1 Timöthi 6 - Wëël Jwøk

¹ 'Ba jøø bëët ni bëëdö yi laŋ ni caal twöc enø, beerra man ŋäcge kwääri moge no orømø ki wödö ma wøp, kiper nee nyeŋ Jwøk ki pwöc moe bëët nee ba jøøŋŋi.

² 'Ba jøø ni kwääri moge ojïëy yøø, kär wïthge tïmö ni teek kiper mana tïmge na nyïïmëëe. 'Ba ge doo puta tïïö ki tïïc ma wøp, kiper mana tïme ni jøø ni tïnyge yøø, gena jiy mo ojïëy ni ŋääthge, no omëëcge. Beerra man pwönynyï geni ni köömmï geni ki gïïögø.

Bëët Jöör Jwøk Ni Cwïny Ocïp Piny Ki Jammi Moa Nut

³ 'Ba ni näk da dhaanhø mo pöö ki teeŋ pwöc mør, ni ba jïëy ki luup moa näk adïëri mo Kwääyø ma Jecu Krictø, ki pwöc mana en jöör Jwøk,

⁴ ŋatøgø päŋŋa cwïnye ka atöör, ni bäŋ gïn ŋääe. Eni wïïe raac no okadhø ki pïëc, ni yie met ki pïëm tiet luup, ni wø käl gwön, ki wëëye, ki waac nyeŋ, ka adïëde mo reyø,

⁵ ki pïëm mo ba cuŋ dï jiy moa wïthge reyø, jø wø kuy adïëri, ni wø caar gø ni bëët jöör Jwøk beeye jöö man joot jammi ki køøre.

⁶ 'Ba gïn mo dwøŋ wø di joodø møn ki køør bëët jöör Jwøk ni näk mo dhaanhø cwïnye ocïp piny ki jammi moa nut jïre.

⁷ Kiper bäŋ gïn mo yøø käl piny, ni bäŋ gïn mo maarø käl wøk piny.

⁸ 'Ba ni näk jïïø da caammi ka abïïe, yïthø doo met.

⁹ 'Ba jø wø many man tïmge no okwär, wø pätha jöör päänynyö ya abïëp, ni tïmge ni ge manynya gïï mo oballe jaak mo raanynya geni, ni beege gïï wø käl rääö ki ränynyö dëëtge.

¹⁰ Kiper mëëc jammi beeye wø käl teeŋ raay bëët. Ni beeye päl cwïny kiper jammi na tïm jø møøki ni geno gaa wøk ri ŋäädhe, ni raanyge cwïnyge ki luup mo thööth mo leth.

Këël Leny Ŋäädhe Ki Leny Ma Wøp

¹¹ 'Ba ïïni, ï na dhaanh Jwøk, tïïc karï ni bäär ki gïïögø. Këël wïïï ri gïïa beyø ki bëët jöör Jwøk, ki ŋäädhe, ki mëër, niï teek, niï mwöl.

¹² Këël leny ŋäädhe ki leny ma wøp. Ni magï kwøw mana näk adïëri mo bäŋ cuŋŋe na cwøl ïïni kipere, kanya køpï luubö marï na wøp nyïm jøøa thööth na wïny gø.

¹³ A köömma ïïni nyïm Jwøk, eni ni wø cïp kwøw jï jammi bëët, ki nyïm Krictø Jecu, ŋata käl luubö mare wøk ni beer kanya køp mare nyïm Pøntia Paylat,

¹⁴ ki man gwøgï mana cem Jwøki na kare, nee bäŋe ŋat jøøŋ gø këël mano neen Kwääyø ma Jecu Krictø.

¹⁵ 'Ba noo tïm kar gïnögø na kare, manøgøøni onyooth Ŋata dwøŋŋa eni keere, na näk ogwïëdhö, eni na näk Nyeny nyeye, ni näk Kwääny kwääri,

¹⁶ eni keere ni wø bëëdö ni ba thøw, ni wø bëëdö yi tayo näk bäŋ ŋat ci buute, eni na näk bäŋ ŋat mo oneen gø, na ba doo maara neen. Ajiem en jïre ki rööny na bäre bäre. Enøgønø.

Piew Cwïny Ki Køny

¹⁷ 'Ba jøøgø no okwär yi piny man en, kööm geni nee ba töötge, ni ba ŋääthge jap kwärö moge. 'Ba beerra man ŋääthge Jwøk, eni ni wø cïp jammi bëët jïïø nee yïthø mïnge.

¹⁸ 'Ba ge doo tïïya tïïe mo beyø, ni tïm kønynyi ni päl jïge, ni ceŋge jööt ki muuc, ni cwïnyge piew ki køny.

¹⁹ 'Ba kanyo tïïcge gïïögø ge këëlla tietge piny na wøp kiper yi nyïm, kiper nee un kwøw mana näk adïëri makge.

²⁰ Ï na Timöthi, gwøk gïna wëëk ïïni. Kwier luup mo ba en jöör Jwøk, ki pïëm mar gïn wø cwøl ni kwänynyö, ni patha eni.

²¹ Kiper da jø møøk mo ogaa wøk ki jöör ŋäädhe, kiper mana jïëcge gïnögø. Met ec bëëde bäätu.