar ki män mo dwøŋ døc; 'ba män mana männe ki nyiwänni ki gø aput tïmö ni dwøŋ døc ni kaala mëër mana mëëre ki gø. 'Ba Amnön aköö jï nyiwänni, ni «Ö maal; ci wøk.»

¹⁶ 'Ba Tamar aköö jïre, ni «Jïra bäär; ki man riemmï aani, ï meeta gïna raac na nø tïïyï dëëra.» 'Ba Amnön ïthe käre ciiø ki dwør nyiwänni.

¹⁷ Køøre Amnön, nyen wø bëëdö buute ni tïnynya eni acwøle ni kööe jïgø, ni «Ennø, riem nyaanøgø wøk buuta, ni cïëgï dhi øtø.»

¹⁸ Kanyøgønø, nyenøgø Tamar akïth wøk ni cïëk dhi øtø. 'Ba kar kaagø, Tamar oruyö ka abïï mo pere leth mo caala jalabiiya; kiper nyïï nyeya moa näk dëëtge poot kuc cwøwi, dëëtge wø runyge runynyö ki teeŋ abïïnögø.

¹⁹ Køøre Tamar tør ajøøp wïïe, ni ö abïïne na näk ee røø dëëre ni jeec gø ki pänh cwïny, ni kwaa ceŋŋe wïïe ni aae, ni cäädhi ni göö ko oduuru.

²⁰ Køøre coki ma Abëcëlöm aköö jïgø, na «?Aŋø, owäru ma Amnön anø tïïö ki gïn mo raac dëërï nø? 'Ba ennø, nya coka, lïŋï nø, Amnön ka owäru; luubö man kär kïth cwïnyï døc.» Køøre, Tamar aput bëëtö no owii kare po coki ma Abëcëlöm.

²¹ 'Ba kanya ö nyeya ma Deebit na wïny luummögø bäre, ena put gootø døc.

²² 'Ba Abëcëlöm aput bëëtö ni bäŋ gïn mo ee caanø ka Amnön; kiper Abëcëlöm amännö døc ka Amnön kiper mana ö Amnönni na mak coki ma Tamar ki teek ni bute ki gø na dhaagø.

Kanya Ö Abëcëlömmi Na 'Näk Amnön

²³ 'Ba na tïme na køør cwiiri ariiø, ni jïëc dïëk mo Abëcëlöm di nyaarø paac mana cwøl ni Baal-Adhör buut ŋööm jø tuuŋ Ipariem, Abëcëlöm wäät nyeya bëët acwøle nee öge baŋ cam.

²⁴ 'Ba Abëcëlöm aö baŋ nyeya ni kööe, «Wui nyeya, jïëc dïëk 'moa di nyaarø; beerra man ööï ki jø kööre moï, nou cämu ki aani.»

²⁵ 'Ba aløk nyeya jï Abëcëlöm, «Nyie wääda, ba løny, wa ba cii bëët, kiper wa tïmö ni wa thööth bäätï.» 'Ba këël na ö Abëcëlömmi na cwaat yi nyeya, nyeya kär jïëy ki man aae; 'ba Abëcëlöm agwïëdhe.

²⁶ Køøre, Abëcëlöm aköö jï nyeya, «Ni näk miï ba ciï nø, a kwaya ïïni nee wa aacwa ko owära ma Amnön.» 'Ba nyeya aköö jï Abëcëlöm, na «?Aŋø, Amnön aae ki uuni aperŋø?»

²⁷ 'Ba kanya ö Abëcëlömmi na cwaat yi wänni ma nyeya, nyeya Amnön ki uutwänni bëët aput cïp nee aacge ka Abëcëlöm.

²⁸ Køøre Abëcëlöm jiye aköömme ni kööe, ni «Ennø, kanyo ö Amnönni noo meere ki køøŋ nyïïomøki, kanyo kööa, ni ‹'Nägu eni›, eni wär putu 'näk. Kär nou lwäyö. ?Aŋø, u ba köömma aani? Magu rou, ni bëëdu nou teek.»

²⁹ Køøre jic Abëcëlöm, Amnön aputge 'näk kaawat mana ö Abëcëlömmi na kööm geni. Køøre wäät nyeya bëët aput päny maal, ni ö ŋati man nø ni eth bäät gääŋŋö mare ni putge reeŋø.

³⁰ 'Ba kanya pootge ni ge ena øtjöö, waac apïï baŋ nyeye ma Deebit ni køp, na «Abëcëlöm wäätï bëët anø nääe, ni bäŋ aciel mo dööŋ ni kwøw.»

³¹ Kanyøgønø, nyeya aput päny maal ni jeec abïïge, ni gøø ree piny ki pänh cwïny; ni ö jø kööre bëët moa en buute kaagø ni putge abïïkge jeeyø thuwø.

³² 'Ba Jönadap o Cimia, ni beeye Cimia cöök Deebiti, mare acaane ni kööe, «Wui nyeya, kärï cädö ni wäätï ge bëët geno nääö. Beeye Amnön keere na thøw; kiper beeye gïna en cwïny Abëcëlöm ki mana täge ki dïcäŋa ö coki ma Tamar na magi ya owänni ma Amnön ki teek ni bute ki gø na dhaagø.

³³ 'Ba ennø, ï na nyeya, waac moa køp yøø, ni ‹Wäät nyeya ge bëët athøw,› kär kïth cwïnyï na adïëri, kiper beeye Amnön keere na thøw.»

³⁴ 'Ba kar kaagø, Abëcëlöm onø reeŋø. 'Ba kanya ö nyena kurö buut nyeya na tïŋ wïïe maal na lwïthe, ka adïëri møn, jiy mo thööth aput joot ni ge öö ni ge cura waŋjöö mana en jï løø kur pänh-cäŋ ni ge lööny piny ka bäät kïdi. Ni ö ŋat koorri ni cøøe ni caan gø jï nyeya.

³⁵ Kanyøgønø, Jönadap aköö jï nyeya, ni «Neenï, ka adïëri møn, wäätï aöö; gïna caana, a na dhaanhnhï, athur kare.»

³⁶ 'Ba kanya ö Jönadapi na leeŋ dhee piny ennø, ka adïëri møn, wäät nyeya aput nicäär, ni ge jwöŋö døc; ni ö nyeya ki jø kööre bëët ni putge jwøk døc thuwø.

³⁷ 'Ba Abëcëlöm onø reeŋø ni ci baŋ Thalmay wär Ammiyut, nyeny jø Gëcur. 'Ba Deebit aput bëëtö ni kïmmö cooth kiper wääde.

³⁸ 'Ba Abëcëlöm aput bëëtö Gëcur ki cwiiri adäk.

³⁹ Køøre nyeya ma Deebit atïmö ni cädö kiper wääde ma Abëcëlöm; kiper cwïnye acøme ki thøw wääde ma Amnön.