2 Camiel 11 - Wëël Jwøk

Luum Bääyö Mana Dwøŋ Na Tïïc Deebiti

¹ 'Ba kanya tïme ni piny otal ni bäŋ køth këët, ni beeye kany wø ci nyeye baŋ mäny, nyeya ma Deebit, Jöap ki kwääc lwaae mo leny møga këël jø leny mo jø Icriel bëët, ajääŋŋe baŋ leny; ni ö jøøgø ni cige ni raanyge jø Amön, ni putge päänya dwøŋ na cwøl ni Raaba tii dïër. 'Ba Deebit odööŋ paac yi Jerucalem.

² 'Ba dïcäŋ aciel ki kur abøøya, nyeya aö maal ki bäät pëëm mare ni caath tiete yi øtø mare mana en bäät øtø maal; 'ba kanya cäädhe kaace, ena lwïthö piny ni jïte ki dhaagø mo lwøk. 'Ba dhaagø manøgø beeye dhaagø mo kïte mïërö døc.

³ Kanyøgønø, Deebit ajäägö ki dhaanhø nee bëët dhaagø manøgø pëënynye. 'Ba akøp, na «?Aŋø, dhaagø manøgø paa Bathcïba nyi Eliam, ni beeye cï Uria nyï Këth?»

⁴ 'Ba Deebit aput jääk baŋ dhaagø manøgø ki jiy, nee öge ki gø; ni ö dhaagø manøgø ni pïïe baŋ Deebit. Køøre Deebit aci baŋ gø ni bute ki gø na dhaagø, ni ö nyaanøgø ni put døø paare. 'Ba kar kaagø, dhaagø manøgø onø gööc wøk ki gïr mään.

⁵ Køøre dhaagø manøgø yie ajïtö ki dhaanhø, ni jääk baŋ Deebit nee caan jïre, ni «Yia da dhaanhø.»

⁶ 'Ba Deebit ajääk baŋ Jöap pwöl leny, ni kööe, ni «Uria nyï Këth jääŋŋï baŋa.» Kanyøgønø Jöap, Uria aput jääŋŋö baŋ Deebit.

⁷ 'Ba kanya pïïc Uria baŋ Deebit, ena pëëny Deebiti ki jööt dëël mar Jöap ki jööt dëël mar jø leny, këël luum leny bäre.

⁸ Køøre Deebit aköö jï Uria, ni «Ci paarï, ni jwömï riï.» Kanyøgønø, Uria aput døny wøk yi øt nyeya, ni ö cam mana cïp nyeya jïre ni jääŋŋi køøre.

⁹ 'Ba Uria aput but dhi øt nyeya ki jø tïïc mo nyeya møga bëët, ni käre ci paare këët.

¹⁰ 'Ba kanya caani jï Deebit ni køp, ni «Uria kär ci paare,» Deebit aköö jï Uria, «?Aŋø, ï ba käl jöö? ?Aperŋø na kärï ci paarï en?»

¹¹ 'Ba aløk Uria jï Deebit ni kööe, na «Acanduk mar Wuuö Jwøk, ki jø leny mo jø Icriel, ki tuuŋge ma jø tuuŋ Juuda, ge bëëdö yïth abïle; ni këël kwääy lwaa leny mara ma Jöap ki kwääc lwaae mo leny møga, twïër marge ege tïïö pwöla jaak. ?A aani nø, a doo cøøa paara ni cäma ni mädha ni yia met, ni cøøa baŋ dhaagø mara ni buta ki gø? Aani, a kööŋŋa riï kiree, teeŋ gïnögø ba daa tïïö na bäre bäre.»

¹² Køøre Deebit aköö jï Uria, ni «Wøp nø, ï bëëdö kany dïcäŋi thuwø, 'ba diøø ï wëëga wääth niï aayï.» Kanyøgønø, Uria aput bëëtö yi Jerucalem dïcäŋögø këël riet nïne.

