1 Timöthi 1 - Wëël Jwøk

Määdhe

¹ Aana Pøøl na nyïïatwiel mar Krictø Jecu ki køør mana ö Jwøki na kööm aani, eni na näk Pïëmi marø, ki Krictø Jecu, ŋata ŋäädhø kiper yi nyïm.

² A göönna baŋï, ï na Timöthi, ï na wääda ma adïëri ki køør ŋäädhe. Met ec ki bäth-ec ki bëët-mëër na en jï Jwøk na näk Wuuö ki Krictø Jecu na näk Kwääyø bëëde bäätï.

Juuk Kiper Teeŋ Pwöc Mør

³ Dööŋï Epeca kaawat mana caana gø jïrï kanya aa Macedönia, kiper nee jø møøk joogï nee ba pööge ki teeŋ pwöc mør,

⁴ ni ba öölge dëëtge ki leere, ki luup tiet tuŋi mo kwäre moge, ni wø känni ki pïëm mo bäŋ tiere, ni wø ba pwöny dhaanhø ki jöör Jwøk na en ri ŋäädhe.

⁵ 'Ba tier pwöc marø beeye mëër mo käla yi cwïny mo tar, ki bëëtö ma adïëri, ki ŋäädhe ma adïëri.

⁶ 'Ba jø møøk gïïögø awecge ni gaage wøk køør luup mo oballe jaak.

⁷ Ni ge manynya man tïmge ni gena dïpööye mo ciik Jwøk, këël na kucge tiet gïï wø carge, wala gïï wø pïëmge kiperge.

⁸ 'Ba ŋääø ni ciik Jwøk beer, ni näk mo otïïc dhaanhe na karge.

⁹ Ni ŋääø ni ciik Jwøk bäŋ wø caan kaper jøøa beyø, 'ba wø caan kaper jø wø wïnni na wïthge teek, ki jø wø kuc Jwøk, ki jø raay, ki jø wø bäŋ gïn wøørge ni wø taak mo Jwøk, ki jø wø nääŋ wëëkge ki mëëkge, ki jø wø nääŋ jiy jaak.

¹⁰ Ni cïp kaper kääpe, ki cwøw mo wø døø rege ki niine, ki jø wø kwädö ki jiy, ki tööte, ki jø wø kööŋ ko oballe jaak, ki jø wø tïïc teeŋ gïï møøk bëët ni wø män ki pwöc ma adïëri,

¹¹ kaawat pwöc mana en ri luumma nyään na met mar Jwøø ajiem na näk ogwïëdhö na wëëk aani.

Pøøl Pwøya Met Yi Jwøk

¹² 'Ba a wø dwøga met yia baŋ Krictø Jecu na näk Kwääyø, ŋata wëëk aani tëënnö, kiper mana caar aani, ni aano rømø ki man ŋäädhi, kanya jier aani ni kïth a yi tïïc mare,

¹³ këël na kwøŋa bëëtö naa caanna eni, naa pääta eni, naa tïïö ki gïï mo reyø bääte. 'Ba aana kønye kiper na kuua mana tïïa na kära jïëy.

¹⁴ Ni ö met eci mar Kwääyø ni tïme ni päl bääta, ki ŋäädhe ki mëër na en jï Krictø Jecu.

¹⁵ 'Ba luubö man en beeye adïëri møn mo doo jïëö, ni Krictø Jecu aö piny kuna piem jø raay. 'Ba beeye aani na näk wïth jø raay.

¹⁶ 'Ba aana køny, a na näk wïth jø raay, kiper nee Jecu Krictø nee cwïnye na näk ee cïp piny ki kare bäre, nee nyoodhe ki raa, nee tïme na jöö jï jø wø jïëy ni ŋäätha eni kiper kwøw mana näk adïëri mo bäŋ cuŋŋe.

¹⁷ 'Ba wödö ka ajiem en jï Nyeny beenhnhe bëët këël na bäre bäre, ŋata näk ba thøw na näk ba neen, ni beeye Jwøk keere. Enøgønø.

¹⁸ 'Ba ï na wääda ma Timöthi, a köömma ïïni ki luummi en, kaawat mana caan nyïïkuk Jwøki na wara nyoothge ïïni, kiper noo lääŋŋï gïïögø, yiï omïnni ki man këëdï ki leny ma adïëri,

¹⁹ niï ŋäya ŋäädhe, ni putï bëëtö ki bëëtö ma adïëri. Kiper da jø møøk mo ŋäädhe marge ege nø raanynyø, ni tïïcge gø kaamar thääŋ jääy mo oränynyö, kiper mana kwierge luup moa näk adïëri na ŋäcge ki cwïnyge.

²⁰ 'Ba jøøgø beege Aymeneea, ki Alekdhander, jøøa cïba jï Ceethan kiper nee ŋäcge møn ni ba doo beer jïge ki man bëëtge ni dhøkge reyø.