1 Timöthi 4 - Wëël Jwøk

Jø Møøk Ŋäädhe Marge Owecge

¹ 'Ba kawaane, ocaan Jwïëc Jwøki møn ni noo tïm kar aŋuun piny ni cään, jø møøk ŋäädhe marge owecge ki køør mano cekge ïthge jï juuk atade ki pwöc anäge,

² kanyo ö tööte moa bäŋ cwïnyge noo cøøkge geni ki tööt marge,

³ jø wø män jiy ki nywöm, ni mänge jiy ki caammi møøk moa cwääc Jwøki, na doo jïëc jø wø jïëy ni ŋäcge adïëri ni ge dwøga met ec jï Jwøk.

⁴ Kiper jammi bëët moa näk ocwääc Jwøki, beyø, ni bäŋ gïn mo doo kwierø ni näk tïïc ni nyeŋ Jwøk opwøø kipere.

⁵ Kiper beeye dwør Jwøk ki lam noo tïïc gø ni ena kur keere.

Dïpööy Mo Beer

⁶ 'Ba ni näk luupi ii peedhï nyïm nyïïmëëe, ï tïmö ni ïïna dïpööy mo beer jï Krictø Jecu, ni piidhï yïth luup ŋäädhe, ki pwöc mo beer mana caathï køøre.

⁷ Bëëdï ni karï bäär ki leere mo oballe na näk ba en ri luum Jwøk. Pwöny riï ki bëët jöör Jwøk.

⁸ Ŋääø ni pwöny røk beeye gïn mo beer, 'ba bëët jöör Jwøk beeye gïna beerra eni døc ki kare bäre, kiper beeye eni ni cïp kwøw ennø, ki kwøw mano en yi nyïm thuwø.

⁹ 'Ba luubö manøgø beeye adïëri møn, mo doo jïëyö.

¹⁰ Kiper ŋäädhe marø ena ri Jwøa kwøw, ŋata näk Pïëmi mar jiy bëët, ni piema jøøa näk ojïëy røk, ni beeye ni tïïø ni øøno ööl døc en.

¹¹ Kööm jiy ni pwönynyï geni ki gïïögø.

¹² Ni bäŋe ŋat jøøŋ ïïni kiper thïnhö marï, 'ba tïmï ni ïïna jöö jï jøøa näk ojïëy ki yïth luup moï, ki bëëtö marï, ki mëër marï, ki ŋäädhe marï, niï ciil ki raay bëët.

¹³ Kwaan wëël Jwøk nyïm jiy bëët, ni køpï luum Jwøk, ni pööï këël mano ööa.

¹⁴ Kär niï taaga muuy manø ni en jïrï enø, na wëëk ïïni ki køør mana caan nyikuŋ Jwøki, kanya ö jaak acooŋ Jwøki na cïpge ceŋge bäätï.

¹⁵ Tïïc gïïögø cooth, ni cïbï cwïnyï køørge, kiper nee tïïc marï joot jiyi niï cäätha nyïm.

¹⁶ Gwøk riï ki pwöc marï ni putï gø ŋäc, kiper noo tïïï na enøgønø dëërï okønyï ki jøw owïny moï.