¹³ 'Ba ena cwøl Deebiti ni cäme ni mädhe ki eni na aciel, ni puti Deebiti tïïc nee meere. 'Ba na tïm pinynyi na wäär, Uria adøny wøk ni cäŋ ci baŋ jø tïïc mo nyeya, ni but kaace; 'ba eni kär ci paare.

¹⁴ 'Ba na tïme na amöölla, Deebit agööt baŋ Jöap ki wëëlö ni cïp gø cer Uria nee kïth baŋ Jöap.

¹⁵ 'Ba luubö mana no ogöör Deebiti yi wëëlö, ena köö, ni «Uria wär tïïc nee ci nyïm, kanyo en lenynyi mana teek yie, ni døøu ŋää cään, nee tïme ni løny ki man këëli ni thøøe.»

¹⁶ 'Ba kanya bëëde ni pääny onø rum Jöapi dïër, Uria aput Jöapi tïïc nee ci kanya en jø leny moa teek mo jøøgø yie.

¹⁷ Kanyøgønø, jø leny mo paanøgø aput ö wøk, ni këëtge ki Jöap, ni ö jø møøki røk jø leny mo Deebit ni thøwge ri leny kaagø; 'ba Uria nyï Këth thuwø athøw.

¹⁸ Køøre Jöap ajääk baŋ Deebit ni caan gïna tägö ri leny bäre.

¹⁹ 'Ba acaan Jöapi jï ŋata jääŋŋe, ni kööe, ni «Kanyo nø thöörï jammi bëët moa tägö ri leny ki caan jï nyeya,

²⁰ kanymør nyeya wëër ki ïïni, ni kööe, na ‹?Aperŋø na nyiigu buut kiir nou këëdu ki geni? ?Aŋø, kuyu nou thööcge thööyö ki ri kiir?

²¹ ?Aŋø, Abimëlëk o Gidien othøw nidïï na bëëde? ?Paa dhaagø jaak na lëëŋ kïn guur ki bäät kiir maal, ni päth wïïe, ni put thøø Tëbët kaace? ?Aperŋø nø na nyiigu buut kiir mar jøøgø?› Køøre nø, wärï put köö, ni ‹Dhaanhnhï ma Uria nyï Këth, athøw thuwø.› »

²² Kanyøgønø, ŋata jääŋ Jöapi atïŋŋö, ni pïïe baŋ Deebit ni caan luup bëët moa jääŋŋi Jöapi kiperge.

²³ Ni kö ŋata jääŋŋi jï Deebit, ni «Jøøke atïmö ni teek, ni öge baŋ leny ki waani yi pwöla; 'ba gena ŋaacwa ni putwa pïï dhi kiir marge.

²⁴ Kar kaagønø, jø wø këëdi ka athëëre moa en røk jøøke, jø leny moï aputge këërö ki ri kiir; ni ö jø møøk røk jø leny ni putge thøø, këël dhaanhnhï ma Uria nyï Këth thuwø aput thøø.»

²⁵ Køøre Deebit aköö jï ŋata jääŋŋi, ni «Ciï ni caanï gø jï Jöap, ni ‹Cwïnyï kär ränynyö kiper gïna tägö enøgø, kiper kany wø näk ri leny, thøø dagø løøk man ki løøk maya; 'ba ennø, tïïc leny marï ni teek døc ni mayï pääny manøgø.› 'Ba luubö manøgø wär caanï jïre, nee cwïnye jïte ki cer.»

²⁶ 'Ba kanya ö cï Uria na wïny gø ni cwøre ma Uria athøw nyïm leny, ena jwöŋö ni kïmme kiper thøw cwøre.

²⁷ 'Ba kanya thum nïr kïmmö, Deebit ajääk baŋe ni käl gø paare, ni put tïmö na cïïe. Køøre dhaagø manøgø alwaar ki dhaanhø ma dïcwøø ni beeye nyilaal mar Deebit. 'Ba gïna tïïc Deebiti beeye gïn mo nëëni ni raac døc ki jï Wuuö Jwøk.